༢༠༡༡ ཟླ་ ༡༡ ཚེས་ ༡༡ རེས་གཟའ་པ་སངས།
༄༅། །འདི་གར་ཨོ་སི་ཊོ་ལི་ཡའི་སྐུ་ཚབ་དོན་གཅོད་ལས་ཁུངས་ནས་ཕྱི་ལོ་ ༢༠༡༡ ཟླ་ ༡༡ ཚེས་ ༡༡  ཉིན་བཏང་གནས་ནང་འཁོད་དོན། འདི་ལོ་ཕྱི་ཟླ་ ༣ པ་ནས་བཟུང་བོད་རྔ་བ་ཁུལ་དང་། དཀར་མཛེས་གཉིས་ཀྱི་གྲྭ་བཙུན་དང་མི་སྐྱ་ཁག་གཅིག་གིས་རྒྱ་གཞུང་གི་གདུག་རྩུབ་མནར་གཅོད་ལ་ངོ་རྒོལ་གྱིས་བོད་ལ་རང་དབང་དང་ཆོས་དད་རང་དབང་དགོས། ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་སོགས་འབོད་ཚིག་སྒྲོག་བཞིན་པ་དང་ལྷན། སྐུ་ལུས་མེར་སྲེག་བཏང་བར་བཀའ་སྤྱི་གཉིས་ནས་འཛམ་གླིང་རྒྱལ་ཁབ་ཁག་དང། མི་མང་ལ་བོད་ནང་གི་ཛ་དྲག་དཀའ་ངལ་སེལ་ཐབས་སུ་གདུང་སེམས་མཉམ་སྐྱེ་དང་། རྒྱབ་སྐྱོར་ཡོང་བའི་འབོད་བསྐུལ་ཞུས་ཡོད་པ་ལྟར། ཨོ་སི་ཊོ་ལི་ཡ་དང་ནིའུ་ཛི་ལན་ཌི་ཁུལ་གནས་བོད་རིགས་དང་བོད་དོན་རྒྱབ་སྐྱོར་ཚོགས་པ་ཁག་ནས་རྒྱ་ནག་གཞུང་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་དང་གཏོང་བཞིན་པ་མ་ཟད། བོད་མིར་མནར་གཅོད་ཚད་ལས་བརྒལ་བ་གཏོང་བཞིན་པར་ངོ་རྒོལ། དེ་བཞིན་བོད་མིར་རྒྱབ་སྐྱོར་དང་། གདུང་སེམས་མཉམ་སྐྱེའི་ལས་འགུལ་འདྲ་མིན་སྤེལ་དང་སྤེལ་བཞིན་ཡོད། གོང་འཁོད་རྒྱལ་ཁབ་གཉིས་ཀྱི་གཞུང་ནས་ཀྱང་རྒྱ་ནག་ལ་བོད་མིའི་འགྲོ་བ་མིའི་ཐོབ་ཐང་ལ་བརྩི་སྲུང་དང་།   བོད་ཀྱི་གནད་དོན་ཞི་མོལ་གྱི་ལམ་ནས་སེལ་དགོས་པའི་བསྐུལ་མ་གནང་ཡོད།
དེ་ཡང་ཕྱི་ཟླ་ ༡༠ ཚེས་ ༢༢ ཉིན་ཨོ་སི་ཊོ་ལི་ཡའི་ལྗང་གུ་ཚོགས་པའི་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་སྦོབ་སྦ་རའོན་མཆོག་གིས་ཡོངས་གྲགས་གསལ་བསྒྲགས་ཤིག་སྤེལ་བའི་ནང་གསུང་དོན། རྒྱ་ནག་གཞུང་གི་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་རྩིས་མེད་དང་རང་དབང་རྩ་འཕྲོག་བྱས་པར་བརྟེན། གྲྭ་བཙུན་དང་མི་སྐྱ་ཁག་གཅིག་གིས་སྐུ་ལུས་མེར་སྲེག་བཏང་བའི་སྐོར་ཨོ་སི་ཊོ་ལི་ཡས་གཙོས་རྒྱ་ནག་དང་མཉམ་དུ་ཚོང་འབྲེལ་བྱེད་བཞིན་པའི་རྒྱལ་ཁབ་ཁག་ནས་དོ་སྣང་བྱེད་དགོས། དེ་བཞིན་རྒྱ་གཞུང་དང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཁྲིམས་གཞི་ཁག་བརྩི་སྲུང་ལག་བསྟར་དགོས་པའི་བསྐུལ་མ་གཏོང་དགོས་ཞེས་གསུངས་ཡོད།
ཕྱི་ཟླ་ ༡༠ ཚེས་ ༣༡ ཉིན་ལྗང་གུ་ཚོགས་པའི་གྲོས་ཚོགས་གོང་མའི་འཐུས་མི་ལྕམ་སྐུ་ས་ཧ་ར་ཧེན་སོན་ཡང་(Senator Sarah Hon Son-Young)གིས་གྲོས་ཚོགས་གོང་མའི་ནང་བོད་ནང་གྲྭ་བཙུན་དང་མི་སྐྱ་ཁག་གཅིག་གིས་སྐུ་ལུས་མེར་སྲེག་གིས་ཛ་དྲག་གནས་སྟངས་སྐོར་འགྲེལ་བརྗོད་དང་།  ཨོ་སི་ཊོ་ལི་ཡ་གཞུང་ནས་རྒྱ་ནག་གཞུང་ལ་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་ལ་བརྩི་སྲུང་བྱེད་དགོས་སྐོར་བཀའ་མོལ་གནང་དགོས་པའི་གྲོས་གཞི་ཡང་བཏོན་གནང་ཡོད།
ཕྱི་ཟླ་ ༡༡ ཚེས་ ༣ ཉིན་ཨོ་སི་ཊོ་ལི་ཡ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་མ་ཡི་ཀལ་ཌེན་སྦི་(Michael Danby) མཆོག་གིས་གྲོས་ཚོགས་འོག་མའི་ནང་བོད་ནང་གྲྭ་བཙུན་དང་། མི་སྐྱ་ཁག་གཅིག་གིས་སྐུ་ལུས་མེར་སྲེག་བཏང་བ་དང་། རྒྱ་ནག་གཞུང་ནས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཛ་དྲག་གི་གནས་སྟངས་སྐོར་འགྲེལ་བརྗོད་གནང་སྟེ་རྒྱ་ནག་གཞུང་ནས་བོད་ཀྱི་ཆོས་དད་རང་དབང་གི་ཐོབ་ཐང་ལ་སྲུང་བརྩི་དང་ཀིརྟི་དགོན་པའི་དགེ་འདུན་པ་རྣམས་ལ་མནར་གཅོད་མཚམས་འཇོག་དགོས་པའི་ཞུ་འབོད་གནང་ཡོད།
ཡང་ཕྱི་ཟླ་ ༡༡ ཚེས་ ༩ ཉིན་ཨོ་སི་ཊོ་ལི་ཡའི་རྒྱལ་ཡོངས་ལྗང་གུ་ཚོགས་པའི་ཚོགས་ཆེན་ནས་བོད་དོན་སྐོར་གྲོས་ཆོད་གཅིག་བཞག་པའི་ནང་། བོད་མི་ཚོར་རང་ཁྱིམ་རང་བདག་དང་། བོད་ཀྱི་ཆོས་དང་རིག་གཞུང་གཙོས་རང་ཐག་རང་གཅོད་ཀྱི་ཐོབ་ཐང་། འོས་འདེམས་བྱེད་པའི་བོད་ཀྱི་དབུ་ཁྲིད་ཚོར་ངོས་འཛིན་ཞུ་བཞིན་ཡོད་ཅེས་དང་། རྒྱ་ནག་གཞུང་ནས་བོད་ཀྱི་རང་འབྱུང་ཐོན་ཁུངས་འཕྲོག་བཅོམ་དང་། རིག་གཞུང་གཏོར་བཤིག་གཏོང་བཞིན་པར་སྐྱོན་བརྗོད་དང་། བོད་མི་ཚོར་དྲག་གནོན་བྱེད་བཞིན་པ་འཕྲལ་དུ་མཚམས་འཇོག་དགོས་པ། བོད་མིའི་ཐོབ་ཐང་དང་རང་དབང་གི་འཐབ་རྩོད་དེ་རྣམས་སྣང་མེད་མ་བཞག་པར་དོ་སྣང་སྤྲོད་དགོས་པའི་བསྐུལ་མ་བཏང་ཡོད་པ་བཅས།།