༢༠༡༡ ཟླ་ ༡༡ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༡ ཉིན་བཀའ་བློན་ཁྲི་པ་བློ་བཟང་སེང་གེ་མཆོག་གིས་སུད་སིའི་གྲོང་ཁྱེར་ཛུ་རིཀ་གི་ཕོ་གྷ་སེ་ཧོ་སི་ཞེས་པའི་ཚོགས་ཁང་ནང་ཡུ་རོབ་ཀྱི་བོད་རིགས་གཞོན་ནུ་གཙོ་བོར་གྱུར་བའི་མི་གྲངས་ ༣༠༠ བརྒལ་བར་གསུང་བཤད་གནང་དོན། འདི་གར་ཕེབས་པའི་རྣམ་པ་ཚོར་ཐོག་མར་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། གཞིས་བྱེས་བོད་མི་ཡོངས་ཀྱི་ངོ་ཚབ་ཞུ་རྒྱུའི་བདག་དབང་བཞུགས་སྒར་རྡ་སར་རྟེན་གཞི་བྱས་པའི་བོད་མིའི་སྒྲིག་འཛུགས་ལ་ཡོད་པ་ལས་གཞན་མི་སུ་གཅིག་ལ་ཡང་བོད་མིའི་ངོ་ཚབ་བམ་འཐུས་མི་ཡིན་ཁུལ་བྱ་རྒྱུའི་འགན་དབང་གང་ཡང་མེད་པ་དེ་ཧ་ཅང་གསལ་པོ་རེད། བརྒྱུད་ལམ་གཅིག་དང་གྲོས་གཞི་གཅིག་ཡིན། བརྒྱུད་ལམ་དེ་རྡ་སར་ཡོད་པའི་སྒྲིག་འཛུགས་དེ་བརྒྱུད་ནས་མ་གཏོགས་སུ་ཞིག་གིས་ཚབ་བྱེད་ཆོག་གི་མེད། གང་ལ་ཞེ་ན། ང་ལྟ་བུར་མཚོན་ན་ཆོལ་ཁ་གསུམ་དང་ཆོས་བརྒྱུད་བཞི་གཡུང་དྲུང་བོན་བཅས་ཀྱི་མི་མང་གིས་འོས་ཤོག་བླུགས་ནས་བདམས་པ་ཞིག་ཡིན། གྲོས་ཚོགས་ཡིན་རུང་མི་མང་གིས་བདམས་པ་ཞིག་རེད། མི་མང་གིས་བདམས་པ་དེ་དག་གིས་མི་མང་གི་ཚབ་བྱེད་ཆོག་གི་རེད་མ་གཏོགས་སོ་སོས་རང་འདོད་བྱས་ནས་ང་གཅིག་གི་ཚབ་ཡིན་ཞེས་བརྗོད་རྒྱུའི་ཐོབ་ཐང་མེད། དེར་བརྟེན་བརྒྱུད་ལམ་གཅིག་དང་གྲོས་གཞི་གཅིག་དེ་ཐུགས་ལ་ཉར་བའི་ཐོག་ནས་མ་འོངས་པའི་བྱེད་ཕྱོགས་གང་ཞིག་ཡིན་རུང་དེར་བསམ་བློ་གཏོང་རྒྱུ་གལ་ཆེན་པོ་རེད། དེ་བཞིན་བོད་མིའི་སྒྲིག་འཛུགས་ཀྱི་སྒྲིག་སྲོལ་ཆ་ཚང་ཀ་བ་གསུམ་གྱི་མང་གཙོའི་ལམ་ལ་གཞི་བཅོལ་ནས་མི་མང་གི་བདག་དབང་ལ་ཁྲིམས་ཀྱིས་འགན་སྲུང་ཡོད་པའི་ཐོག་མང་གཙོའི་ལམ་ནས་འོས་འདེམས་བྱས་པའི་མི་སྣ་དེ་དག་མི་མང་གི་སྐུ་ཚབ་མཚོན་པའི་འཐུས་མི་ཡིན་པ་ལས་དེ་མིན་རང་འཚམ་གྱིས་འཐུས་མི་ཡིན་ཁུལ་བྱ་རྒྱུའི་ཐོབ་ཐང་མེད། གང་ལ་ཞེ་ན། ཁ་སྔོན་ཕྱི་ཟླ་བདུན་པའི་ཚེས་ ༡༨ ཉིན་རྒྱ་ནག་གཞུང་ནས་བོད་ཞི་བས་བཅིངས་འགྲོལ་བཏང་སྟེ་མི་ལོ་དྲུག་ཅུ་འཁོར་བའི་མཛད་སྒོ་ཟེར་བ་ཞིག་འཚོགས་སྐབས་བཙན་བྱོལ་བོད་མིའི་ཁྲོད་ནས་རེ་ཟུང་ཞིག་ཕེབས་པའི་ནང་ནས་རེ་གཉིས་ཤིག་གི་བསམ་ཚུལ་མ་འདྲ་ཞིག་ཡོད་པ་འདྲ། འོན་ཀྱང་ཕྱི་ལ་ཡོད་པའི་བོད་མིའི་སྐུ་ཚབ་ཡིན་མདོག་དང་དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་རྒྱུ་དེ་དག་རྩ་བ་ནས་འགྲིག་གི་མེད། བྱེད་སྟངས་དེ་ནི་ཧ་ཅང་ཐབས་སྡུག་རེད། བོད་མིའི་སྒྲིག་འཛུགས་ཀྱི་ལངས་ཕྱོགས་ཧ་ཅང་གསལ་པོ་ཡིན། འདས་པའི་ཉམས་མྱོང་གཞིར་བཞག་དང་འདས་པ་ལས་མ་འོངས་པ་གལ་འགངས་ཆེན་པོར་བརྩིས་ཏེ་དོན་དམ་གྱི་གཞིས་བྱེས་བོད་མི་ཡོངས་ལ་རང་དབང་དང་བདེ་སྐྱིད་ཡོང་བའི་འབད་བརྩོན་བྱེད་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད་པ་བཅས། །