༢༠༡༡ ཟླ་ ༡༡ ཚེས་ ༢༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༠ ཉིན་བཀའ་བློན་ཁྲི་པ་བློ་བཟང་སེང་གེ་མཆོག་སུད་སིའི་ཛུ་རིཀ་གནམ་ཐང་དུ་ཕེབས་འབྱོར་སྐབས་རི་ཀོན་ཆོས་འཁོར་དགོན་གྱི་མཁན་རིན་པོ་ཆེ་མཆོག་གིས་དབུས་སུད་སི་སྐུ་ཚབ་དོན་གཅོད་དང་། ཡུ་རོབ་ཀྱི་སྤྱི་ཟུར་རྣམ་པ། དེ་བཞིན་སུད་སི་དང་ལེཀ་ཊེན་སྤྲཡན་བོད་རིགས་མི་མང་གི་ལས་སྣེ་རྣམས་ནས་ཕེབས་བསུའི་སྣེ་ལེན་ཞུས་ཡོད། དེ་ནས་སུད་སིའི་གྲོང་ཁྱེར་ཨལ་ཊིར་བྷ་སི་ཞེས་པའི་ཚོགས་ཁང་ནང་བཀའ་ཁྲི་མཆོག་གིས་དབུས་མི་མང་དྲུག་བརྒྱ་བརྒལ་བར་ལྷན་འཛོམས་ཀྱིས་ཐོག་མར་བོད་རྒྱལ་ཁབ་ཆེན་པོ་རྒྱལ་གླུ་བཏང་སྟེ་ཉེ་ཆར་བོད་བསྟན་པ་ཆབ་སྲིད་ཆེད་རང་ལུས་མེར་སྲེག་གཏོང་མཁན་གྱི་རྒྱལ་གཅེས་དཔའ་པོ་དཔའ་མོ་རྣམས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་རྗེས་སུད་སིའི་མི་མང་གི་ཚོགས་གཞོན་གྱིས་གསུང་བཤད་གནང་ཡོད། དེ་རྗེས་བཀའ་ཁྲི་མཆོག་གིས་དེར་འདུས་མི་མང་ལ་གསུང་བཤད་གནང་དོན། ང་ཚོས་གཞིས་ལུས་བོད་མི་རྣམས་ཀྱི་སྙིང་སྟོབས་ལ་རྗེས་སུ་ཡི་རང་དང་ཁོང་རྣམས་པའི་རེ་འདུན་སྙིང་བཅངས་ཏེ་མཐུན་ལམ་གོང་བུ་ཆིག་སྒྲིལ་གྱིས་བོད་ཀྱི་རྩ་དོན་ཐོག་ཤུགས་རྒྱག་དགོས། དེ་སྔོན་ནས་བཤད་མྱོང་ཡོད་པར་ལྟར། ཆིག་སྒྲིལ་ཞེས་པ་དེ་ནི་ཆོལ་ཁ་དང་ཆོས་ལུགས་དབྱེར་མེད། ཕོ་མོ་འདྲ་མཉམ་ཡོད་པའི་སྤྱི་ཚོགས། དེ་བཞིན་གཙོ་ཆེ་ཤོས་དེ་བོད་དང་བོད་མི་མདུན་དུ་བཞག་སྟེ་ལས་ཀ་བྱེད་རྒྱུ་གལ་ཆེན་པོ་རེད། ང་ཚོས་ཞི་བའི་ལམ་ནས་བོད་ཀྱི་རྩ་དོན་རྩོད་བཞིན་ཡོད། ཞི་བའི་ལམ་ཐོག་ནས་རྩ་དོན་རྩོད་མཁན་དེ་སྔོན་མང་དག་ཅིག་བྱུང་ཡོད་ལ་མ་འོངས་པར་ཡོང་གི་རེད། དེའི་ཐོག་ཞིབ་འཇུག་བྱེད་མཁན་མཁས་པ་ཚོས་ཐག་ཆོད་པོས་ཆིག་སྒྲིལ་མེད་ན་རྩ་དོན་སྒྲུབ་ཐབས་མེད། ཅེས་ཧ་ཅང་ཁ་གསལ་ཐོག་གསུངས་ཡོད། གཞིས་ལུས་བོད་མི་ས་ཡ་དྲུག་དང་། ང་ཚོ་བོད་མི་ཕྱི་ལ་འབུམ་གཅིག་ཡས་མས་ཤིག་ཡོད་པ་དེ་དག་གིས་ཆིག་སྒྲིལ་གྱི་ནུས་པ་མཉམ་དུ་སྤུངས་མ་ཐུབ་ན། ང་ཚོའི་རྩ་དོན་བསྒྲུབ་རྒྱུར་ནུས་ལྡན་གྱི་གྲུབ་འབྲས་འཐོན་ཐབས་དཀའ་བ་ཞིག་ཡིན། ང་ཚོ་ཕྱི་ལ་ཡོད་པ་དེ་དག་གིས་ནུས་པ་འདོན་རྒྱུར་ཆིག་སྒྲིལ་དགོས་ཀྱི་ཡོད།
དེར་བརྟེན་ཞི་བའི་ཐབས་ལམ་དང་ཆིག་སྒྲིལ་ཐོག་ནས་ང་ཚོས་རྩ་དོན་རྩོད་རྒྱུ་ཧ་ཅང་གལ་ཆེན་པོ་ཡིན། འཛམ་གླིང་འདིའི་སྟེང་སྐྱབས་བཅོལ་བ་མང་དག་ཅིག་ཡོད་པའི་ཁྲོད་ནས་བོད་མི་སྐྱབས་བཅོལ་བ་རྣམས་གང་ཅིའི་ཐོག་ནས་ཕུན་སུམ་ཚོགས་པོ་ཡོད། དེ་དག་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་དབུ་ཁྲིད་འོག་བོད་མི་རྒན་གཞོན་ཚང་མས་གོང་བུ་ཆིག་སྒྲིལ་ལ་ཤུགས་སྣོན་གྱིས་གནས་ཚུལ་ཆུང་ཚགས་རིགས་དོར་ནས་ཆེ་སར་དགོངས་པ་བཞེས་པའི་འབྲས་བུ་ཡིན། ལས་དོན་ཆེ་ཆུང་གང་འདྲ་ཞིག་བྱེད་དགོས་ཀྱང་ཆིག་སྒྲིལ་ནི་མེད་དུ་མི་རུང་བ་ཞིག་ཡིན། ང་ཚོ་ནང་ཁུལ་ཆིག་སྒྲིལ་མེད་ན་རྩ་དོན་སྒྲུབ་རྒྱུ་ཡང་དཀའ་ལས་ཁག་པོ་རེད། ཆིག་སྒྲིལ་ཡོད་ན་ནུས་པ་མཉམ་སྤུངས་བྱེད་ཐུབ་ཀྱི་ཡོད། དེར་བརྟེན་ང་ཚོའི་སྤྱི་ཚོགས་ནང་ཆིག་སྒྲིལ་དགོས་རྒྱུ་ཧ་ཅང་གལ་ཆེན་པོ་རེད། གཙོ་ཆེ་ཤོས་བོད་ནང་ལ་གཟིགས་དང་བོད་ནང་གི་བོད་མི་རང་ལུས་མེར་སྲེག་གཏོང་མཁན་ཚོས་བོད་ལ་རང་དབང་དགོས་པ་དང་། ༸གོང་ས་༸སྐྱབས་མགོན་ཆེན་པོ་མཆོག་ལ་བོད་དུ་གདན་འདྲེན་ཞུ་དགོས་པའི་འབོད་ཚིག་སྒྲོག་གི་ཡོད། ཁོང་ཚོས་བོད་དང་མགོན་པོ་གང་ཉིད་མཆོག་གལ་ཆེ་ཤོས་རྩི་བཞིན་ཡོད་པ་ཧ་ཅང་གསལ་པོ་རེད། ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་མདུན་དུ་བཞག་སྟེ་ལས་ཀ་བྱེད་རྒྱུ་གལ་ཆེན་པོ་ཡིན། དེར་བརྟེན་སྒེར་དང་སྤྱི་གཉིས་ལས་སྤྱི་གལ་ཆེ་བ་ཡོད། སྤྱི་དང་རྩ་དོན་གཉིས་ལས་རྩ་དོན་གལ་ཆེ་བ་ཡོད། རྩ་དོན་གཞིར་བཞག་ཐོག་ནས་ལས་ཀ་གནང་རོགས་ཞེས་འབོད་སྐུལ་ཞུ་རྒྱུ་ཡིན། དེ་བཞིན་གོང་བུ་ཆིག་སྒྲིལ་ཡོད་ན་དཀའ་བའི་ལས་ཤིག་ཡིན་རུང་དཀའ་ཚེགས་མེད་པར་སྒྲུབ་ཐུབ་ངེས་ཡིན། ཆིག་སྒྲིལ་མེད་ན་ལས་དོན་གང་ཞིག་ཡིན་རུང་བསྒྲུབ་ཐབས་མེད་པ་ཆོས་ཉིད་རེད། དེར་བརྟེན་ཆིག་སྒྲིལ་ནི་རྒྱལ་ཁའི་རྩ་བ་ཡིན་པས་ང་ཚོ་ཚང་མས་ཆིག་སྒྲིལ་ཐོག་བོད་ཀྱི་རྩ་དོན་ལ་ཤུགས་སྣོན་རྒྱག་རོགས། ཞེས་སོགས་ཀྱི་གསུང་བཤད་གནང་།
ཉིན་རྒྱབ་སུད་སི་གཞོན་ནུ་ལྷན་ཚོགས་ཀྱིས་བཞུགས་མོལ་ཚོགས་འདུ་ཞིག་གོ་སྒྲིག་ཞུས་ཐོག་བཀའ་ཁྲི་མཆོག་གིས་བོད་མི་གཞོན་སྐྱེ་ཚོས་བོད་མི་ཡིན་བསམ་པའི་སེམས་ལ་སྤོབས་པ་དགོས་རྒྱུ་གལ་ཆེ་ཡིན་པ་དང་སེམས་ཤུགས་དེའི་ཐོག་ནས་དེ་སྔ་བོད་པའི་མི་རབས་རྒན་པ་ཚོས་དཀའ་ལས་བརྒྱབ་པ་དེར་མིག་དཔེ་ཡར་ལྟ་ཐོག་རང་འཁྲིའི་སྐབས་བབ་ཀྱི་ལས་འགན་ཤེས་ཡོན་དང་བོད་པའི་རིག་གཞུང་ཐོག་སློབ་སྦྱོང་ཧུར་བརྩོན་བྱ་རྒྱུ་ཧ་ཅང་གལ་ཆེན་པོ་ཡིན་པ་མ་ཟད། སུད་སི་བོད་མིའི་སྤྱི་ཚོགས་དང་སུད་སི་གཞུང་གི་ལས་དོན་ཐོག་ཆ་ཤས་ལེན་རྒྱུ་གལ་ཆེ་ཡིན་ཞེས་གསུངས། ཕྱོགས་མཚུངས་བཀའ་ཁྲི་མཆོག་གིས་ཉེ་ལམ་རྡ་སར་བཙན་བྱོལ་བོད་མིའི་སློབ་གྲྭ་ཁག་གི་འཛིན་སྐྱོང་འགན་འཛིན་རྣམས་ལྷན་ཚོགས་ཐོག་གཞི་རྩའི་ཤེས་ཡོན་གྱི་སྒྲོམ་གཞིར་ཡར་རྒྱས་གཏོང་རྒྱུའི་སྐོར་བགྲོ་གླེང་ལྷུག་པོ་བྱུང་ཚུལ་གསལ་བཤད་གནང། དེ་བཞིན་བོད་མི་གཞོན་སྐྱེས་ཚོས་རིགས་གཅིག་རྐང་འཛིན་ཐོག་ཤུགས་བརྒྱབ་སྟེ་བོད་ཀྱི་ཆོས་དང་རིག་གཞུང་སྲུང་སྐྱོབ་ཆེད་ཞབས་འདེགས་ཞུ་དགོས་སྐོར་སོགས་ཀྱི་གསུང་བཤད་གནང་ཡོད་པ་བཅས། །
