༢༠༡༡ ཟླ་ ༡༡ ཚེས་ ༢༡ རེས་གཟའ་ཟླ་བ།
༄༅། འདི་གར་ཐེ་ཝན་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ཟླ་ ༡༡ ཚེས་ ༢༠ རེས་གཟའ་ཉི་མའི་ཕྱི་དྲོར་ཐེ་ཝན་བོད་ཀྱི་སྐུ་ཚབ་དོན་ཁང་གི་མཆོད་ཁང་དུ་ཐེ་ཝན་དུ་གནས་སྡོད་བོད་མི་ཁག་གཅིག་མཉམ་འཛོམས་ཐོག ཉེ་ཆར་བོད་ཁམས་རྟའུ་ཁུལ་ནས་བཙུན་མ་དཔལ་ལྡན་ཆོས་མཚོ་ལགས་ཀྱིས་རང་ལུས་མེར་སྲེག་བཏང་བར་མཆོད་འབུལ་སྨོན་ལམ་ཞིག་ཚོགས་ཡོད། གོང་ཚེས་ཉིན་གཙོས་གསེར་ཁྲི་རིན་པོ་ཆེ་དབུ་བཞུགས་ཐོག ཐེ་ཝན་དུ་གནས་སྡོད་བོད་རིགས་ཚོགས་པ་དང་། ས་གནས་བོད་ཀྱི་གཞོན་ནུའི་ཚོགས་མི་སོགས་ནས་རྩ་རྒྱུད་བླ་མ་རྣམས་ལ་གསོལ་འདེབས་དང་། འདས་པོ་རྣམས་ལ་སྨོན་ལམ། དཀར་ཕྱོགས་སྐྱོང་བའི་སྲུང་མ་རྣམས་ལ་འཕྲིན་སྐུལ། མ་ཎི་ཡིག་དྲུག་གསོག་སྒྲུབ་བཅས་གནང་ཡོད།
སྨོན་ལམ་གྲུབ་རྗེས་ཚོགས་མི་རྣམས་བཞུགས་མོལ་ཚོགས་འདུ་ཞིག་སྐོང་ཚོགས་གནང་སྟེ་མུ་མཐུད་ཐེ་ཝན་ནང་བོད་དོན་གྱི་ལས་འགུལ་སྤེལ་ཕྱོགས་སྐོར་ལ་བཀའ་བསྡུར་ལྷུག་པོ་གནང་བ་མ་ཟད། བོད་མདོ་སྨད་རྔ་བ་ཁུལ་བཙུན་མ་བསྟན་འཛིན་དབང་མོ་ལགས་ཀྱིས་རང་ལུས་མེར་སྲེག་བཏང་སྟེ་ཉིན་ཞག་ཞེ་དགུ་དང་བསྟུན་ཆུ་ཚོད་ ༤༩ རིང་ཟས་བཅད་ངོ་རྒོལ་དང་མཆོད་འབུལ་སྨོན་ལམ་ཞུ་རྒྱུ། ཕྱི་ཟླ་ ༡༢ ཚེས་ ༢ རེས་གཟའ་པ་སངས་དགོང་དྲོ་ཆུ་ཚོད་ ༧ ཐོག་གསར་འགོད་ལྷན་ཚོགས་ཀྱི་ལས་འགུལ་འགོ་འཛུགས་གནང་རྒྱུ་དང་། ཕྱི་ཚེས་ ༤ རེས་གཟའ་ཉི་མ་དགོང་དྲོ་ཆུ་ཚོད་ ༦ པ་ནས་ ༨ བར་མཆོད་འབུལ་སྨོན་ལམ་གསུང་འདོན་གནང་རྒྱུའི་ཐུགས་གཏན་འཁེལ་ཡོད་པ་བཅས།
