༢༠༡༡ ཟླ་ ༡༡ ཚེས་ ༧ རེས་གཟའ་ཟླ་བ།
༄༅། །༸གོང་ས་མཆོག་གིས་ཉི་ཧོང་གི་གྲོང་ཁྱེར་སན་ཌའི་ནང་དུ་རྟེན་གཞི་བྱས་པའི་སེ་ཝའི་གེ་ཀུན་ནང་པའི་སློབ་གྲྭ་ཆེ་བ་ཞིག་(Seiwa Gakuen Buddhist high School)ཡོད་པ་དེར་ཆིབས་སྒྱུར་བསྐྱངས་ཏེ་དགེ་ལས་སློབ་ཕྲུག་ཚོར་བཀའ་སློབ་སྩལ། སྐབས་དེར་ཐོག་མར་༸གོང་ས་མཆོག་སློབ་གྲྭའི་ཚོགས་ཁང་དུ་ཆིབས་སྒྱུར་བསྐྱངས་སྐབས་ཉི་ཧོང་དགེ་ལས་སློབ་ཕྲུག་ཚོས་ཆར་པ་སིམ་སིམ་འབབ་བཞིན་པའི་ཁྲོད་ལག་ཏུ་འཚམས་འདྲིའི་སྦྱར་ཡིག་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད། དེ་རྗེས་ཚོགས་ཁང་དུ་༸ཞབས་སོར་འཁོད་མཚམས་གསེར་བཟང་གི་སྟོན་པ་ཐུབ་པའི་དབང་པོའི་སྐུ་བརྙན་བཤམས་པའི་སྡིངས་ཆའི་མདུན་དུ་སློབ་ཕྲུག་ཚོས་ཉི་ཧོང་སྐད་དུ་ཤེས་རབ་སྙིང་པོ་བཏོན། དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། མ་འོངས་པ་དེ་ཁྱེད་ཚོའི་ལག་ཏུ་ཡོད། དུས་རབས་ ༢༡ འདིར་འཛམ་གླིང་ལ་འཕྲད་བཞིན་པའི་དཀའ་ངལ་མང་པོ་ཞིག་ནི་འདས་པའི་དུས་རབས་ ༢༠ ནང་མིའི་རྣམ་དཔྱོད་བེད་སྤྱོད་ལོག་པ་བཏང་བ་ལས་བྱུང་བ་ཞིག་ཡིན། དྲག་པོའི་ལམ་ནས་དཀའ་ངལ་ནམ་ཡང་སེལ་མི་ཐུབ། དེར་བརྟེན་འཚེ་བ་མེད་པའི་ལངས་ཕྱོགས་དེ་དོན་སྙིང་ལྡན་པའི་ཐབས་ལམ་ཞིག་ཡིན། ང་ཚོས་རྒྱལ་མཚམས་མེད་པར་གོ་ལ་ཧྲིལ་པོ་ང་ཚོ་ཞེས་གཅིག་གྱུར་གྱི་བསམ་བློ་ཞིག་བསྐྲུན་ཐུབ་རྒྱུའི་འཆར་སྣང་ཞིག་ངེས་པར་བསྐྲུན་དགོས། དེ་ལྟར་བྱུང་ན་ཞི་བདེ་དང་བདེ་སྐྱིད་ལྡན་པའི་འཛམ་གླིང་ཞིག་བསྐྲུན་ཐུབ། དེ་འདྲ་ཞིག་ཡོང་བར་རྣམ་དཔྱོད་གཅིག་པུས་མ་འདང་པར་རྣམ་དཔྱོད་དེ་དང་འབྲེལ་བའི་ཐོག་ནས་བྱམས་བརྩེའི་བསམ་པས་ཟིན་ཐུབ་པ་ཞིག་ངེས་པར་དུ་དགོས་ཞེས་བཀའ་སློབ་སྩལ། གཞན་ཡང་སྐབས་དེར་སློབ་མ་ཞིག་གིས་མགོན་པོ་གང་མཆོག་གི་སྐུའི་འཕྲོད་བཞེས་ཀྱི་གནས་སྟངས་ཧ་ཅང་གསལ་ཐང་ཡོད་པ་དེའི་རྒྱུ་མཚན་ཇི་ཡིན་ཞེས་ཞུས་པར། ༸གོང་ས་མཆོག་གིས་བཀའ་ལན་སྩལ་དོན། ཚན་རིག་སྨན་པའི་གཞུང་ལུགས་ལྟར་ན་ལུས་པོའི་འཕྲོད་བསྟེན་གྱི་གནས་སྟངས་ཡོངས་རྫོགས་ཀྱི་འབྱུང་ཁུངས་དེ་སེམས་ཀྱི་ཞི་བདེ་ཡིན་པ་བརྗོད་ཡོད། དཀའ་ངལ་ནི་མི་ཚང་མར་ཡོད་ཀྱང་དེར་ལྟ་ཚུལ་མི་འདྲ་བའི་ཐོག་ནས་སྙིང་སྟོབས་ཆེ་ཆུང་གི་ཁྱད་པར་ཡོང་བཞིན་ཡོད་ཅེས་བཀའ་ལན་སྩལ།
ཡང་སློབ་མ་ཞིག་གིས་ཆོས་ཀྱི་གནད་དོན་སྐོར་གྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། ཉི་ཧོང་ལ་རྡུལ་ཕྲན་མཚོན་ཆས་གནོད་སྐྱོན་གྱིས་དངོས་སུ་ཉམས་མྱོང་བྱུར་བར་བརྟེན་རྡུལ་ཕྲན་མཚོན་ཆར་ངོ་རྒོལ་གྱི་ལས་འགུལ་དེ་ཡུལ་འདིར་ཧ་ཅང་ཤུགས་ཆེན་པོ་ཡོད། ཁྱེད་ཚོས་ཕྱི་དངོས་པོའི་མཚོན་ཆ་ཕྱིར་བསྡུ་བྱ་རྒྱུའི་ལས་འགུལ་དེ་སྣེ་ཁྲིད་ཐུབ་པ་ཞིག་དགོས། དེ་འདྲ་ཡོང་བར་ཐོག་མར་སེམས་ནང་གི་འཚེ་བའི་བསམ་པ་དེ་ཕྱིར་བསྡུ་བྱེད་དགོས། ཞེས་བཀའ་ལན་སྩལ། ཡང་སློབ་མ་ཞིག་གིས་མི་གཞན་གྱིས་རང་ལ་འཛིན་སྟངས་ཤིག་དང་མཐོང་སྣང་ཞིག་ཡོད་པ་དང་རང་གིས་རང་ལ་འཛིན་པའི་བདག་འཛིན་དེ་གཉིས་ལས་བདག་འཛིན་ངོ་མ་གང་ཡིན་གྱི་དྲི་བ་ཕུལ་བར། ༸གོང་ས་མཆོག་གིས་སྟོང་ཉིད་སྐོར་བཀའ་སློབ་མདོར་ཙམ་སྩལ་བ་དང་སྦྲགས་བཀའ་ལན་སྩལ་ཡོད་པ་བཅས།།
