༢༠༡༡ ཟླ་ ༡༠ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༨ ཉིན་ཨ་རིའི་སྲིད་འཛིན་གྱི་ཕོ་བྲང་དཀར་པོའི་མགྲིན་ཚབ་པས་ཉིན་རེའི་གསར་འགོད་གསལ་བསྒྲགས་ཤིག་སྤེལ་ཡོད། སྐབས་དེར་བོད་ནང་གི་ཛ་དྲག་གི་གནས་སྟངས་ཐོག་ཨ་རིའི་གཞུང་གིས་ལངས་ཕྱོགས་སྐོར་གསུང་ཡོད་པ་མ་ཟད། སྐབས་དེར་གསར་འགོད་པས་ཨ་རིའི་སྲིད་གཞུང་གིས་རྒྱ་ནག་གཞུང་ལ་བོད་ནང་རང་ལུས་མེར་སྲེག་བཏང་བའི་དོན་རྐྱེན་སྐོར་གླེང་ཡོད་མེད་སྐོར་གྱི་དྲི་བ་ཕུལ་བར་མགྲིན་ཚབ་པས་གསུང་དོན།
ང་ཚོས་བོད་ཟི་ཁྲོན་ཞིང་ཆེན་གྱི་རྔ་པ་ཀིརྟི་དགོན་པའམ་ཉེ་འགྲམ་ས་ཁུལ་དུ་འདི་ལོ་ཕྱི་ཟླ་ ༣ ནས་དགེ་འདུན་པ་དང་བཙུན་མ་བཅས་ཁྱོན་བོད་མི་དགུས་རང་ལུས་མེར་སྲེག་བཏང་བའི་དོན་རྐྱེན་དེར་སེམས་ཚབ་ཧ་ཅང་ཡོད་པར་བརྟེན།  རྒྱ་ནག་གཞུང་དང་ལྷན་གནད་དོན་དེའི་སྐོར་གླེང་སློང་བྱས་ཡོད། བྱ་སྤྱོད་དེས་བོད་མི་ཚོའི་འགྲོ་བ་མིའི་ཐོབ་ཐང་དང་ཆོས་དད་རང་དབང་གི་གནས་སྟངས་ཐད་ཁོང་ཁྲོ་དང་བསུན་གཙེར་བཟོ་བཞིན་ཡོད་པའི་ཚོར་སྣང་ཤུགས་ཆེ་བ་ཡོད་པ་ཧ་ཅང་གསལ་པོ་རེད། ང་ཚོས་རྒྱ་ནག་གཞུང་ལ་བོད་མི་ཚོའི་འགྲོ་བ་མིའི་ཐོབ་ཐང་གིས་གཙོས་ཞི་བའི་ལམ་ནས་རྒྱལ་སྤྱིའི་ངོས་འཛིན་གནང་བའི་ཐོབ་ཐང་དགོས་པའི་རེ་འདུན་འདོན་མཁན་གྱི་རྒྱ་ནག་མི་མང་ཚོའི་ཐོབ་ཐང་ལ་སྲུང་བརྩི་བྱེད་དགོས་པའི་རེ་འདུན་བཏོན་ཡོད་པ་མ་ཟད།  ད་ལྟ་རྒྱ་ནག་གཞུང་གིས་བོད་རིགས་གནས་སྡོད་ཀྱི་ས་ཁུལ་ཁག་གི་ནང་འཛིན་བཞིན་པའི་སྲིད་བྱུས་དེས་བོད་མི་ཚོར་དཀའ་ངལ་བཟོ་བཞིན་པར་བརྟེན།  སྲིད་བྱུས་དེར་བསྒྱུར་བཅོས་ཐོག་བོད་མིའི་ཆོས་དང་རིག་གཞུང་སྐད་ཡིག ངོ་བོ་བཅས་སྲུང་སྐྱོབ་བྱེད་དགོས་པ་རྒྱ་ནག་གཞུང་ལ་རེ་འདུན་བཏོན་ཡོད་ཅེས་སོགས་འཁོད་ཡོད།