༢༠༡༡ ཟླ་ ༡༠ ཚེས་ ༧ རེས་གཟའ་པ་སངས།
༄༅།  །འདི་གར་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༩ ཚེས་ ༡༥ བར་གྱི་དུས་ཡུན་ཟླ་བ་དྲུག་རིང་ཨ་རི་དང་ཁེ་ཎ་ཌའི་ཁྱབ་ཁོངས་བོད་མི་རྣམས་ཀྱི་དང་བླངས་དཔྱ་དངུལ་ལག་དེབ་གསར་པ་བཟོས་པ་དང་།  ནོར་བཅོས་བཅས་ཀྱི་གནས་སྟངས་ཇི་ཆགས་འདི་ཚེས་ ༤ ཉིན་གནས་ཚུལ་སྤེལ་ཟིན་པ་ལྟར། དཔལ་འབྱོར་ལས་ཁུངས་ནས་དཔྱ་དངུལ་འབུལ་དུས་གཏན་འབེབས་ཀྱི་དུས་བཀག་ནི་ལོ་ལྟར་ཕྱི་ཟླ་ ༦ ཚེས་ ༡ ནས་འཆར་ལོའི་ཕྱི་ཟླ་ ༥ ཚེས་ ༣༡ ཡིན་ཞིང་།  ཕྱི་ལོ་ ༢༠༡༠ ལོར་ ༢༠༡༠ ཕྱི་ཟླ་ ༦ ཚེས་ ༡ ནས་ ༢༠༡༡ ཕྱི་ཟླ་ ༥ ཚེས་ ༣༡ བར། ཨ་མི་རི་ཀ་དང་།  ཁེ་ཎ་ཌའི་ཁྱབ་ཁོངས་བོད་མི་ཚོའི་དཔྱ་དངུལ་འབུལ་འབབ་ཁྱོན་བསྡོམས་ཨ་སྒོར་ ༨༨༢༨༦༢།༡༦ ཟིན་ཡོད། ཨ་རི་དང་ཁེ་ཎ་ཌའི་ཁྱབ་ཁོངས་སུ་རོབ་རྩིས་བོད་མིའི་གྲངས་འབོར་ ༡༤༩༧༤ ཡོད་པ་དེའི་ཁོངས་ཉུང་མཐར་རང་ལོ་ ༦ མན་གྱི་བྱིས་པ་བརྒྱ་ཆ་བདུན་ཡོད་པའི་དབང་དུ་བཏང་ན་དཔྱ་དངུལ་འབུལ་དགོས་པའི་མི་འབོར་ ༡༣༩༢༦  ཡོད་པའི་ཁོངས་ནས་དཔྱ་དངུལ་འབུལ་མཁན་མི་གྲངས་ ༨༡༦༩ བྱུང་ཡོད་པ་འདི་སྤྱིའི་མི་འབོར་གྱི་བརྒྱ་ཆ་ལྔ་བཅུ་ང་དགུ་ཟིན་གྱི་ཡོད། ཁོང་ཚོས་འདི་ལོ་ཕུལ་བའི་འབབ་ཨ་སྒོར་ ༨༨༢༨༦༢།༡༦ དེ་ནི་ཕྱི་ལོ་ ༢༠༠༩ ལོའི་དཔྱ་དངུལ་བསྡོམས་འབོར་དང་བསྡུར་ན་ཨ་སྒོར་ ༡༦༡༢༣༨།༤༢ ཙམ་འཕར་སྣོན་བྱུང་ཡོད། འདི་ལོའི་དཔྱ་དངུལ་བསྡུ་རྒྱུའི་ལས་དོན་ཐོག་ཐུགས་འཁུར་ཆེ་བཞེས་གནང་མཁན་དང་། སྐུ་ཚབ་དོན་ཁང་གི་ལམ་སྟོན་ལ་བརྩི་བཀུར་གྱིས་འབུལ་འབབ་དུས་ཐོག་འབུལ་མཁན་ས་གནས་བོད་རིགས་སྤྱི་མཐུན་ཚོགས་པ་རྣམས་ལ་སྐུ་ཚབ་དོན་གཅོད་ཁང་ནས་ཐུགས་རྗེ་ཆེ་ཞུ་རྒྱུ་དང་། དང་བླངས་དཔྱ་དངུལ་ཆད་མེད་དུས་ཐོག་འབུལ་མཁན་བོད་མི་རྣམས་ལ་དམིགས་བསལ་གྱིས་བསྔགས་བརྗོད་ཞུས་ཡོད། དཔྱ་དངུལ་དང་འབྲེལ་བའི་ལས་དོན་འགན་ཁུར་གནང་མཁན་སྐུ་ཚབ་དོན་ཁང་གི་རྩིས་པ་བདེ་ཆེན་ཆོས་སྐྱིད་ལགས་ཀྱིས་ངོ་སྤྲོད་གནང་བར་གཞིགས་ན། ས་གནས་སོ་སོའི་རྒྱུན་ལས་ནས་ཐུགས་འཁུར་ཆེ་བཞེས་གནང་བཞིན་ཡོད་པར་བློ་ཡིད་འཚིམས་ནས་མ་བཞུགས་པར་ད་དུང་ཡང་དཔྱ་དངུལ་འབུལ་མཁན་མི་འབོར་འཕར་ཆ་ཡོང་རྒྱུར་འབད་བརྩོན་དགོས་པའི་འབོད་སྐུལ་གྱི་ཕྱག་བྲིས་ཤིག་ས་གནས་ཁག་གི་བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་ལ་བཏང་ཟིན་འདུག་པ་བཅས། །