༢༠༡༡ ཟླ་ ༡༠ ཚེས་ ༢༧ རེས་གཟའ་ཕུར་བུ།
༄༅། །བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སུད་སིའི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་སྡེ་ཚན་དང་ཨེ་ཤི་ཡའི་མངའ་ཁུལ་གྱི་འགྲོ་བ་མིའི་ཐོབ་ཐང་སྲུང་སྐྱོབ་སྡེ་ཚན་གྱི་འབྲེལ་ཡོད་དབུ་ཁྲིད་ཁག་གཅིག་དང་མཇལ་གནང་སྟེ་བོད་ནང་མུ་མཐུད་དཀའ་ངལ་ཡོད་པའི་གནས་ཚུལ་གསལ་བཤད་གནང་བ་དང་སྦྲགས་རྒྱལ་སྤྱིའི་རྟོག་ཞིབ་ཚོགས་པ་ཞིག་བོད་ནང་མངག་གཏོང་དགོས་པའི་འབོད་སྐུལ་ཞུས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༡ ཟླ་ ༡༠ ཚེས་ ༢༦ ཉིན་བོད་མི་མང་སྤྱི་འཐུས་ཚོགས་གཙོ་མཆོག་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སོགས་ཀྱི་དཔོན་རིགས་ཁག་གཅིག་དང་མཇལ་འཕྲད་བྱུང་བའི་གནད་དོན་སྐོར་ལ་གསུང་དོན། ད་ལྟའི་བོད་ནང་གི་ཛ་དྲག་གནས་ཚུལ་གང་ཡོད་པ་ཆ་ཚང་ཁོང་རྣམ་པས་ཤེས་ཀྱི་འདུག འོན་ཀྱང་ང་ཚོས་འབོད་སྐུལ་ཞུ་རྒྱུ་དེ་སྤྱིར་བཏང་འཛམ་གླིང་མཉམ་འབྲེལ་རྒྱལ་ཚོགས་ཀྱིས་གནང་དང་གནང་བཞིན་ཡོད་ཀྱང། གཞིས་ལུས་རྒྱ་ཆེའི་མི་མང་དང་ང་ཚོ་བཙན་བྱོལ་ནང་ཡོད་པའི་བོད་མི་ཚོས་མཉམ་འབྲེལ་རྒྱལ་ཚོགས་ནས་གང་ཞིག་གནང་གི་ཡོད་མེད་ཞིབ་ཕྲ་མ་ཤེས་པ་ཡིན་ཡང་མཉམ་འབྲེལ་རྒྱལ་ཚོགས་ནས་ད་ལྟ་བོད་ནང་གི་ཛ་དྲག་གནས་སྟངས་ཐོག་ལངས་ཕྱོགས་དང་བསམ་ཚུལ་གང་ཞིག་ཡོད་ཀྱང་དེ་དག་ཡོངས་གྲགས་བྱས་ཏེ་གསུང་དགོས་རྒྱུ་གལ་ཆེན་པོ་འདུག ཅེས་ཞུས་པ་ཡིན། དེ་བཞིན་དེ་རིང་ཁ་སང་འགྲོ་བ་མིའི་ཐོབ་ཐང་ལྷན་ཚོགས་ཀྱི་སྤྱི་ཁྱབ་དྲུང་ཆེས་གནས་ཚུལ་དེ་དག་ཡོངས་རྫོགས་འབྲེལ་ཡོད་ཚོར་ཞུས་ཡོད། ལས་བྲེལ་དབང་གིས་བསྒྲགས་གཏམ་སྤེལ་ཐུབ་མེད་པ་རེད་མ་གཏོགས་གནས་ཚུལ་ཆ་ཚང་ཤེས་ཀྱི་ཡོད་པ་མ་ཟད། རྒྱ་ནག་གཞུང་ལ་ཁོང་རྣམ་པའི་འབྲེལ་ལམ་བརྒྱུད་ནས་གནོན་ཤུགས་སྤྲོད་རྒྱུའི་ལས་ཀ་དེ་དག་བྱེད་ཀྱི་ཡོད་པ་རེད་ལ་མ་འོངས་པར་ཡང་བྱེད་ཀྱི་རེད། འདས་པའི་གནས་ཚུལ་ལ་ཆ་མཚོན་ན་བོད་ནང་གི་གནས་ཚུལ་དང་འབྲེལ་བའི་གསར་འགོད་བསྒྲགས་གཏམ་དེ་འདྲ་སྤེལ་ཡོད། དེའི་ཐོག་སེམས་འཁྲལ་བྱེད་མི་དགོས་ཞེས་གསུངས་བྱུང་། དེ་བཞིན་ཚོགས་གཙོ་མཆོག་གིས་རྒྱལ་སྤྱི་ནས་བོད་དོན་ལ་ཐུགས་སྣང་དང་འབྲེལ་བོད་ནང་རྟོག་ཞིབ་ཚོགས་ཆུང་ཞིག་མངག་གཏོང་དགོས་པའི་འབོད་སྐུལ་ཞུས་སྐོར་གསུང་དོན། བར་ལམ་གནས་ཚུལ་བྱུང་བའི་ཐོག་ང་ཚོས་འབོད་སྐུལ་ཞུ་དགོས་དོན་གཙོ་བོ་དེ་རྔ་པ་ཀིརྟི་དགོན་པ་དང་འབྲེལ་བ་ཡོད་པ་དེ་དག་ཆོས་དད་རང་དབང་དང་ཐད་ཀར་འབྲེལ་བ་ཆགས་ཡོད་པར་བརྟེན། ཁོང་ཚོར་གནས་ཚུལ་དེ་དག་འགྲེལ་བཤད་ཞུས་པའི་ཐོག་ནས་བྱུང་ན་བོད་ནང་རང་དབང་ཅན་གྱི་རྟོག་ཞིབ་ཚོགས་ཆུང་ཞིག་རྒྱལ་ཚོགས་དབུ་བཞུགས་ཐོག་ནས་གཏོང་གནང་ཡོང་བའི་འབོད་སྐུལ་ཞུས་ཡོད། རྩ་བའི་མཉམ་འབྲེལ་རྒྱལ་ཚོགས་འཛམ་གླིང་གི་རྒྱལ་ཁབ་ཚང་མའི་མཐུན་ཚོགས་ཆེ་ཤོས་དེ་ཆགས་ཡོད། དེར་བརྟེན་རང་དབང་ཅན་གྱི་རྟོག་ཞིབ་ཚོགས་པ་དེ་འདྲ་ཡོང་བཅུག་དང་མ་བཅུག་ཅེས་པ་དེ་རྒྱལ་ཁབ་དེར་རག་ལུས་ཡོད་པའི་གནས་སྟངས་ཤིག་ཆགས་ཡོད། འོན་ཀྱང་རྒྱ་ནག་གཞུང་ནས་ངོས་ལེན་མ་བྱས་པ་ཡིན་ན། མཉམ་འབྲེལ་རྒྱལ་ཚོགས་ནས་སྐུ་ཚབ་དེ་འདྲ་གཏོང་ཐུབ་རྒྱུ་མེད་པ་ཞིག་རེད་འདུག ཅེས་གསུངས་ཡོད་པ་བཅས། །