༢༠༡༡ ཟླ་ ༡༠  ཚེས་ ༡ རེས་གཟའ་སྤེན་པ།

༄༅། །སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་ཕྱི་ལོ་ ༢༠༡༡ ཟླ་ ༩ ཚེས་ ༡༦ ནས་འགོ་འཛུགས་ཀྱིས་ཕྱི་ཟླ་ ༡༠ ཚེས་ ༡ ཉིན་རྒྱལ་ཁའི་ངང་ནས་ལེགས་གྲུབ་ཟིན་ཡོད་ཅིང་། ཚོགས་དུས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། དེ་རིང་སྐབས་བཅོ་ལྔ་པའི་ཚོགས་དུས་གཉིས་པའི་ཉིན་མཐའ་མར་ཚོགས་གཙོའི་མཇུག་བསྡོམས་ཀྱི་གཏམ་བཤད་བྱེད་དགོས་ཀྱི་ཡོད། གཏམ་བཤད་ནང་གཙོ་བོ་ཐེངས་འདིའི་གྲོས་ཚོགས་ནང་ལས་རིམ་ག་རེ་བྱུང་བ་དང་གྲུབ་འབྲས་ག་རེ་ཐོན་ཡོད། དེ་དག་གི་བསྡོམས་ཤིག་རྒྱག་དགོས་ཀྱི་ཡོད། དེ་དང་ཆབས་ཅིག་ཚོགས་གཙོ་སྦྲེལ་པོའི་ངོས་ནས་ཐུགས་སྣང་དང་མ་འོངས་པའི་ལས་དོན་བྱེད་ཕྱོགས་ཐོག་ལ་གནད་དོན་ཁག་གཅིག་ཞུས་ན་བསམས་བྱུང་། ད་རེས་ཀྱི་གྲོས་ཚོགས་འདིའི་ནང་ང་ཚོས་ལས་རིམ་དང་པོ་དེ་མྱ་ངན་གུས་འདུད་ཀྱི་གྲོས་འཆར་བྱུང་བ་རེད། གྲོས་ཚོགས་འདིའི་ནང་མྱ་ངན་གུས་འདུད་ཀྱི་གྲོས་འཆར་གསུམ་འཁྱེར་དགོས་བྱུང་ཡོད།  སྤྱིར་སྐྱེས་པ་ཐམས་ཅད་འཆི་འགྲོ་རྒྱུ་ཡིན། འོན་ཀྱང་ག་དུས་འཆི་མིན་དེ་སུ་གཅིག་གིས་ཤོད་ཐུབ་ཐབས་མེད། དེར་བརྟེན་ང་ཚོ་མི་ཡུལ་འདིར་སྡོད་རིང་ཕན་ཚུན་ཡིད་ཆེས་ཐོག་ལས་ཀ་བྱེད་དགོས་རེད་བསམ་གྱི་ཡོད། དེ་བཞིན་བཀའ་བློན་གྱི་འོས་འདེམས་དེ་ཡང་སྤྱི་མོས་ཐོག་ནས་འོས་འདེམས་བྱུང་བར་ཚོགས་གཙོའི་ངོས་ནས་གཟི་བརྗིད་ལྡན་པ་ཞིག་བྱུང་བ་རེད་ཅེས་ཞུ་བཞིན་ཡོད། འཛིན་སྐྱོང་བཀའ་ཤག་ངོས་ནས་གྲོས་ཚོགས་འདིའི་ནང་འཛིན་སྐྱོང་ལ་གྲོས་ཚོགས་ངོས་ནས་དགོས་ངེས་མཐུན་རྐྱེན་རག་གི་ཡོད་པའི་ཚོར་སྣང་ཤུགས་ཆེན་པོའི་ཐོག་གྲོས་ཚོགས་ནང་གསུངས་སོང་བས་ང་ཚོའི་གཟི་བརྗིད་རེད་བསམ་གྱི་ཡོད། ང་རང་གིས་ནམ་རྒྱུན་བསམ་བློ་གཏོང་སྟངས་བྱས་ན་བཀའ་ཁྲི་སུ་ཞིག་སླེབས་ཀྱང་དེས་བཀའ་བློན་གཞན་སུ་ཞིག་དགོས་ཀྱི་ཡོད་གསུངས་པ་ཡིན་ནའང། ཕུལ་དགོས་རྒྱུ་དེ་གྲོས་ཚོགས་ཀྱི་ལས་འགན་རེད་སྙམ་གྱི་ཡོད། འོན་ཀྱང་སྐབས་རེ་བཀག་འགོག་བྱེད་རྒྱུའི་གནས་ཚུལ་དེ་འདྲ་ཡོང་མི་སྲིད་པ་མིན།

བཀའ་བློན་གཞན་འོས་འདེམས་བྱ་རྒྱུའི་ལས་རིམ་ཐོག་ལ་གྲོས་ཚོགས་ཀྱིས་མཐུན་འགྱུར་ཞུ་ཐུབ་པ་མ་ཟད། ལས་དོན་དེ་ཡང་དུས་ཐུང་ཞིག་ནང་བསྒྲུབས་ཐུབ་པ་དེ་དག་ཧ་ཅང་ཡག་པོ་བྱུང་སོང་སྙམ་བཞིན་ཡོད། བཀའ་བློན་ཁྲི་པས་བཀའ་ཤག་གི་གསལ་བཤད་ཐོག་ལ་བགྲོ་གླེང་བྱུང་བ་རྣམས་ལ་ལན་འདེབས་གནང་བ་བརྒྱུད་ནས་བཀའ་ཤག་སྐབས་བཅུ་བཞི་པས་སྤྱི་ཡོངས་ཀྱི་སྲིད་བྱུས་དང་དགོངས་པ་བཞེས་སྟངས་དེའི་ཐོག་གསལ་པོ་དེ་ཙམ་ཞིག་ཆགས་མེད་པ་ཡིན་རུང་། ད་ལྟའི་གནས་སྐབས་སུ་གསལ་པོ་ཆགས་ཐུབ་པ་དེ་གྲོས་ཚོགས་ཀྱི་འཐུས་མི་རྣམ་པ་ཚོ་དང་ལྷག་པར་རྒྱ་ཆེའི་མང་ཚོགས་ལ་ངོ་སྤྲོད་ཐུབ་པ་དེ་གྲོས་ཚོགས་འདི་བརྒྱུད་ནས་བྱུང་ཡོད། དེ་བཞིན་ཐེངས་འདིའི་གྲོས་ཚོགས་ནང་ང་ཚོར་བསྐུར་ཡོད་པའི་ལས་འགན་ཁྲིམས་བཟོ་ལྷན་ཚོགས་རེད། ཁྲིམས་བཟོའི་ལས་དོན་ཕལ་ཆེར་ལོ་རྒྱུས་ཐོག་ནས་ད་རེས་གྲོས་ཚོགས་འདིའི་ནང་མང་ཤོས་ཆགས་ཡོད། ཁྲིམས་བཟོའི་ལས་དོན་གཅིག་པུའི་ཐོག་ལ་ཤོག་གྲངས་དགུ་བརྒྱ་ལྷག་ཙམ་ཞིག་གྲོས་ཚོགས་ནང་བཀྲམ་ཡོད། སྒྲིག་གཞི་ཁག་ཉི་ཤུ་རྩ་བཞི་དང་བཅའ་ཁྲིམས་ལེའུ་དོན་ཚན་ཁག་གཅིག་གང་ལྟར་བཅའ་ཁྲིམས་དང་སྒྲིག་གཞི་བསྡོམས་པའི་ཉི་ཤུ་རྩ་ལྔའི་ཐོག་ཁྱོན་ཡོངས་ནས་བསྐྱར་བཅོས་དང་བཟོ་བཅོས་བྱེད་དགོས་རྒྱུ་དེ་དག་ཆ་ཚང་བསྒྲུབས་ཐུབ་པ་བྱུང་བ་དེ་གྲོས་ཚོགས་འདིའི་གཟི་བརྗིད་ཡིན་པ་མ་ཟད། ང་ཚོར་བསྐུར་བའི་ལས་འགན་ཆེན་པོ་ཞིག་ཀྱང་བསྒྲུབས་རེད་བསམ་བཞིན་ཡོད། རྩ་བའི་མི་མང་ནང་ལ་ཡིན་ནའང་ཁྲིམས་སྒྲིག་ལ་དོ་སྣང་མེད་མཁན་དེ་འདྲ་ཡིན་ན། ཁྲིམས་དང་སྒྲིག་གཞིའི་ལས་རིམ་དེ་བཞིན་ཉོབ་ཏོ་ལྟ་བུ་ཡོད། དངོས་གནས་དྲང་གནས་དོ་སྣང་སྤྲོད་མཁན་ཞིག་ཡིན་ན། ད་རེས་གྲོས་ཚོགས་ཀྱི་ལས་རིམ་ཁྲིམས་དང་སྒྲིག་གཞི་བརྗོད་པ་དང་པོ། གཉིས་པ། གསུམ་པ་ཆ་ཚང་ལྟ་རྒྱུའི་གོ་སྐབས་བྱུང་ཡོད་ན། བཙན་བྱོལ་བོད་མིའི་སྒྲིག་འཛུགས་འདི་སྒྲོམ་གཞི་གང་འདྲ་ཞིག་གི་ཐོག་གནས་ཡོད་པ་དང་སྒྲོམ་གཞི་དེ་ཚོའི་ཆ་ལག་དང་ལས་དོན་གང་འདྲ་བྱེད་ཀྱི་ཡོད་པ་རྣམས་ཆ་ཚང་ཞིག་ཤེས་ཐུབ་རྒྱུ་དང་སློབ་སྦྱོང་བྱ་རྒྱུའི་གོ་སྐབས་ཤིག་བྱུང་ཡོད། ད་རེས་གྲོས་ཚོགས་འདི་བརྒྱུད་ནས་གྲོས་ཚོགས་ཀྱི་འཐུས་མི་ཚང་མར་བཙན་བྱོལ་བོད་མིའི་སྒྲིག་འཛུགས་ཀྱི་ཁོངས་སུ་གཏོགས་པའི་སྒྲིག་འཛུགས་སྒྲིག་གཞི་གང་ཡོད་པ་དེ་དག་ཐུགས་ལ་ངེས་པ་བྱུང་ཡོད་པའི་ཡིད་ཆེས་ཞུ་བཞིན་ཡོད།

དེ་བཞིན་གྲོས་ཚོགས་ཀྱི་འཐུས་མི་ཡིན་པའི་ཆ་ནས་ཁྲིམས་དང་སྒྲིག་གཞི་བཟོ་མཁན་ང་ཚོ་རེད། དེ་ལག་ལེན་བསྟར་རྒྱུའི་འགན་འཁྱེར་དགོས་ཀྱི་ཡོད། དེར་བརྟེན་ད་རེས་གྲོས་ཚོགས་འདིའི་ནང་ཁྲིམས་བཟོའི་ལས་དོན་དེ་དག་ང་ཚོས་དུས་ཐོག་ཏུ་བསྒྲུབས་ཐུབ་པ་དེ་གཟི་བརྗིད་རེད། དེ་བཞིན་ཁྲིམས་བཟོའི་ལས་དོན་དང་འབྲེལ་བའི་ཁྲིམས་སྒྲིག་བསྐྱར་ཞིབ་ཚོགས་ཆུང་གིས་ཟླ་བ་གསུམ་བཞི་ནང་ཕྱག་ལས་ཧུར་ཐག་འབད་ཐག་གནང་འདུག ཅེས་སོགས་ཀྱི་གསུང་བཤད་གནང་སྟེ་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་རྒྱལ་ཁའི་ངང་ནས་ལེགས་གྲུབ་བྱུང་ཡོད་པ་བཅས། །