༢༠༡༡ ཟླ་ ༡༠ ཚེས་ ༢༩ རེས་གཟའ་སྤེན་པ།
༄༅། །ཉེ་ལམ་བོད་མདོ་སྨད་རྔ་པ་ཀིརྟི་དགོན་པ་གཙོ་བོར་གྱུར་བའི་བོད་ཀྱི་ས་ཁུལ་ཁག་གི་ནང་ད་བར་བོད་མི་སྐྱ་སེར་ཁྱོན་མི་གྲངས་ ༡༠ ཙམ་གྱིས་རང་ལུས་མེར་སྲེག་བཏང་སྟེ་རྒྱ་ནག་གཞུང་ལ་ངོ་རྒོལ་བྱས་པའི་དོན་རྐྱེན་བྱུང་བར་བརྟེན། ཕྱི་ལོ་ ༢༠༡༡ ཟླ་ ༡༠ ཚེས་ ༢༧ ཉིན་ཡུ་རོབ་གྲོས་ཚོགས་སུ་ཉེ་ལམ་བོད་མི་ཚོས་འུ་ཐུག་ཐབས་ཟད་ཀྱི་བྱ་སྤྱོད་དེ་རིགས་སྤེལ་དགོས་བྱུང་བའི་སྐོར་བགྲོ་གླེང་གནང་བ་མ་ཟད། སེམས་འཚབ་ཆེན་པོས་ཛ་དྲག་གི་གྲོས་ཆོད་གཅིག་ཀྱང་བཞག་ཡོད་པའི་ནང་འཁོད་དོན།
འདི་ལོའི་ཕྱི་ཟླ་གསུམ་པ་ནས་བཟུང་རྔ་པས་གཙོས་བོད་ཀྱི་ས་ཁུལ་ཁག་གཅིག་ནང་བོད་མི་སྐྱ་སེར་ཁག་གཅིག་གིས་རང་ལུས་མེར་སྲེག་བཏང་བའི་དོན་རྐྱེན་བྱུང་བར་ཡུ་རོབ་གྲོས་ཚོགས་ཀྱི་སེམས་འཚབ་ཧ་ཅང་ཆེན་པོ་ཡོད་ཅེས་སོགས་འཁོད་ཡོད། གཞན་ཡང་གྲོས་ཚོགས་སུ་བོད་དོན་བགྲོ་གླེང་སྐབས་རྒྱ་ནག་གཞུང་གིས་བོད་པའི་དགོན་སྡེ་ཁག་གི་ཐོག་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དེ་འཕྲལ་དུ་མཚམས་འཇོག་དགོས་སྐོར་དང།  དེ་བཞིན་བོད་ཀྱི་ས་ཁུལ་ཁག་ཏུ་རང་དབང་ཅན་གྱི་རྒྱལ་སྤྱིའི་གསར་འགོད་པ་དང་འགྲོ་བ་མིའི་ཐོབ་ཐང་རྟོག་ཞིབ་པ་རྣམས་ལ་བོད་ནང་གི་བོད་མི་ཚོའི་དངོས་ཡོད་དཀའ་ངལ་གྱི་གནས་སྟངས་ལ་ཞིབ་འཇུག་ཆེད་འགྲོ་བསྐྱོད་ཆོག་པ་དང། རྒྱ་ནག་གཞུང་གིས་ད་བར་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་བའི་བོད་པའི་དགེ་འདུན་པ་བརྒྱ་སྐོར་ཞིག་ཡོད་པ་ཁོང་རྣམས་ད་ལྟ་གང་དུ་ཡོད་མེད་ཀྱི་གནས་ཚུལ་ཞིབ་ཕྲ་གསལ་བཤད་དགོས་པའི་རེ་འདུན་ཡང་བཏོན་ཡོད།
ཕྱོགས་མཚུངས་གྲོས་ཚོགས་སུ་རྒྱ་ནག་གཞུང་གིས་བོད་མོ་ཚོར་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དེ་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་ཡོངས་སུ་འགལ་བ་ཞིག་ཡིན་པ་དང། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་ཆོས་དད་རང་དབང་ཡོད་པ་གསལ་པོར་འཁོད་ཡོད་སྐོར་གསལ་བཤད་གནང།  གཞན་ཡང་སྐབས་དེར་བོད་མི་ཚོའི་འདོད་བློ་དང་མི་འཚམ་པའི་སྲིད་བྱུས་འཛིན་བཞིན་པ་དེ་རྒྱ་ནག་གཞུང་གི་དཔོན་རིགས་ཚོས་ཕྱིར་བསྡུ་བྱས་ཏེ་བོད་མི་ཚོར་མིང་དོན་མཚུངས་པའི་རང་སྐྱོང་སྤྲོད་ཆེད་༸གོང་ས་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་མུ་མཐུད་གྲོས་མོལ་བྱེད་དགོས་པའི་རེ་འདུན་ཡང་བཏོན་ཡོད་པ་བཅས།།