༢༠༡༡ ཟླ་ ༡༠ ཚེས་ ༡༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༢ ཉིན་གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་རྔ་པ་ཀིརྟི་ཁུལ་སོགས་སུ་རང་ལུས་ཞུགས་འབུལ་གྱི་ཛ་དྲག་གནས་སྟངས་འཐོན་བཞིན་པར་བཀའ་སྤྱི་ཐུན་མོང་གིས་གསར་འགོད་གསལ་བསྒྲགས་ཤིག་སྤེལ་ཡོད།
དེ་ཉིན་སྔ་དྲོ་ཆུ་ཚོད་ ༡༠།༣༠ ཐོག་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་དང་། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དྲིལ་བསྒྲགས་དྲུང་ཆེ་ཐུབ་བསྟན་བསམ་འཕེལ་ལགས། དེ་བཞིན་ཕྱི་ནང་གསར་འགོད་པ་བཅས་ཁྱོན་མི་གྲངས་ ༤༠ བརྒལ་བ་ལྷན་འཛོམས་ཐོག་དྲིལ་བསྒྲགས་དྲུང་ཆེ་ཐུབ་བསྟན་བསམ་འཕེལ་ལགས་ཀྱིས་ཐོག་མར་ངོ་སྤྲོད་དང་འབྲེལ་སྤྱི་འཐུས་ཚོགས་གཙོ་མཆོག་གིས་བོད་སྐད་ཐོག་བཀའ་སྤྱི་ཐུན་མོང་གི་གསར་འགོད་བསྒྲགས་གཏམ་སྒྲོགས་སྦྱང་གནང་རྗེས་བཀའ་ཁྲི་མཆོག་གིས་དབྱིན་སྐད་ཐོག་སྒྲོགས་སྦྱང་གནང་ཡོད། དེ་རྗེས་གསར་འགོད་པའི་དྲི་བར་ལན་འདེབས་རིམ་པར་གནང་ཡོད་པའི་ནང་བཀའ་སྤྱི་ཐུན་མོང་གིས་ལས་འགུལ་སྤེལ་རྒྱུའི་ལས་འཆར་ཁག་གསུང་དོན།
བཀའ་སྤྱི་ཐུན་མོང་གི་ཐོག་ནས་ལས་ཀ་ག་རེ་བྱས་པ་ཡིན་ནའང་མཉམ་རུབ་དང་འགལ་ཟླ་མེད་པའི་ཐོག་ནས་ཆིག་སྒྲིལ་གྱི་ནུས་པ་ཐོན་པའི་ཆེད་བཀའ་སྤྱི་གཉིས་ཕྱི་ཚེས་ ༡༠ དང་ ༡༡ ལྷན་ཚོགས་གནང་སྟེ་ཕྱི་ཚེས་ ༡༢ ནས་སྤྱི་འཐུས་ཁག་གཅིག་ལྡི་ལིར་ཐོན་ཏེ་རྒྱལ་ས་ལྡི་ལིར་རྟེན་གཞི་བྱས་པའི་ཕྱི་རྒྱལ་གཞུང་ཚབ་ཁག་དང་རྒྱ་གར་དཔོན་རིགས་ཁག་མཇལ་འཕྲད་གནང་རྒྱུ་དང་།
ཕྱི་ཚེས་ ༡༨ ཉིན་བོད་མི་མང་སྤྱི་འཐུས་ཚང་མ་ལྡི་ལིར་ཕེབས་ཏེ་ཆུ་ཚོད་ ༢༤ རིང་ཟས་བཅད་ངོ་རྒོལ་གནང་རྒྱུ། ཕྱི་ཚེས་ ༡༩ ཉིན་འཛམ་གླིང་ཁྱོན་ཡོངས་ལ་བོད་མི་འདུ་སྡོད་དང་བོད་མིར་རྒྱབ་སྐྱོར་བརྩེ་ཞེན་གནང་ཡུལ་ཚང་མར་ཉིན་བརྒྱ་དུས་གཅིག་ལ་ཟས་བཅད་ངོ་རྒོལ་དང་སྦྲགས་མཆོད་འབུལ་སྨོན་ལམ་གོ་སྒྲིག་ཞུས་ཡོད་པར་རྡ་ས་དང་ལྡི་ལིས་གཙོས་ས་གནས་ཚང་མར་གནང་རྒྱུའི་གོ་སྒྲིག་ཞུས་ཡོད།
ཕྱི་ཚེས་ ༡༩ དང་ ༢༠། ༢༡ བཅས་ཉིན་གསུམ་རིང་རྒྱ་བལ་གང་ས་ནས་བོད་མི་ ༣༠༠༠ ཙམ་ལྡི་ལིར་ལྷན་འཛོམས་ཐོག་བོད་མི་མང་སྤྱི་འཐུས་ལྷན་ཚོགས་ཀྱིས་གཙོ་བོ་འགན་འཁུར་ཞུས་ཐོག་བཀའ་ཤག་གིས་མཐུན་འགྱུར་འོག་མི་མང་གི་ལས་འགུལ་ཤུགས་ཆེ་ཞིག་སྤེལ་རྒྱུའི་གོ་རིམ་སྒྲིག་བཞིན་ཡོད། དེ་རྗེས་བོད་ནང་གནས་སྟངས་གང་ཆགས་ལ་གཞི་བཅོལ་བའི་ཐོག་ནས་རིམ་པས་ལས་འགུལ་སྤེལ་དགོས་རྒྱུ་ཞིག་དང་། འཛིན་སྐྱོང་བཀའ་ཤག་གིས་ངོས་ནས་རྒྱལ་སྤྱིའི་སྟེང་ད་ལྟའི་བོད་ནང་ཛ་དྲག་གནས་སྟངས་གང་ཡོད་པ་དེ་དག་དོན་གཅོད་ཁག་བརྒྱུད་ཕྱི་དྲིལ་བཀའ་བློན་གྱིས་གཙོས་བཀའ་བློན་རྣམ་པས་ཐད་ཀར་གནང་སྒོ་ཁག་དང་། རྒྱལ་སྤྱིའི་སྟེང་ཚོགས་འདུ་ཆེན་མོ་དེ་འདྲ་དང་སྟབས་བསྟུན་ལས་འགུལ་སྤེལ་རྒྱུ་ཁག་གཅིག་དང་།
ཕྱི་ཟླ་ ༡༠ ཚེས་ ༢༤ ཉིན་མཉམ་འབྲེལ་རྒྱལ་ཚོགས་དབུ་བརྙེས་པའི་ཉིན་མོ་དེར་ཇི་ནི་ཝ་དང་ནིའུ་ཡོཀ་ཏུ་ལས་འགུལ་སྤེལ་རྒྱུའི་གོ་རིམ་ཞིག་སྒྲིག་ཡོད་ཅེས་གསུངས། དེ་རྗེས་བཀའ་བློན་ཁྲི་པ་མཆོག་གིས་གསར་འགོད་པའི་དྲི་བར་ལན་འདེབས་གནང་དོན། གོ་སྐབས་འདི་བཟུང་ནས་ཞུ་རྒྱུར། རྩ་བའི་བཀའ་ཤག་གིས་བཀོད་ཁྱབ་དེ་རིང་ཉིན་རྒྱབ་གཏོང་རྒྱུ་ཡིན། ཚོགས་གཙོས་གསུངས་པ་ལྟར་བཀའ་སྤྱི་ཐུན་མོང་ཐོག་ནས་ལས་འགུལ་སྤེལ་རྒྱུ་འདི་དག་མོས་མཐུན་བྱུང་བ་ཞིག་རེད། དེའི་རྒྱུ་མཚན་ནི་མ་འོངས་པར་ལས་དོན་བསྒྲུབ་ཕྱོགས་དང་། དེ་བཞིན་ལས་འགུལ་སྤེལ་རྒྱུ་དེ་ཡང་ཞི་བ་དང་ས་གནས་ཀྱི་ཁྲིམས་དང་མཐུན་པའི་སྒོ་ནས་བཟང་སྤྱོད་ཀྱི་རྣམ་པ་སྟོན་རྒྱུ་གལ་ཆེ་ཡིན་པས་དེ་དག་གཞིར་བཞག་ཐོག་ལས་འགུལ་སྤེལ་རོགས་གནང་ཞུ་རྒྱུ་ཡིན།
བཀའ་ཤག་ནས་འབོད་སྐུལ་ཞུ་རྒྱུ་འདི་ཕྱི་ཚེས་ ༡༩ རེས་གཟའ་ལྷག་པ་ཉིན་ལྷ་དཀར་གྱི་ལས་འགུལ་དང་མཐུན་པའི་ཐོག་ནས་རེས་གཟའ་ལྷག་པའི་ཉིན་རྒྱ་བལ་འབྲུག་གསུམ་ནང་ཡོད་པའི་གཞིས་ཆགས་ཁག་དང་ཕྱི་རྒྱལ་ཡུལ་གྲུ་ཁག་ཡོངས་སུ་ཉིན་བརྒྱ་དུས་གཅིག་ལ་ཉིན་གཅིག་རིང་སྨོན་ལམ་མཆོད་འབུལ་གནང་རོགས་ཞུ་རྒྱུ་དང་། རབ་ཏུ་བྱུང་བ་ཡིན་ན་དམིགས་བསལ་སོ་སོའི་འཕྲོད་བསྟེན་ལ་རག་ལུས་པ་མ་གཏོགས་ཉིན་གང་ཟས་བཅད་ཀྱི་ལས་འགུལ་བྱུང་བ་ཡིན་ན་ཡག་པོ་ཡོང་རྒྱུར་འབོད་སྐུལ་ཞུ་རྒྱུ།
དེ་བཞིན་རྒྱ་གར་ནང་ལས་འགུལ་སྤེལ་རྒྱུ་དེ་བོད་མི་མང་སྤྱི་འཐུས་ལྷན་ཚོགས་ཀྱིས་འགན་བཞེས་རྒྱུ་དང་། རྒྱལ་སྤྱིའི་སྟེང་བཀའ་ཤག་གིས་གནང་རྒྱུ་བྱས་ཡོད། དེར་བརྟེན་གཞིས་ཆགས་ཁག་དང་དོན་གཅོད་ཁག་ཚང་མར་དེ་རིང་བཀོད་ཁྱབ་གཏོང་རྒྱུ་ཡིན། བརྒྱུད་ལམ་གྱི་གོ་སྐབས་འདི་བཟུང་ནས་ཁོང་རྣམ་པས་མཁྱེན་པ་ཡིན་ན་དུས་ཐུང་སོང་གྲ་སྒྲིག་གནང་རྒྱུར་ཁྱད་པར་ཡོད་པ་རེད་སྙམ་བྱུང་། ཞེས་བཀའ་སྤྱི་ཐུན་མོང་གིས་ཕྱི་ནང་གི་གསར་འགོད་པའི་དྲི་བར་ལན་འདེབས་གནང་སྟེ་གསར་འགོད་གསལ་བསྒྲགས་གྲོལ་བ་བཅས།།
