༢༠༡༡ ཟླ་ ༡༠ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༡༩ ཉིན་ཕ་རན་སི་རྒྱལ་ས་པེ་རི་སིར་བོད་མི་གྲངས་ ༣༠༠ ཙམ་དང་བོད་དོན་རྒྱབ་སྐྱོར་བ་བཅས་ཀྱིས་ཨེ་ཕིལ་ཊོ་ཝར་(Eifel Tower) ནས་འགོ་འཛུགས་ཀྱིས་རྒྱ་ནག་གཞུང་ཚབ་ཁང་གི་མདུན་བར་ཞི་བའི་གོམ་འགྲོས་གནང་ཡོད། ཞི་བའི་གོམ་འགྲོས་སྐབས་བོད་ཀྱི་རྒྱལ་དར་དང་སྦྱར་ཡིག་སོགས་ལག་ཏུ་ཐོགས་ཏེ་ངོ་རྒོལ་བྱས་ཡོད། གོམ་འགྲོས་ལེགས་གྲུབ་མཚམས་ཚང་མས་སྨོན་ལམ་གསུང་འདོན་གནང་ཡོད་པ་མ་ཟད། སྐབས་དེར་བོད་མི་མང་སྤྱི་འཐུས་ཟུར་པ་ཆབ་བྲག་ལྷ་མོ་སྐྱབས་ལགས་དང་བསྟན་འཛིན་ལགས་གཉིས་ཀྱིས་མཆོད་འབུལ་སྨོན་ལམ་དང་འབྲེལ་བའི་བོད་ནང་གི་ད་ལྟའི་ཛ་དྲག་གི་གནས་སྟངས་ངོ་སྤྲོད་གནང་བ་དང་སྦྲགས། རྒྱལ་སྤྱིའི་ཚོགས་པ་ཁག་ལ་བོད་མི་ཚོར་རྒྱབ་སྐྱོར་ཆེད་འབོད་སྐུལ་ཡང་ཞུས་ཡོད།  ཕྱོགས་མཚུངས་བོད་དོན་རྒྱབ་སྐྱོར་བ་ཁག་ ༢༤ ཙམ་གྱིས་ཕ་རན་སིའི་སྲིད་འཛིན་ནི་ཀོ་ལ་སར་ཀོ་ཛི་མཆོག་ལ་རྒྱ་ནག་གཞུང་གིས་བོད་མི་ཚོར་འཛིན་པའི་དམ་བསྒྲགས་ཀྱི་སྲིད་བྱུས་དེར་སྐྱོན་བརྗོད་གནང་དགོས་པ་མ་ཟད།

རྒྱ་ནག་གཞུང་གིས་བོད་མི་ཚོའི་འགྲོ་བ་མིའི་ཐོབ་ཐང་ལ་སྲུང་བརྩི་བྱེད་དགོས་པའི་གནོན་ཤུགས་སྤྲོད་དགོས་པའི་འབོད་སྐུལ་གྱི་ཞུ་སྙན་ཞིག་ཀྱང་ཕུལ་འདུག