༢༠༡༡ ཟླ་ ༡༠ ཚེས་ ༢༨ རེས་གཟའ་པ་སངས།
༄༅། །དབྱིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་(Fabian Hamilton)མཆོག་གིས་དེང་སྐབས་བོད་ནང་ཉིན་རེ་ལས་ཉིན་རེ་མ་འདས་པར་རང་ལུས་མེར་སྲེག་བཏང་སྟེ་རྒྱ་ནག་གཞུང་ལ་ངོ་རྒོལ་གནང་མཁན་ཇེ་མང་དུ་འགྲོ་བཞིན་པའི་གནས་སྟངས་ལུང་འདྲེན་གནང་བ་དང་ཆབས་ཅིག་རྒྱ་ནག་གཞུང་ནས་བོད་པའི་ཆོས་དང་རིག་གཞུང་སྐད་ཡིག་སོགས་འཆར་གཞི་ལྡན་པའི་ཐོག་ནས་རྩ་མེད་བཟོ་བཞིན་ཡོད་པ་དེ་དག་མཚམས་འཇོག་ཡོང་ཆེད་དང་། བོད་མིའི་མངོན་འདོད་བཞིན་བོད་མིར་རང་སྲིད་རང་སྐྱོང་ཐོབ་སླད་དབྱིན་ཡུལ་གཞུང་ཕྱོགས་ནས་གང་ཞིག་གནང་བཞིན་ཡོད་དམ་ཞེས་དྲི་བ་བཏང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༡ ཟླ་ ༡༠ ཚེས་ ༢༥ ཉིན་དབྱིན་ཡུལ་གྲོས་ཚོགས་སུ་ཕྱི་འབྲེལ་དང་སྔ་མོ་དབྱིན་ཡུལ་གྱི་ཁྱབ་ཁོངས་སུ་ཡོད་པའི་རྒྱལ་ཁབ་ཀོ་མན་ཝེལ་ཐ་ཅེས་པའི་གནད་དོན་དང་འབྲེལ་བའི་དྲི་བ་དྲིས་ལན་གྱི་ལས་རིམ་ཞིག་གི་སྐབས་དབྱིན་ཡུལ་གྱི་(Leeds North East) ས་ཁུལ་ནས་ཡིན་པ་ངལ་སེལ་ཆབ་སྲིད་ཚོགས་པའི་(Labour Party)གྲོས་ཚོགས་ཀྱི་འཐུས་མི་(Fabian Hamilton)མཆོག་གིས་བོད་ནང་ཆེས་ཛ་དྲག་གི་གནས་སྟངས་ཆགས་པ་དེའི་ཐོག་དབྱིན་ཡུལ་གཞུང་གི་ལངས་ཕྱོགས་ཇི་ཡིན་སྐོར་དྲི་བ་བཏང་བར། འབྲེལ་ཡོད་བློན་ཆེན་སྐུ་ཞབས་ཇེ་རི་མི་བྷོ་རོན་(Jeremy Browne)ལགས་ཀྱིས་དབྱིན་ཡུལ་གཞུང་ཕྱོགས་ནས་ད་ལྟའི་ཆར་བོད་ཀྱི་གནད་དོན་ཐད་སྲིད་བྱུས་འཛིན་བཞིན་པ་དེ་སྔོན་མའི་གཞུང་འཛིན་ཚོགས་པ་ཚོས་བོད་ཐོག་འཛིན་པའི་སྲིད་བྱུས་དེ་རང་འཇགས་ཡིན། འོན་ཀྱང་འགྲོ་བ་མིའི་ཐོབ་ཐང་ལ་གུས་བརྩི་ཡོང་རྒྱུ་དང་བོད་མིའི་གནས་སྟངས་དང་འབྲེལ་བའི་གནད་དོན་ཐོག་ལ་དུས་ནས་དུས་སུ་གྲོས་བསྡུར་བྱེད་བཞིན་ཡོད། ཅེས་ལན་འདེབས་གནང་འདུག་པ་བཅས། །