༢༠༡༡ ཟླ་ ༡༠ ཚེས་ ༧ རེས་གཟའ་པ་སངས།
༄༅། །ཐེ་ཝན་བོད་ཀྱི་གྲོགས་པོ་ཚོགས་པས་བོད་ནང་གི་རང་སྲོག་བློས་གཏོང་གནང་མཁན་གྱི་དགེ་འདུན་པ་ཚོར་རྒྱལ་སྤྱིའི་ངོས་ནས་རྒྱབ་སྐྱོར་གནང་དགོས་སྐོར་གསུངས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༡ ཟླ་ ༡༠ ཚེས་ ༥ ཉིན་ཐེ་ཝན་བོད་ཀྱི་གྲོགས་པོ་ཚོགས་པས་ཐེ་ཝན་གྱི་རྒྱལ་ས་ཐའེ་པེ་ཡོན་ཆོན་མགྲོན་ཁང་དུ་གསར་འགོད་ལྷན་ཚོགས་ཤིག་སྐོང་ཚོགས་གནང་བ་དང་སྦྲགས་བོད་ནང་གི་བོད་མི་ཚོར་རྒྱ་ནག་གཞུང་གིས་དྲག་པོའི་དབང་བསྒྱུར་བྱས་དང་བྱེད་མུས་ཡིན་པར་བརྟེན། འདི་ལོ་ཕྱི་ཟླ་གསུམ་པ་ནས་ད་བར་བོད་ནང་དགེ་འདུན་པ་ལྔས་བོད་རྒྱལ་ཁབ་དང་མི་རིགས་ཀྱི་ཆེད་རང་ལུས་མེར་སྲེག་བཏང་བའི་གནས་ཚུལ་རྣམས་ངོ་སྤྲོད་གནང་བ་དང་ཆབས་ཅིག་ཐེ་ཝན་གཞུང་གཙོ་བོར་གྱུར་བའི་རྒྱལ་སྤྱིའི་སྤྱི་ཚོགས་ནས་བོད་མིའི་རང་དབང་དང་ཆོས་དད་རང་མོས་ལ་རྒྱབ་སྐྱོར་ཤུགས་ཆེ་གནང་དགོས་པའི་འབོད་སྐུལ་ཞུས་འདུག གསར་འགོད་ལྷན་ཚོགས་དེའི་ཐོག་རྒྱ་ནག་གཞུང་ཕྱོགས་ངོས་ནས་བོད་ནང་གི་དགོན་སྡེ་ཁག་ཏུ་དམག་དཔུང་ཁྱོན་ཆེ་འགྲེམས་འཇོག་བྱས་པ་རྣམས་ཕྱིར་འཐེན་དང་འཛིན་བཟུང་བྱས་པའི་དགེ་འདུན་པ་རྣམས་གློད་བཀྲོལ་གཏོང་དགོས་པ་མ་ཟད། ཆོས་ལུགས་ཀྱི་བྱེད་སྒོ་ཁག་ལ་གནོད་གཞིའི་སྲིད་བྱུས་ཡོངས་རྫོགས་ཕྱིར་འཐེན་བྱས་ཏེ་དགོན་པར་ལྷིང་འཇགས་ཀྱི་ཁོར་ཡུག་དང་དགེ་འདུན་པར་རང་དབང་ལྡན་པའི་འཚོ་བ་ཞིག་བསྐྲུན་དགོས། དེ་བཞིན་རྒྱལ་སྤྱིའི་རང་དབང་ལྡན་པའི་ཚོགས་སྡེ་དང་གསར་འགོད་པ་ཚོས་བོད་ནང་གི་དངོས་ཡོད་གནས་སྟངས་ཤེས་རྟོགས་ཡོང་ཆེད་རང་དབང་ཐོག་བོད་ནང་འགྲོ་བསྐྱོད་བྱེད་བཅུག་དགོས་ཞེས་གསུངས་འདུག
ཕྱོགས་མཚུངས་ཐེ་ཝན་བོད་ཀྱི་གྲོགས་པོ་ཚོགས་པའི་ཚོགས་གཙོ་མཆོག་གིས་ཨ་རི་དང་ཡུ་རོབ་གྲོས་ཚོགས་སོགས་ཀྱི་ངོས་ནས་བོད་ནང་ཆེས་ཛ་དྲག་ཡིན་པའི་འགྲོ་བ་མིའི་ཐོབ་ཐང་གི་གནས་སྟངས་ལ་ཐུགས་ཁུར་ཆེན་པོ་གནང་བཞིན་ཡོད། འོན་ཀྱང་ཐེ་ཝན་གོ་མིན་ཏང་སྲིད་གཞུང་ངོས་ནས་ད་བར་རྒྱ་ནག་གཞུང་ལ་འབྲེལ་ལམ་འཛུགས་རྒྱུར་དམིགས་ཏེ་འགྲོ་བ་མིའི་ཐོབ་ཐང་ལ་དོ་སྣང་བྱེད་ཀྱི་མེད་སྟབས། མཱ་ཡེ་ཇུ་སྲིད་གཞུང་ངོས་ནས་རྒྱ་ནག་གཞུང་ལ་ངེས་པར་དུ་སྐྱོན་བརྗོད་ཀྱིས་བོད་མིའི་བདེ་དོན་ལ་ཐུགས་ཁུར་བྱས་ཏེ་རྒྱ་ནག་གཞུང་དང་མཉམ་དུ་ངན་པ་ལག་སྦྲེལ་བྱ་རྒྱུ་མཚམས་འཇོག་བྱེད་དགོས་སྐོར་ཡང་གསུངས་འདུག་པ་བཅས། །