༢༠༡༡ ཟླ་ ༡༠ ཚེས་ ༣ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་མེས་པོ་དམ་པ་གྷན་ངྷིའི་ཞི་བདེའི་གཟེངས་རྟགས་འབུལ་གཏན་འཁེལ་བ།
དེ་ཡང་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་གསལ་ལ་གཞིགས་ན། ལྷོ་ཨ་ཕི་རི་ཀའི་ནང་རྟེན་གཞི་བྱས་པའི་གྷན་ངྷིའི་ཐེབས་རྩ་ཁང་གི་འགན་འཛིན་གྷན་ངྷིའི་ཚ་མོ་ཨི་ལར་གྷན་ངྷི་ལགས་ཀྱིས་ཕྱི་ལོ་ ༢༠༡༡ ཟླ་ ༡༠ ཚེས་ ༢ ཉིན་མེས་པོ་དམ་པ་མ་ཧཱ་ཏ་མ་གྷན་ངྷི་མཆོག་གི་འཁྲུངས་སྐར་ཉིན་གསུང་དོན་ལྟར་ན། འདི་ལོའི་གྷན་ངྷིའི་གཟེངས་རྟགས་དེ་བཞིན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་བདུན་ཕྲག་རྗེས་མའི་རེས་གཟའ་པ་སངས་ཉིན་ལྷོ་ཨ་ཕི་རི་ཀའི་ཡེ་ཤུའི་ཆོས་དཔོན་ཌེ་སི་མོན་ཊུ་ཊུ་མཆོག་དགུང་གྲངས་ ༨༠ ཕེབས་པའི་འཁྲུངས་སྐར་དུས་ཆེན་མཛད་སྒོ་དང་སྟབས་བསྟུན་སྐབས་དེར་འབུལ་ལམ་ཞུ་རྒྱུ་ཡིན། འོན་ཀྱང་ལྷོ་ཨ་ཕི་རི་ཀའི་གཞུང་ཕྱོགས་ནས་༸གོང་ས་ཏཱ་ལའི་བླ་མ་མཆོག་ལ་ད་ལྟའི་ཆར་མཐོང་མཆན་འབུལ་ལམ་ཞུས་མེད་པར་བརྟེན། བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་དངོས་སུ་ཆིབས་སྒྱུར་བསྐྱང་ཐུབ་མིན་གྱི་གནས་ཚུལ་དེ་ད་ལྟ་གསལ་པོ་ཆགས་མེད། ༸གོང་ས་ཏཱ་ལའི་བླ་མ་མཆོག་ཆོས་ཕྱོགས་ཀྱི་དབུ་ཁྲིད་ཅིག་ཡིན་པ་ལས་ཆབ་སྲིད་ཀྱི་ཐུགས་འགན་བཞེས་ཀྱི་མེད་སྟབས། ལྷོ་ཨ་ཕི་རི་ཀའི་གཞུང་ཕྱོགས་ནས་བོད་ཀྱི་༸སྐྱབས་མགོན་ཏཱ་ལའི་བླ་མཆོག་ལ་མཐོང་མཆན་འབུལ་ལམ་ཞུ་རྒྱུར་དཀའ་ངལ་གང་ཡང་འཕྲད་ཀྱི་མ་རེད་སྙམ་གྱི་ཡོད། ལྷོ་ཨ་ཕི་རི་ཀའི་གཞུང་ཕྱོགས་ནས་དེའི་ཐོག་དགོངས་བཞེས་གནང་རྒྱུའི་རེ་བ་ཞུ་བཞིན་ཡོད། གལ་སྲིད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཆོས་དཔོན་ཌེ་སི་མོན་ཊུ་ཊུ་མཆོག་གི་འཁྲུངས་སྐར་ལ་ཆིབས་སྒྱུར་བསྐྱང་མ་ཐུབ་པ་ཡིན་ན་༸གོང་ས་ཏཱ་ལའི་བླ་མ་མཆོག་གི་སྐུ་ཚབ་དོན་གཅོད་བརྒྱུད་ནས་མཛད་སྒོའི་ཐོག་གཟེངས་རྟགས་འབུལ་ལམ་ཞུ་རྒྱུ་ཡིན་ཞེས་གསུངས་ཡོད་པ་བཅས།