༢༠༡༡ ཟླ་ ༡༠ ཚེས་ ༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༢ རེས་གཟའ་ཉི་མ་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་དད་ལྡན་ཆོས་ཞུ་བ་ཚོར་དཔལ་མགོན་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པའི་བཀའ་ཆོས་ཉིན་གཉིས་པའི་སྔ་དྲོ་ཚོགས་ཐུན་དང་པོའི་ཐོག་རྒྱ་གར་གྱི་རང་བཙན་འཐབ་རྩོད་པ་མེས་པོ་དམ་པ་གྷན་དྷི་མཆོག་གི་འཁྲུངས་སྐར་ཉིན་རྒྱལ་སྤྱིའི་ཞི་བདེའི་ཉིན་མོ་སྲུང་བརྩི་ཞུ་ཆེད་ངག་བཅད་སྐར་མ་གཅིག་མཛད་པ་དང་སྦྲགས་བཀའ་སློབ་སྩལ་དོན། དེ་རིང་མེས་པོ་དམ་པ་གྷན་དྷི་མཆོག་གི་འཁྲུངས་སྐར་གྱི་དུས་དྲན་ཉིན་མོར་རྒྱལ་སྤྱིའི་ནང་འཚེ་མེད་ཞི་བདེའི་ཉིན་མོ་ཞེས་ཡོངས་གྲགས་སྲུང་བརྩི་ཞུ་བཞིན་ཡོད། འཚེ་མེད་ཞི་བ་དེ་བཞིན་ང་ཚོའི་ཉིན་རེའི་འཚོ་བའི་ནང་གལ་ཆེ་ཡིན་པ་མ་ཟད།  རྒྱལ་སྤྱིའི་ནང་རྒྱལ་ཁབ་ཕན་ཚུན་མཐུན་སྒྲིལ་གོང་མཐོར་གཏོང་རྒྱུར་ཧ་ཅང་གལ་འགངས་ཆེན་པོ་ཆགས་ཡོད། ནམ་རྒྱུན་ཞི་བདེ་ཞེས་བརྗོད་སྐབས་ཚིག་གཅིག་བེད་སྤྱོད་བྱེད་རྒྱུའི་ལུགས་སྲོལ་ཆགས་འདུག ཞི་བདེ་དཀྲུག་མཁན་དེ་འཚེ་བ་རེད། འཚེ་བ་མེད་པ་ཞེས་པའི་ཚིག་དེ་ཤུགས་ཆེ་བ་འདུག དེ་རིང་འཚེ་བ་མེད་པའི་ཉིན་མོར་དེར་ངག་བཅད་སྐར་མ་གཅིག་བྱ་རྒྱུ་ཡིན།  ང་ཚོས་ངག་བཅད་བྱས་པ་གཅིག་པུ་མ་ཡིན་པར་གང་ལྟར་འཚེ་བ་ཞེས་པ་དེ་ཞེ་སྡང་དང་དངངས་སྐྲག་ལ་བརྟེན་ནས་ཡོང་གི་ཡོད། ཞེ་སྡང་དང་དངངས་སྐྲག་དེ་ཚོའི་རྩ་བ་ཐུག་ས་དེ་ཕྱོགས་གཅིག་ནས་ཐབས་ཀྱི་ཆ་ནས་རྩིས་པ་ཡིན་ན་བྱམས་བརྩེས་ཕོངས་པའི་རྐྱེན་གྱི་རེད། གཞན་ལ་བྱམས་པ་དང་བརྩེ་བ་ཡོད་ན་ཕྲག་དོག་དང་ཁོང་ཁྲོ་བྱེད་དགོས་རྒྱུ་མི་འདུག གཞན་ལ་བྱམས་བརྩེ་ཡོད་ན་གཞན་གྱིས་རང་ལ་ཕལ་ཆེར་བརྩེ་བ་བྱེད་ཀྱི་རེད། ཕར་བྱམས་བརྩེ་བྱས་ན་ཚུར་ཡང་བྱམས་བརྩེ་ཡོང་གི་རེད། ཕན་ཚུན་གཉིས་ཀར་བྱམས་བརྩེ་ལྡན་པ་བྱུང་ན་འཇིགས་སྣང་ཡོང་དགོས་རྒྱུ་མི་འདུག འཚེ་བ་ཡོང་སའི་རྙོག་གྲ་ཐུག་ས་དེ་འཇིགས་སྣང་དང་གཅིག གཞན་ལ་གནོད་སེམས་ཀྱི་ཞེ་སྡང་གི་བློ་དང་གཉིས་གཙོ་བོ་རེད། དེར་བརྟེན་ང་ཚོས་དེ་རིང་འདིར་ངག་བཅད་སྐར་མ་གཅིག་བྱེད་རིང་ག་ཚོད་ཐུབ་ཐུབ་ཀྱིས་བྱམས་བརྩེའི་བློ་ཞིག་སོ་སོའི་རྒྱུད་ལ་སྐྱེས། དེའི་སྟེང་སྣོན་མ་ཞིག་རྒྱག་ཐུབ་ན། ཁོང་ཁྲོ་ཟ་སྐབས་ཁོས་ང་ལ་གནོད་པ་བྱེད་ཀྱི་འདུག་ཅེས་འཇིགས་སྣང་སླེབས་དུས་ངར་འཇིགས་སྣང་སླེབས་རྒྱུའི་ངར་འཛིན་ཚུལ་ཁྱད་པར་བ་ཞིག་འདུག ང་ཙམ་མ་རེད། དེ་འདྲའི་ཆགས་སྡང་བློ་དེ་སྐྱེས་སྐབས་ངར་འཛིན་ལུགས་མི་འདྲ་བ་ཞིག་ཡོད་པ་དེར་ངར་འཛིན་ཟེར་གྱི་ཡོད། སྤྱིར་བཏང་ངའོ་སྙམ་པའི་བློ་ཙམ་ལ་ང་འཛིན་མིན། ངའོ་ཙམ་སྙམ་པའི་བློ་ཚད་མའི་བློ་ཡོང་གི་ཡོད། འོན་ཀྱང་ངར་འཛིན་སྟངས་མི་འདྲ་བ་ཞིག་འདུག ང་འཛིན་ཞེས་པ་དེ་ཕྱི་ཅི་ལོག་པའི་བློ་ཆགས་ཡོད། དེ་བཞིན་བདག་མེད་པའི་བསམ་པ་ཞིག་བློར་གང་ཙམ་སྒོམ་ན་ཁ་ནས་ངར་ཟེར་བའི་ཚིག་ཞིག་ཐོན་གྱི་ཡོད་ཀྱང་། ང་ཙམ་བློ་ལ་ཤར་ཡོང་དུས་འཛིན་པ་དང་པོ་བསྐྱེད་སའི་བློ་དེ་མེད་པའི་བསམ་པ་ཞིག་རིམ་པས་ཤར་རྒྱུ་ཡོང་གི་འདུག དེ་དྲན་པར་བགྱིས་ཨང།  ཞེས་བཀའ་སློབ་སྩལ་བ་དང་སྦྲགས་༸གོང་ས་མཆོག་གིས་དད་ལྡན་ཆོས་ཞུ་བ་རྣམས་དང་ལྷན་ངག་བཅད་སྐར་མ་གཅིག་རིང་མཛད་ཡོད། དེ་རྗེས་ཆོས་འབྲེལ་མུ་མཐུད་སྩལ་ཡོད་པ་བཅས།།