༢༠༡༡ ཟླ་ ༡༠ ཚེས་ ༢༤ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཀོ་རི་ཡའི་དད་ལྡན་ཆོས་ཞུ་བ་ཁོང་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ལོ་ ༢༠༡༡ ཟླ་ ༡༠ ཚེས་ ༢༣ ནས་ ༢༥ སྔ་དྲོ་བར་མགོན་པོ་གང་ཉིད་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཀོ་རི་ཡ་གཙོ་བོར་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་རྗེ་ཙོང་ཁ་པས་མཛད་པའི་ལམ་རིམ་ཆེན་མོ་ལས་ཞི་གནས་དང་ལྷག་མཐོང་གི་ཆོས་འབྲེལ་དབུ་འཛུགས་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་ཀོ་རི་ཡའི་དད་ལྡན་ཆོས་ཞུ་བ་འཐུས་མིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་ནས་གདན་ཞུས་ཀྱིས་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་རྗེས་མགོན་པོ་གང་ཉིད་མཆོག་གིས་ཀོ་རི་ཡའི་དད་ལྡན་ཆོས་ཞུ་བ་ ༣༥༠ བརྒལ་བ་གཙོ་བོར་གྱུར་པའི་ཕྱི་རྒྱལ་ཡུལ་གྲུ་ཁག ༥༩ ནས་བཅར་བའི་ཆོས་ཞུ་བ་ ༡༡༨༢ དང་། དེ་བཞིན་རང་རིགས་བཅས་ཁྱོན་མི་གྲངས་ ༤༣༣༦ བརྒལ་བར་ཐོག་མར་ནང་ཆོས་ངོ་སྤྲོད་ཀྱི་བཀའ་སློབ་སྩལ་དོན། དེ་རིང་ཆོས་འབྲེལ་བྱ་རྒྱུའི་གདུལ་བྱ་གཙོ་བོ་ཀོ་རི་ཡའི་ཆོས་གྲོགས་ཚོ་ཆགས་ཡོད། ཡུལ་གྲུ་གཞན་ནས་འབྱོར་བ་དང་། དེ་བཞིན་བོད་རིགས་ཀྱང་མང་དག་ཅིག་སླེབས་འདུག དེ་རིང་ཆོས་འབྲེལ་བྱ་རྒྱུ་དེ་ཁ་སྔོན་ཁོང་ཚོའི་རེ་འདུན་དེ་ཞི་ལྷག་སྐོར་ལ་འཆད་ཐུབ་ན་ཞེས་བརྗོད་བྱུང་། རྗེ་ཙོང་ཁ་པས་མཛད་པའི་ལམ་རིམ་ཆེན་མོ་ལས་ཞི་ལྷག་སྐོར་དེ་ཀོ་རི་ཡའི་སྐད་ཡིག་ནང་བསྒྱུར་ཡོད་པར་བརྟེན་དེ་ཆོས་འབྲེལ་བྱ་རྒྱུ་ཡིན། ཞི་གནས་སྐོར་ལ་མཛུབ་མོ་རི་མཐོང་ལྟ་བུ་གཏོང་རྒྱུ་མ་གཏོགས་ངོས་རང་ལ་ཉམས་མྱོང་མེད། ངོས་རང་ལ་ཆ་བཞག་ན་ཞི་གནས་ཀྱིས་ཕོངས་པ་ལྟ་བུ་འདུག རང་ལ་ཉམས་མྱོང་མེད་པར་གཞན་ལ་འཆད་ཅེས་པ་དེ་ཧ་ཅང་ཁག་པོ་རེད། འོན་ཀྱང་རྗེ་ཙོང་ཁ་པའི་ལེགས་བཤད་རྨད་དུ་བྱུང་བ་དེའི་ཐོག་ནས་རོབ་ཙམ་ཞིག་ངོ་སྤྲོད་བྱ་རྒྱུ་ཡིན། སྔོན་ལ་ངོས་ཀྱིས་སྤྱི་བཤད་ཕྲན་བུ་འགྲེལ་བརྗོད་བྱ་རྒྱུ་ཡིན། སངས་རྒྱས་བཅོམ་ལྡན་འདས་ཀྱི་ཆོས་འདི་ལོ་སྟོང་ཕྲག་གཉིས་དང་ཧ་ལམ་དྲུག་བརྒྱ་ཙམ་ཞིག་ཕྱིན་ཡོད། ན་ནིང་ཨབ་གྷ་ན་སི་ཐན་དུ་རྒྱ་མི་གཏེར་ཁ་སྔོག་འདོན་བྱེད་མཁན་ཚོ་ཁག་གཅིག་གིས་སྔ་མོ་ནང་པའི་གནས་ལྟ་བུ་ཞིག་གི་ས་འོག་ནས་བརྙེད་པའི་སྒྲོལ་མའི་སྐུ་ཞིག་འདུག དེའི་འདྲ་པར་ངོས་ཀྱིས་མཐོང་བྱུང་། སྐུ་དེ་ཚོའི་གྲས་དེ་ལོ་ག་ཚོད་ཕྱིན་མ་ཕྱིན་ཞིབ་འཇུག་བྱེད་མཁན་ཚོར་སྟོན་སྐབས་ལོ་ཉིས་སྟོང་དྲུག་བརྒྱ་ལས་མང་བ་ཕྱིན་པ་ཤོད་བཞིན་འདུག དེར་བརྟེན་བོད་གངས་ཅན་ལྗོངས་ཀྱི་སྔོན་གྱི་བསྟན་ཚིགས་ལོ་ག་ཚོད་ཕྱིན་པའི་བསྟན་ཚིགས་གནང་མཁན་ཚོ་ཁག་གཅིག་གིས་གསུང་དོན་ལྟར་ན། ལོ་ངོ་སུམ་སྟོང་ཕྱིན་པ་གསུང་བཞིན་འདུག་པས་དེར་ཉམས་ཞིབ་བྱ་རྒྱུ་ཞིག་ཆགས་འདུག བསྟན་པའི་ཆོས་ཡོངས་གྲགས་ལོ་ཉིས་སྟོང་དྲུག་བརྒྱ་ཕྱིན་པ་དེར་བར་སྐབས་འཛམ་གླིང་འདིའི་སྟེང་དར་གུད་མང་པོ་བྱུང་ཡོད། འོན་ཀྱང་དུས་རབས་ ༢༡ འདིའི་ནང་མི་བསམ་བློ་ཡོད་མཁན་ལུང་ཙམ་ལ་ཆོག་ཤེས་མ་བྱས་པར་ཞིབ་འཇུག་དང་བརྟག་དཔྱད་བྱེད་མཁན་མང་དག་ཅིག་གིས་སངས་རྒྱས་ཀྱི་ཆོས་ལ་དོ་སྣང་གསར་པ་ཞིག་སླེབས་ཀྱི་འདུག དཔེར་ན། ཚན་རིག་པའི་ནང་ནས་མང་པོ་ཞིག་གིས་སངས་རྒྱས་པའི་ཆོས་ཀྱི་འགྲེལ་བཤད་ཐོག་ལ་དམིགས་བསལ་གྱིས་དོ་སྣང་བྱེད་བཞིན་འདུག བཅོམ་ལྡན་འདས་ཀྱིས། །དགེ་སློང་བདག་གམ་མཁས་རྣམས་ཀྱིས། །བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བ་བྱ་ཡི་གུས་ཕྱིར་མིན། ཞེས་གང་ལྟར་བརྟག་དཔྱད་བྱེད་དགོས་གསུངས་ཡོད། འདས་པའི་ལོ་ཉིས་སྟོང་ལྷག་གི་རིང་ལ་བསྟན་པའི་རྗེས་འབྲང་ཀླུ་སྒྲུབ་ཡབ་སྲས་སོགས་ཀྱིས་བཅོམ་ལྡན་འདས་ཉིད་ཀྱིས་བཀའ་དང་ལུང་གང་ཞིག་སྒྲ་ཇི་བཞིན་ཁས་བླང་རུང་མི་རུང་དང་བཅོམ་ལྡན་འདས་ཀྱི་བཀའ་ཡིན་རུང་རིག་པའི་གནོད་པ་ཡོད་ན། དགོངས་པ་གཞན་དུ་འགྲེལ་དགོས་པ་ཞིག་བྱུང་ཡོད། དེ་རིང་ཁ་སང་དུས་རབས་ ༢༡ ནང་སངས་རྒྱས་ཀྱི་ཆོས་ལ་རྣམ་དཔྱོད་ཅན་དེ་ཚོས་གཞི་ནས་དོ་སྣང་གསར་པ་བྱ་རྒྱུ་ཞིག་ཕལ་ཆེར་ཆགས་ཡོད། དེ་བཞིན་ཆོས་ལུགས་ལ་ལྟ་གྲུབ་ཡོད་མཁན་གཅིག་དང་མེད་མཁན་གཅིག་གཉིས་ཡོད། ལྟ་གྲུབ་ཡོད་མཁན་གྱི་རིགས་དེའི་ནང་འཇིག་རྟེན་བཀོད་པ་པོ་འདོད་མཁན་གྱི་སྡེ་ཚན་གཅིག་དང་། འཇིག་རྟེན་བཀོད་པ་པོ་མི་འདོད་མཁན་གྱི་སྡེ་ཚན་གཅིག་ཡོད།
ཆོས་ལུགས་ཡག་ཉེས་ཤོད་དགོས་བྱུང་ན་དེ་ལྟར་ཤོད་ཐུབ་རྒྱུ་ཁག་པོ་རེད། ང་ཚོ་ནང་པ་ཚོས་ནང་པའི་ཆོས་དེ་ཡག་ཤོས་ཡིན་ཞེས་བརྗོད་ཐབས་མེད། དཔེར་ན། སྨན་ལ་ཆ་མཚོན་ན་ནད་པའི་ནད་ལ་གཞིགས་པའི་སྨན་ཡག་ཉེས་ལས་སྨན་དེ་ཡག་པོ་འདུག་ཅེས་ཤོད་ཐུབ་ཀྱི་མ་རེད། སྨན་རིན་གོང་ཆེ་ཆུང་གི་སྐད་ཆ་མ་བཤད་པར་སྨན་ནད་པར་ཕན་མི་ཕན་གྱིས་སྐད་ཆ་ཤོད་དགོས། དེར་བརྟེན་གང་ཟག་རིགས་འགའ་ཞིག་ལ་འཇིག་རྟེན་བཀོད་པ་པོའི་རྣམ་གཞག་ལྟ་གྲུབ་ཀྱི་རྒྱབ་རྟེན་ཡོད་པའི་ཆོས་བརྒྱུད་དེ་སེམས་ལ་ཕན་ཆེ་བ་དེ་འདྲ་མང་པོ་ཡོང་གི་རེད། དེ་ལྟ་བུའི་གདུལ་བྱའི་ཁམས་དང་མོས་པའི་དབང་གིས་འཇིག་རྟེན་བཀོད་པ་པོ་འདོད་མཁན་གྱི་ལྟ་གྲུབ་དང་འདྲེས་པའི་ཆོས་བརྒྱུད་དེ་ཕན་ཐོགས་ཆེ་བ་འདུག གང་ལྟར་ངོས་ཀྱིས་ནམ་རྒྱུན་ནས་རང་རང་སོ་སོའི་ཆོས་བརྒྱུད་ལ་དད་པ་བྱས་པ་དང་ཆབས་ཅིག་ཆོས་བརྒྱུད་ཚང་མར་གུས་པ་བྱ་རྒྱུ་གལ་ཆེན་རེད་ཅེས་བརྗོད་བཞིན་ཡོད། ང་ཚོ་ཕ་མེས་ནས་ནང་པའི་ཆོས་བརྒྱུད་འཛིན་མཁན་ཞིག་ཆགས་ཡོད། སོ་སོས་ཉམས་ལེན་བྱ་རྒྱུ་དེ་སངས་རྒྱས་ཀྱི་ཆོས་ལུགས་རེད། འོན་ཀྱང་ཆོས་ལུགས་ཚང་མར་གུས་པ་བྱ་རྒྱུ་དེ་ཡང་ཧ་ཅང་གལ་ཆེན་པོ་རེད། འཛམ་གླིང་འདིའི་སྟེང་ཆོས་ལུགས་མི་འདྲ་བ་རྒྱུ་མཚན་དུ་བྱས་ཏེ་འཁྲུག་པ་རྒྱག་རྒྱུ་དེ་འདྲ་ཡོང་གི་འདུག དེ་ཚོའི་གྲས་ཏེ་ཆོས་ནས་གསུངས་པའི་བསླབ་བྱ་དེ་དག་ཉམས་ལེན་བྱ་རྒྱུ་མ་ཤེས་པར་ཆོས་ལ་ཞེན་ཁོག་བྱ་རྒྱུ་ཤེས་པའི་གཉེར་ལེན་རེད། ཆོས་ལུགས་གཙོ་ཆེ་བ་ཚང་མའི་ནང་གཞན་ལ་གནོད་པ་མ་བྱས་པར་བཟོད་པ་སྒོམ་ཞེས་གསུངས་ཡོད། ངོས་ཀྱིས་ངོ་ཤེས་ཁ་ཆེའི་ཆོས་པ་ཞིག་ཡོད། ཁོང་གིས་ཁ་ཆེས་འཇིག་རྟེན་བཀོད་པ་པོ་དཀོན་མཆོག་ལ་ཨ་ལ་ཟེར་གྱི་ཡོད། ཨ་ལར་གུས་བརྩི་བྱས་པ་བཞིན་ཨ་ལ་ཡིས་བཀོད་པའི་སེམས་ཅན་ཚང་མར་བརྩེ་བ་བྱེད་དགོས་ཞེས་བརྗོད་ཀྱི་འདུག བྱམས་བརྩེ་དང་འགལ་ཟླ་ཡོང་སྐབས་བཟོད་པ་སྒོམ་དགོས་རྒྱུ་སོགས་ཆོས་ལུགས་ཚང་མས་གསུང་གི་ཡོད། དཔེར་ན། ང་ཚོ་ནང་པའི་ནང་བཅོམ་ལྡན་འདས་ཀྱིས་གསུངས་པའི་ཆོས་ཀྱི་བསླབ་བྱ་དེས་སོ་སོའི་སེམས་རྒྱུད་འདུལ་རྒྱུའི་ཚབ་ཏུ་ཆོས་དེ་ཆགས་སྡང་ལ་བེད་སྤྱོད་བྱ་རྒྱུ་དེ་འདྲ་ཡོང་གི་འདུག སྤྱིར་བཏང་ཆོས་ཁས་བླང་དང་མི་བླང་སོ་སོའི་རང་དབང་རེད། སུ་གཅིག་གིས་ཨ་ཚུགས་བརྒྱབ་སྟེ་ཆོས་བྱེད་དགོས་རེད་ཅེས་ནང་པའི་ངོས་ནས་ཧ་ལམ་ཤོད་ཀྱི་མེད། ཆོས་ཁས་བླང་ན་བསམ་པ་རྣམ་དག་དང་རྒྱབ་མདུན་ངོ་ལྐོག་མེད་པ་བྱ་རྒྱུ་དེ་ཧ་ཅང་གལ་ཆེན་པོ་རེད། ཆོས་ནས་གསུངས་པའི་བསླབ་བྱ་དེ་སོ་སོའི་ཉིན་རེེའི་མི་ཚེའི་ནང་ལག་ལེན་བསྟར་དགོས། ངོས་ཀྱིས་ནམ་རྒྱུན་རྩེད་མོ་དང་སྦྲགས་ཤོད་བཞིན་ཡོད། ཕྱེད་ཀ་རྩེེད་མོ་ཡིན་ཡང་ཕྱེད་ཀ་ངོ་ཐོག་ཡིན། འཛམ་གླིང་འདིའི་ཐོག་ལྐོག་ཟ་རུལ་སུངས་བྱེད་མཁན་ག་ཚོད་མི་འདུག་གམ། ཁྱེད་རང་ཚོ་ཀོ་རི་ཡའི་ནང་དུའང་ཕལ་ཆེར་ལྐོག་ཟ་རུལ་སུངས་བྱེད་མཁན་ཏན་ཏན་ཡོད་ཀྱི་རེད། ལྐོག་ཟ་རུལ་སུངས་བྱེད་མཁན་མང་དག་ཅིག་གིས་སོ་སོའི་དཀོན་མཆོག་ལ་དད་པ་བྱས་ཏེ་སྨོན་ལམ་རྒྱག་གི་ཡོད། ལྐོག་ཟ་རུལ་སུངས་བྱ་རྒྱུར་ཐེ་ཚོམ་རྩ་བ་ནས་མེད་མཁན་གྱི་མི་ཞིག་གིས་དཀོན་མཆོག་ལ་གསོལ་བ་བཏབ་ནས་ཕྱག་མཆོད་འབུལ་བྱས་ཏེ་ཧ་ལམ་ངས་དཀོན་མཆོག་ཁྱེད་རང་གི་དགོངས་པ་འགལ་བ་ཞིག་བྱེད་བཞིན་ཡོད་པས་དེ་ལམ་འགྲོ་ཡོང་རྒྱུ་སྐྱབས་འཇུག་གནང་རོགས་ཞེས་པ་ལྟ་བུ་རེད།
མི་གཞན་ལ་མགོ་སྐོར་དང་སྐྱག་རྫུན་བཤད་དེ་རང་ཉིད་གང་དྲན་བྱེད་ཅེས་ཆོས་ལུགས་ཚང་མའི་ནང་གསུངས་མེད། དེ་ལྟ་བུའི་གནས་སྟངས་འོག་ནས་མིར་མགོ་སྐོར་དང་སྐྱག་རྫུན་བཤད་དེ་ལྐོག་གཡོ་ངན་བྱུས་ཐོག་ནས་ལྐོག་ཟ་རུལ་སུངས་བྱ་རྒྱུ་དེ་དཀོན་མཆོག་གི་དགོངས་པ་འགལ་བ་མ་ཟད། ཆོས་ཀྱི་བསླབ་བྱ་དང་འགལ་ཡོད། ཆོས་ལ་ངོ་རྒོལ་བྱེད་མཁན་དེ་ཚོའི་གྲས་ནས་ལྐོག་ཟ་རུལ་སུངས་བྱས་ཀྱང་མིང་དོན་མཚུངས་པ་རེད། དྲང་བདེན་དང་ཆོས་ལ་བརྩི་འཇོག་མེད་ཅེས་བརྗོད་ནས་སྐྱག་རྫུན་མང་དག་ཅིག་བཤད་ཀྱང་ཁྱད་པར་གང་ཡང་མི་འདུག དེ་མིན་ཆོས་ལ་དད་པ་བྱེད་བཞིན་མ་རབས་ཀྱི་ལས་ཀ་འཛེམས་ཟོན་སྤུ་ཙམ་མེད་པ་བྱས་ན་ཐབས་སྐྱོ་པོ་རེད། སོ་སོ་ཐབས་སྡུག་པ་བརྗོད་མེད་ཡིན་པ་མ་ཟད། ཆོས་ལ་མཚན་ཤས་ཡོང་གི་རེད། འཛམ་གླིང་འདིའི་ཐོག་རྙོག་གྲ་མང་དག་ཅིག་ཡོད། དཔལ་འབྱོར་ལོངས་སྤྱོད་ལ་ཆ་བཞག་ན། མིའི་འདོད་རྔམ་གྱིས་གཞན་དབང་དུ་ཕྱིན་པ་རེད་ཅེས་དཔལ་འབྱོར་མཁས་པ་མང་པོས་ཤོད་བཞིན་འདུག དེ་བཞིན་ཁོར་ཡུག་ལ་ཉམས་ཉེས་ཆེན་པོ་ཡོད་པ་དེ་ཡང་འདོད་རྔམ་གྱིས་གཞན་དབང་དུ་ཕྱིན་པས་རེད་འདུག གང་ལྟར་འཛམ་གླིང་འདིའི་ཐོག་ཆོས་ལུགས་དེ་དག་དགོས་མཁོ་ལྡན་པ་ཞིག་ཆགས་ཡོད། མདོར་ན།
ཆོས་ལུགས་ཚང་མ་མཐུན་སྒྲིལ་བྱ་རྒྱུ་གལ་ཆེན་པོ་རེད། ཡ་རབས་སྤྱོད་བཟང་བྱ་རྒྱུའི་དེ་དག་གལ་ཆེན་པོ་ཆགས་ཡོད། དེ་ལྟར་ཡོང་བར་ཡིན་གཅིག་མིན་གཅིག་ཆོས་དད་དགོས་སམ་ཞེས་བརྗོད་ན། བསམ་བློ་གཏོང་རྒྱུ་ཞིག་རེད། ཡ་རབས་སྤྱོད་བཟང་ཞེས་བརྗོད་ན། ཡིན་གཅིག་མིན་གཅིག་ཆོས་དད་ཅིག་ལ་རྟེན་དགོས་ཀྱི་རེད་ཅེས་བརྗོད་མཁན་ཆོས་པ་རིགས་ཤིག་འདུག གལ་སྲིད་དེ་ལྟར་བྱས་ན་ཕྲན་བུ་རྒྱ་ཆུང་བ་ཆགས་ཀྱི་ཡོད། དངོས་ཡོད་གནས་ཚུལ་ལ་འཛམ་གླིང་འདིའི་ཐོག་ཆོས་བརྒྱུད་ཆེན་པོ་གང་འདྲ་ཡིན་ཡང་འཛམ་གླིང་ཀུན་ལ་ཁྱབ་ཅེས་པ་དེ་ཡོང་ཐབས་མེད། ཡ་རབས་ཀྱི་སྤྱོད་བཟང་ཞེས་པ་དེ་འཛམ་གླིང་ཡོངས་ལ་ཁྱབ་ཐུབ་ཀྱི་ཡོད། འཛམ་གླིང་ཡོངས་ལ་ཁྱབ་དགོས་པའི་བསླབ་ཆ་ཞིག་ཆོས་དད་ཅིག་གི་ཐོག་བཞག་ན། ཆོས་དད་ཅིག་འཛམ་གླིང་ཡོངས་སུ་རྫོགས་པར་ཁྱབ་ཐུབ་པ་ཞིག་ཡོང་ཐབས་མེད། དེར་བརྟེན་ཡ་རབས་སྤྱོད་བཟང་ཞེས་པ་དེ་འཛམ་གླིང་འདིའི་སྟེང་དགོས་ཀྱི་ཡོད། དེ་བཞིན་ཆོས་བརྒྱུད་མི་འདྲ་བའི་ནང་སོ་སོའི་ཕ་མེས་ནས་ལོ་ངོ་བརྒྱ་ཕྲག་མང་པོ་བརྒྱུད་པ་ཞིག་ཡོད། དཔེར་ན། ཀོ་རི་ཡ་དང་རྒྱ་ནག་ལ་ཆ་བཞག་ན། ཕ་མེས་ནས་སངས་རྒྱས་ཀྱི་ཆོས་བྱེད་མཁན་ཞིག་ཆགས་ཡོད། ཡུལ་མིའི་ནང་ལ་ཆོས་ལུགས་འདྲ་མིན་བྱེད་མཁན་ཡོང་གི་རེད། འོན་ཀྱང་སྤྱི་ཡོངས་ནས་ཀོ་རི་ཡར་ཆ་བཞག་ན། ནང་པའི་ལུང་པ་ཞིག་ཆགས་ཡོད། དེར་བརྟེན་སོ་སོའི་ཕ་མེས་ཀྱི་ཆོས་ལུགས་དེ་དག་བརྒྱུད་འཛིན་བྱ་རྒྱུ་གལ་ཆེན་ཆགས་ཡོད་ཅེས་བཀའ་སློབ་སྩལ་ཏེ་སྔ་དྲོ་ཆོས་ཐུན་གཅིག་དང་ཕྱི་དྲོ་ཆོས་ཐུན་གཅིག་སྩལ་ཡོད། དེ་བཞིན་བཀའ་ཆོས་རྣམས་ཀོ་རི་ཡ་དང་དབྱིན་ཇི། སི་པན་ནི་ཤི། རྒྱ་སྐད། ར་ཤི་ཡ་སོགས་ཀྱི་སྐད་ནང་གསུང་བསྒྱུར་གྱིས་མཐུན་རྐྱེན་བསྐྲུན་ཡོད་པ་བཅས། །
