༢༠༡༡ ཟླ་ ༡༠ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ནས་སྡེ་ར་ལྡུན་དུ་ཆིབས་སྒྱུར་བསྐྱངས་སྐབས་དད་ལྡན་སེར་སྐྱ་མང་ཚོགས་རྣམས་ཀྱིས་ལག་ཏུ་དཀར་གཙང་མཇལ་དར་དང་དྲི་བཟང་སྤོས་སྣེ་ཐོགས་ཏེ་ཕེབས་སྐྱེལ་ཞུས་ཡོད།
མགོན་པོ་གང་ཉིད་མཆོག་གིས་སྡེ་ར་ལྡུན་དུ་རྟེན་གཞི་བྱས་པའི་ཌུན་སློབ་གྲྭར་(Doon School)ཆིབས་སྒྱུར་བསྐྱངས་རྗེས་ཕྱེད་ཡོལ་ལྡི་ལི་དང་དེ་ནས་མཁའ་ལམ་བརྒྱུད་ཉི་ཧོང་དུ་ཆིབས་སྒྱུར་བསྐྱང་རྒྱུ་ཡིན་འདུག
དེ་ཡང་ཉི་ཧོང་ནང་པའི་ཆོས་ཚོགས་ཤིག་གིས་མགོན་པོ་གང་ཉིད་མཆོག་ལ་ཇི་ལྟར་སྔོན་ནས་གསོལ་འདེབས་ཞུ་དོན་ལྟར་བཀའ་བཞེས་ཟབ་མོ་ཐོབ་སྟེ་ཟླ་བ་འདིའི་ཕྱི་ཚེས་ ༣༠ ཉིན་གྱི་ཕྱེད་ཡོལ་༸གོང་ས་མཆོག་གིས་མ་ཡེ་ཤི་མ་(Maishima Arena) ཚོགས་ཁང་ནང་དཀའ་ངལ་ཆེ་བའི་དུས་སྐབས་སུ་བདེ་སྐྱིད་འཚོལ་བ་(Finding Happiness in Troubled Times)ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་རྒྱུ་དང། ཕྱི་ཟླ་ ༡༡ ཚེས་ ༡ དང་ ༢ བཅས་ཉིན་གྲངས་གཉིས་རིང་ཀོ་ཡ་སན(Koyasan)དུ་རྡོར་དབྱིངས་ཀྱི་རྗེས་གནང་སྩལ་རྒྱུ་ཡིན་འདུག ཕྱི་ཚེས་ ༣ ཉིན་ཀོ་ཡ་སན་གཙུག་ལག་སློབ་ཁང་(Koyasan University) གི་སློབ་དཔོན་དང་སློབ་ཕྲུག་རྣམས་དང་ལྷན་བགྲོ་གླེང་མཛད་རྒྱུ། ཕྱི་ཚེས་ ༥ ཉིན་གྱི་ཕྱེད་ཡོལ་སེན་ཌ་ཡི་ཀུ་ཤོ་ཇི་དགོན་པར་(Sendai Koushoji Temple) མང་ཚོགས་ལ་བཀའ་སློབ་སྩལ་རྒྱུ་ཡིན་པ་དང། ཕྱི་ཚེས་ ༦ ཉིན་སེན་ཌ་ཡི་སེ་ཝ་ཡི་ནང་པའི་སློབ་གྲྭར་བཀའ་སློབ་སྩལ་རྒྱུ་དང་། དེ་ཉིན་ཕྱེད་ཡོལ་དུ་ནི་ཅི་ས་ཡི་གཙུག་ལག་སློབ་གཉེར་ཁང་(Nichi Sai University)དུ་བཀའ་སློབ་སྩལ་རྒྱུ་ཡིན་འདུག་པ་བཅས།།