༢༠༡༡ ཟླ་ ༩ ཚེས་ ༢༨ རེས་གཟའ་ལྷག་པ།
༄༅། །ཨ་རིའི་གཞུང་ཕྱོགས་ནས་ཉེ་ལམ་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་གཞོན་སྐྱེས་གཉིས་ཀྱིས་བོད་བསྟན་སྲིད་མི་རིགས་ཀྱི་ཆེད་རང་ལུས་མེར་སྲེག་བཏང་བའི་དོན་རྐྱེན་བྱུང་བར་ཧ་ཅང་བློ་འཚབ་ཆེན་པོའི་ཐོོག་ནས་རྒྱ་ནག་གཞུང་ལ་བོད་མི་ཚོའི་དཀའ་ངལ་སེལ་དགོས་པའི་རེ་འདུན་ཤུགས་ཆེ་བཏོན་ཡོད། དེ་ཡང་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པས་གསལ་བསྒྲགས་ཤིག་སྤེལ་བའི་ནང་འཁོད་དོན། བོད་མི་ཚོའི་དཀའ་ངལ་ཇེ་ཆེར་འགྲོ་བཞིན་པའི་གནས་སྟངས་དེའི་འོག་ང་ཚོས་རྒྱ་ནག་གི་དབུ་ཁྲིད་ཚོས་བོད་མི་ཚོའི་ཐོབ་ཐང་ལ་བརྩི་བཀུར་ཞུ་དགོས་པའི་རེ་འདུན་ཤུགས་ཆེ་ཞུ་རྒྱུ་ཡིན།
ཞེས་སོགས་འཁོད་ཡོད་པ་མ་ཟད། པེ་ཅིང་གཞུང་ནས་བོད་མི་ཚོའི་ཐུན་མིན་ཆོས་དང་རིག་གཞུང། སྐད་ཡིག་བཅས་པ་སྲུང་སྐྱོབ་དགོས་པའི་རེ་འདུན་ཡང་བཏོན་ཡོད། ཕྱོགས་མཚུངས་ཨ་རིའི་གཞུང་གིས་རྒྱ་ནག་གཞུང་ལ་བོད་ཀྱི་ས་ཁུལ་ཁག་གི་ནང་གསར་འགོད་པ་དང་གཞུང་འབྲེལ་མི་སྣ་ཁག་དངོས་ཡོད་གནས་ཚུལ་རྟོག་ཞིབ་ཆེད་འགྲོ་སྐྱོད་བྱ་རྒྱུའི་ཆོག་མཆན་སྤྲོད་དགོས་པའི་དགོས་འདུན་ཡང་བཏོན་འདུག་པ་བཅས།།