༢༠༡༡ ཟླ་ ༩ ཚེས་ ༥ རེས་གཟའ་ཟླ་བ།
༄༅། །འདི་གར་ཅོན་ཏ་ར་ས་གནས་འགོ་འཛིན་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༩ ཚེས་ ༢ རེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༩།༠༠  ཐོག་སྦིར་ནང་ཆེན་ཅོན་ཏ་རའི་ཁྱབ་ཁོངས་དགོན་སྡེ་ཁག་གི་སྐུ་ཚབ་དང། སློབ་ཕྲུག མང་ཚོགས་བཅས་ཀྱིས་རང་ལུགས་ཀྱི་གཟབ་མཆོར་ལེགས་པར་གྱོན་ཏེ་ཅོན་ཏ་ར་ནང་ཆེན་ཚོགས་ཁང་དུ་འདུ་འཛོམས་གནང་ཡོད། དེ་ནས་དཔལ་མཆོག་གླིང་དགོན་པའི་སྐུ་ཚབ་ནས་གོ་སྒྲིག་འོག་ས་གནས་གྲོས་ཚོགས་ཀྱི་ཚོགས་གཙོ་དང་། ས་གནས་འགོ་འཛིན་གཉིས་ཀྱིས་༸གོང་ས་མཆོག་གི་སྐུ་དཔར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས་དགེ་ལས་སློབ་ཕྲུག་དང་། མང་ཚོགས་ནས་རིམ་བཞིན་མཇལ་ཕྱག་ཕུལ། དེ་རྗེས་འཕགས་བོད་གཉིས་ཀྱི་རྒྱལ་གླུ་དང། མང་གཙོ་གསར་བཞད་སྐད་སངས་མཐོ་པོའི་བཏང་གྲུབ་མཚམས་གསོལ་ཇ་འབྲས་སིལ་ཕུལ།  དེ་ནས་ས་གནས་འགོ་འཛིན་བསྟན་འཛིན་རབ་དགའ་ལགས་ཀྱིས་དུས་ཆེན་ངོ་སྤྲོད་དང་། བཙན་བྱོལ་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་མཆོག་གིས་གསུང་བཤད་སྒྲོགས་སྦྱང་གནང་སྟེ་གསུང་དོན། གཞི་རིམ་མང་གཙོ་ཚད་ལྡན་ཞིག་ཡོང་རྒྱུར་མི་མང་ཡོངས་ནས་དམ་ཚིག་རྡོག་རྩ་ཆིག་སྒྲིལ་ཐོག་རང་རང་སོ་སོའི་ལས་འགན་བསྒྲུབ་དགོས་པ་དང་། དམིགས་བསལ་ད་ལན་དབུས་གཙང་སྤྱི་འཐུས་དངོས་གཞི་འོས་བསྡུ་སྐབས་གཞུང་གྲོན་བསྲི་ཚགས་ཡོང་རྒྱུར་མང་ཚོགས་ནས་ཆ་ཤས་ངེས་པར་དུ་ལེན་གནང་དགོས་པའི་འབོད་སྐུལ་ཞུས་ཡོད། དེ་བཞིན་ཁོང་གིས་ཉིན་ཤས་སྔོན་བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ་མཆོག་སྙུན་གཞི་བཞེས་ཏེ་དགོངས་པ་རྫོགས་པའི་ཡིད་སྐྱོའི་གནས་ཚུལ་བྱུང་བར་བརྟེན་དམ་པ་འདི་ཉིད་ཀྱི་ལོ་རྒྱུས་སྙིང་བསྡུས་སྒྲོགས་སྦྱང་དང་། ཕྱི་ཚེས་ ༡ ཉིན་དཔལ་ལྡན་བཀའ་བློན་ཁྲི་པ་མཆོག་དང། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གིས་དབུས་པའི་རྒྱུན་ལས་རྣམ་པ། དཔལ་ལྡན་སི་ཏུ་རིན་པོ་ཆེ་མཆོག སྦིར་སྡེ་ནང་གསུམ་གྱི་ས་གནས་འགོ་འཛིན། རྡ་སྟེང་བོད་ཁྱིམ་དབུས་སྤྱི་ཁྱབ་འགན་འཛིན། དགོན་སྡེ་ཁག་གི་འགན་འཛིན། སློབ་གྲྭ་ཁག་གི་སྐུ་ཚབ་བཅས་ནས་དམ་པ་ཁོང་ལ་གདུང་སེམས་མཉམ་སྐྱེ་སླད་ཆེད་བཅར་གནང་ཡོད་པ་སོགས་མང་ཚོགས་ལ་གསལ་བཤད་གནང་རྗེས་མྱ་ངན་གུས་འདུད་མཚོན་ཆེད་ངག་བཅད་སྐར་མ་ ༣ གནང་ཡོད། དེ་ནས་ས་གནས་གྲོས་ཚོགས་ཚོགས་གཙོ་བསོད་ནམས་གཡུ་རྒྱལ་ལགས་ཀྱིས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་ཞུས་མཚམས་ལས་དྲུང་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་གཞུང་འབྲེལ་མཛད་སྒོ་ལེགས་གྲུབ་བྱུང་ཡོད། སྤྱིར་བཏང་མང་གཙོ་དུས་ཆེན་ཉིན་ལོ་ལྟར་སློབ་གྲྭ་ཁག་གིས་རོལ་དབྱངས་དང་། གཞས་སྣ་སོགས་གོ་སྒྲིག་ཞུས་མུས་ཡིན་ཡང་ད་ཐེངས་ཡིད་སྐྱོའི་གནས་ཚུལ་བྱུང་སྟབས་དེ་ལྟར་གནང་མེད།
ཕྱོགས་མཚུངས་དེ་ཉིན་ནང་ཆེན་བཟོ་ཚོགས་ཀྱི་མི་མང་ཚོགས་ཆེན་ཐེངས་གཉིས་པ་དེ་སྐོ་ཚོགས་གནང་ཡོད། ཚོགས་འདུར་ས་གནས་གྲོས་ཚོགས་ཀྱི་ཚོགས་གཙོ་དབུ་བཞུགས་ཐོག་ཚོགས་པ་ཡར་རྒྱས་ཇི་གཏོང་སྐོར་ལེགས་སྤེལ་ཉེས་འགོག་དགོངས་འཆར་བསྡུ་རུབ་དང་། དེ་ནས་ས་གནས་འོས་བསྡུ་ཚོགས་ཆུང་ནས་སྦིར་ཅོན་ཏ་ར་ནང་ཆེན་འཐུས་མི་བཞི། ཞབས་རིམ་ཚོགས་ཆུང་གི་ཚོགས་མི། སྦིར་དགེ་རྒན་ཕ་མའི་ཚོགས་མི། ཅོན་ཏ་ར་ནང་ཆེན་ཆུ་ལས་པ་བཅས་འོས་བསྡུ་ལམ་ནས་འདེམས་བསྐོ་བྱས་པའི་འཐུས་མི་གསར་རྙིང་རྣམས་ལ་དཔལ་མཆོག་གླིང་དགོན་པའི་སྐུ་ཚབ་ནས་མཇལ་དར་ཕུལ་ཡོད་པ་བཅས།།