༢༠༡༡ ཟླ་ ༩ ཚེས་ ༢༦ རེས་གཟའ་ཟླ་བ།
༄༅། །འདི་གར་བདེ་སྲུང་ལས་ཁུངས་ནས་ཕྱི་ལོ་ ༢༠༡༡ ཟླ་ ༩ ཚེས་ ༢༤ ཉིན་བཏང་གནས་ནང་འཁོད་དོན།  བདེ་སྲུང་ལས་ཁུངས་དང་། བཙན་རྒོལ་རྒྱལ་སྐྱོབ་གསུམ་སྦྲེལ་ལས་ཁུངས་ནང་ལྷག་བློ་ཆེ་བསྐྱེད་ཀྱི་ཞབས་ཞུ་ཡུན་རིང་གནང་མཁན་ལས་བྱེད་རྒན་གྲས་སྐུ་ཞབས་ཀུན་གླིང་ཐུབ་བསྟན་རྒྱལ་མཚན་ལགས་ཕྱི་ལོ་ ༢༠༡༡ ཟླ་ ༩ ཚེས་ ༢༣ བོད་ཟླ་ ༧ ཚེས་ ༢༧ རེས་གཟའ་པ་སངས་སྔ་དྲོའི་ཆུ་ཚོད་ ༩།༣༠ ཐོག་དགུང་གྲངས་ ༨༤ ལ་སྨན་བཅོས་དང་རིམ་འགྲོ་གང་གིས་བཟློག་མེད་རྡོར་གླིང་ཀ་ལམ་སྨན་ཁང་དུ་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་འདུག
ཀུན་གླིང་ཐུབ་བསྟན་རྒྱལ་མཚན་མཆོག་ནི་ཕྱི་ལོ་ ༡༩༣༠ ལོར་བོད་ཀྱི་རྒྱལ་ས་ལྷ་སར་སྐུ་འཁྲུངས། ཕྱི་ལོ་ ༡༩༥༩ བོད་ཟླ་གསུམ་པའི་ནང་སྐུའི་གཅེན་པོ་རྒྱ་ལོ་དོན་གྲུབ་མཆོག་དང་། སྲིད་བློན་ཀླུ་ཁང་པ་རྣམ་གཉིས་མཇལ་འཕྲད་ཀྱིས་བོད་བསྟན་སྲིད་ཆེད་ཕྱག་ལས་གནང་འགོ་བརྩམས།
ཁོང་ལོ་གཅིག་རིང་ཨ་རིར་གསང་ལས་སློབ་སྦྱོང་བྱེད་རིང་ཁོང་གིས་ཨང་དང་པོའི་བྱ་དགའ་བཞེས་པ་དང་། རྒྱ་གར་དུ་ཕྱིར་ལོག་ཕེབས་རྗེས་བོད་ནང་གསང་སྒྲིག་འཛུགས་ཐབས་ཀྱིས་མཚོན་བཙན་རྒོལ་རྒྱལ་སྐྱོབས་གསུམ་སྦྲེལ་ལས་ཁུངས་ནང་ཕྱག་ལས་གནང་།
ཕྱི་ལོ་ ༡༩༦༡ ལོ་འགོ་ནས་ཁོང་ལས་བྱེད་བདག་གཉེར་ཁང་གི་ལས་བྱེད་ལ་བསྐོ་གཞག་དང་འབྲེལ་ལས་བྱེད་འོས་མིག་འཚོལ་ཞིབ་གནང་བར་ས་གནས་ཁག་འགའ་ཞིག་ལ་ཕེབས་འདུག ཕྱི་ལོ་ ༡༩༦༡ ལོ་མཇུག་ནས་ནང་སྲིད་ལས་ཁུངས་ནས་ཁོང་ལ་དྭགས་བྱང་ཐང་བོད་མིའི་ས་གནས་འགོ་འཛིན་ལ་བསྐོ་གཞག་གིས་ཕྱི་ལོ་ ༡༩༦༢ ལོ་དཀྱིལ་བར་ཞབས་ཕྱི་ཞུས། དེ་ནས་རྡོར་གླིང་དང་ལྡི་ལིར་བཀའ་ཟུར་ལྷ་མོ་ཚེ་རིང་དམ་པ་མཆོག་གིས་ལམ་སྟོན་བཀོད་མངགས་ཕེབས་པ་ལྟར་གསང་བའི་ལས་བྱེད་མང་པོར་སློབ་སྟོན་དང་འབྲེལ་གསུམ་སྦྲེལ་ལས་ཁུངས་ནང་ཞབས་ཞུ་དང་། ཕྱི་ལོ་ ༡༩༦༨ ནས་ཕྱི་ལོ་ ༡༩༩༠ ཟླ་ ༡༢ ཚེས་ ༣༡ བར་ཁོང་གིས་རྡོ་གླིང་བོད་གནས་དཔྱད་ཞིབ་ཁང་གི་འགན་འཛིན་གྱི་ལས་འཁུར་ཞུས།
ཕྱི་ལོ་ ༡༩༩༡ ཟླ་ ༩ ཚེས་ ༢༧ ཉིན་བཀའ་ཤག་ནས་བདེ་སྲུང་ལས་ཁུངས་ཀྱི་སློབ་སྟོན་ཚོགས་ཆུང་གི་རྒྱུན་བཞུགས་ཚོགས་མིར་བསྐོ་གཞག་གནང་བ་ལྟར་ ༡༩༩༣ གི་ལོ་མཇུག་བར་བཞུགས་སྒར་རྡ་སར་སྤྱི་སྨན་ཞབས་ཞུ་གནང་ཡོད།
དམ་པ་ཁོང་ནི་བཙན་བྱོལ་དུ་འབྱོར་མ་ཐག་ནས་བོད་བསྟན་སྲིད་སླད་རྒྱལ་གཅེས་ལྷག་བསམ་ཆེན་པོས་ཕྱག་ལས་ལོ་མང་གནང་བའི་བྱས་རྗེས་ལ་སྙིང་ཐག་པ་ནས་རྗེས་སུ་ཡི་རང་ཞུ་བ་དང་འབྲེལ། དམ་པ་དེ་ཉིད་ཀྱིས་ཚེ་རབས་མང་པོར་བྱས་བསགས་སྡིག་ལྟུང་ཐམས་ཅད་དག་ཞིང་མགྱོགས་ནས་མྱུར་དུ་རྣམ་མཁྱེན་རྒྱལ་བའི་གོ་འཕང་ཐོབ་པ་དང་། ཤུལ་ལུས་ ནང་མི་ཡོངས་ལ་ཐུགས་གསོ་དང་རྗེས་དྲན་གུས་བཏུད་ཞུས་ཡོད་པ་བཅས།།