༢༠༡༡ ཟླ་ ༩ ཚེས་ ༧ རེས་གཟའ་ལྷག་པ།

༄༅། །འདི་གར་ཕྱི་ལོ་ ༢༠༡༡ ཟླ་ ༩ ཚེས་ ༧ ཉིན་མན་ཌིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། མན་ཌིའི་ཁྱབ་ཁོངས་བོད་མིའི་ས་གནས་འགོ་འཛིན་ལས་ཁུངས་ནས་དབུས་སྨན་རྩིས་ཁང་གི་སྐར་རྩིས་ཚན་པར་གཟའ་སྐར་འཕྲོད་སྦྱོར་རྩིས་འབྲས་སྐོར་རྗེས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་སུ་དེ་སྔ་ནས་ཞུས་དོན་ལྟར་མན་ཌིའི་ཁྱབ་ཁོངས་ས་གནས་འཐུས་ཚོགས་ཀྱི་ཚོགས་ཁང་གསར་པ་ཕྱི་ལོ་ ༢༠༡༡ ཟླ་ ༩ ཚེས་ ༥ སྔ་དྲོ་ཆུ་ཚོད་ ༡༡།༣༠ ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་དར་མཚོན་སྣ་ལྔ་གཅོད་འབྲེག་དང་སྦྲགས་དབུ་འབྱེད་གནང་སྟེ་ཚོགས་ཁང་ནང་ཕེབས་ཏེ་སྣང་གསལ་ཞལ་ཕྱེ་གནང༌། དེ་རྗེས་སྐུ་མགྲོན་རྣམ་པ་ལྷན་རྒྱས་དང་མི་མང་ཡོངས་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་ཕུལ།  དེ་ནས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་མཆོག་དང༌། ས་གནས་འཐུས་ཚོགས་ཀྱི་ཚོགས་གཙོ་བགྲེས་གཞོན་རྣམ་གཉིས། ས་གནས་འགོ་འཛིན་དང་ལས་བྱེད། རང་བདེན་ཚོགས་ཆུང་ཚོགས་མི་རྣམས་དང༌། སྤྱི་མི་རྣམ་པ། ས་གནས་འོས་བསྡུའི་ཚོགས་མི། གཞུང་འབྲེལ་མ་ཡིན་པའི་ཚོགས་གཙོ་དང་ཚོགས་མི། མང་ཚོགས་བཅས་ནས་རིམ་པས་མཇལ་དར་སྒྲོན་འབུལ་ཞུས། དེ་རྗེས་རྟེན་འབྲེལ་མཚོན་ཆེད་སྐུ་མགྲོན་རྣམ་པ་ལྷན་རྒྱས་དང་མང་ཚོགས་ལ་གསོལ་ཇ་འབྲས་སིལ་ཕུལ། དེ་ནས་ས་གནས་འགོ་འཛིན་བསྟན་འཛིན་གྱིས་ས་གནས་ཀྱི་ངོ་སྤྲོད་དང་མཛད་སྒོ་དབུ་འབྱེད་ཀྱི་ངོ་སྤྲོད་གྲུབ་མཚམས་སྤྱི་འཐུས་ཚོགས་གཞོན་མཆོག་གིས་ལས་སྣེ་རྣམས་དང་མང་ཚོགས་ལ་ཚོགས་ཁང་གསར་རྒྱག་ཟིན་པར་འཚམས་འདྲི་དང་སྦྲགས་གསུང་བཤད་དང་ལམ་སྟོན་གནང༌། དེ་རྗེས་ས་གནས་འཐུས་ཚོགས་ཚོགས་གཙོ་འཇམ་དབྱངས་ལགས་ཀྱིས་མཛད་སྒོའི་ཐོག་གསུང་བཤད་གནང༌།  ས་གནས་འཐུས་ཚོགས་ཚོགས་གཞོན་བསྟན་འཛིན་ཉི་མ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་མཛད་སྒོ་རྒྱལ་ཁའི་ངང་གྲོལ་རྗེས་སྐུ་མགྲོན་རྣམས་ལ་གསོལ་ཇ་ཞལ་ཏོག་ཕུལ་ཡོད་པ་བཅས།།