༢༠༡༡ ཟླ་ ༩ ཚེས་ ༢༣ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༢༢ ཉིན་གྱི་ཕྱེད་ཡོལ་ཆུ་ཚོད་ ༥།༣༠ ཙམ་ལ་བོད་མིའི་སྒྲིག་འཛུགས་ཀྱི་བཀའ་ཤག་ཡང་སྟེང་ཚོགས་ཁང་དུ་བཀའ་ཁྲི་མཆོག་དང་ཕྱི་དྲིལ་བཀའ་བློན་མཆོག ཕྱི་དྲིལ་དྲུང་ཆེ་རྣམ་གཉིས་བཅས་ཚང་འཛོམས་ཐོག ཉི་ཧོང་ནས་ཕེབས་པའི་གྲོས་ཚོགས་འཐུས་མི་གཉིས་ཀྱི་གཙོས་ཉི་ཧོང་གཞུང་གི་སློབ་སྟོན་མི་སྣ་ལྔ་བཅས་ཁྱོན་མི་སྣ་བདུན་ཙམ་གྱིས་བོད་ཀྱི་གནད་དོན་སེལ་ཆེད་དབུ་མའི་ལམ་གྱི་ཐབས་ལམ་དེར་རྒྱབ་སྐྱོར་ཤུགས་ཆེ་ཡོད་ཚུལ་བརྗོད་ཡོད། ཉི་ཧོང་ནས་ཕེབས་པའི་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱིས་སྣེ་ཁྲད་དེ་སྐུ་མགྲོན་རྣམས་དང་འབྲེལ་ཡོད་བོད་མིའི་སྒྲིག་འཛུགས་ཀྱི་མཛད་གཙོ་རྣམས་ཆུ་ཚོད་ ༥།༣༠ ནས་ ༧ ཡོལ་ཙམ་བར་གྲོས་མོལ་གནང་ཡོད།
དེ་ཡང་ཉི་ཧོང་ནས་ཕེབས་པའི་སྐུ་ཚབ་རྣམས་ནི་རང་དབང་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཧ་ཀུ་བཧུན་ཤི་མོ་མུ་ར་མཆོག་དང་ལྕམ་སྐུ་ཨེ་རི་ཀོ་ཡ་མ་ཏ་ནི་ལགས་དེ་བཞིན་ཉི་ཧོང་གི་གསར་འགོད་པ་གྲགས་ཅན་ཡོ་ཤི་ཀོ་ས་ཀུ་རི་ཡ་ལགས་བཅས་ཡིན། ཉི་ཧོང་ནས་ཕེབས་པའི་སྐུ་མགྲོན་རྣམས་ཀྱིས་ཕྱི་ཚེས་ ༢༡ ཉིན་༸གོང་ས་མཆོག་མཇལ་བཅར་ཞུས་ཡོད་པ་མ་ཟད། ཕྱི་དྲིལ་ལས་ཁུངས་ནས་ཉི་ཧོང་ནས་ཕེབས་པའི་སྐུ་མགྲོན་ཁོང་རྣམས་དང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་བཅས་ལ་གསོལ་སྟོན་ཡང་ཕུལ་ཡོད། གསོལ་སྟོན་སྐབས་སྤྱི་འཐུས་ཚོགས་གཙོ་མཆོག་གིས་འཛམ་གླིང་ཡུལ་གྲུ་འདྲ་མིན་ནང་ཡོད་པའི་གྲོས་ཚོགས་བོད་དོན་རྒྱབ་སྐྱོར་ཚོགས་མི་རྣམས་ཀྱི་སྐོར་གསལ་བཤད་གནང་སྟེ་འབྱུང་འགྱུར་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ནང་མཉམ་ཞུགས་གནང་རྒྱུའི་སེམས་ཤུགས་བསྐྲུན་ཐབས་གནང་ཡོད། ཕྱོགས་མཚུངས་སྐབས་དེར་སྐུ་མགྲོན་རྣམས་ནས་ཀྱང་བོད་དོན་ལ་རྒྱབ་སྐྱོར་ཞུ་དགོས་པའི་རྒྱུ་མཚན་གཙོ་བོ་གཅིག་ནི་བོད་མི་ཚོས་མཐའ་གཅིག་ཏུ་འཚེ་མེད་ཞི་བའི་ཐབས་ལམ་ཐོག་ནས་འབད་བརྩོན་བྱེད་བཞིན་ཡོད་པ་དེ་ཡིན་ལུགས་དང། བོད་ནང་དཀའ་སྡུག་མྱོང་བཞིན་པའི་བོད་མི་ཚོར་གདུང་སེམས་མཉམ་སྐྱེ་ཞུ་བཞིན་ཡོད་སྐོར་གསུངས། དེ་བཞིན་ཁོང་རྣམས་ཉི་ཧོང་དུ་ཕྱིར་ལོག་རྗེས་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་ལྷན་གོ་བསྡུར་གྱིས་ཕྱར་གྲུ་མཉམ་འདེགས་ཐོག་ནས་བོད་དོན་ལ་གང་ཐུབ་རྒྱབ་སྐྱོར་ཞུ་རྒྱུ་ཡིན་སྐོར་ཁས་ལེན་ཡང་གནང་ཡོད་པ་བཅས།།
