༢༠༡༡ ཟླ་ ༩ ཚེས་ ༡༣ རེས་གཟའ་མིག་དམར།

༄༅། །ཕྱི་ལོ་ ༢༠༡༡ ཟླ་ ༩ ཚེས་ ༡༡ རེས་གཟའ་ཉི་མའི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་མེཀ་སི་ཀོ་སི་ཊིའི(Mexico City) ཀ་ར་ཛི་ཨ་ཛུལ་(Cruz Azul)རྩེད་ཐང་ཆེན་མོར་མང་ཚོགས་གྲངས་ ༣༠༠༠༠ བརྒལ་བར་རྙོག་འཛིང་ཆེ་བའི་དུས་སྐབས་སུ་བདེ་སྐྱིད་འཚོལ་ཐབས། ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།

དེ་ཡང་ཐོག་མར་༸གོང་ས་མཆོག་སྡིངས་ཆའི་སྟེང་༸ཞབས་སོར་འཁོད་སྐབས་མེཀ་སི་ཀོ་སི་ཊིའི་ཆོས་ལུགས་འཛིན་སྐྱོང་ལྷན་ཁང་གི་འཐུས་མི་རྣམས་དང་ཨ་རིའི་སྙན་གྲགས་ཅན་གྱི་གློག་བརྙན་འཁྲབ་སྟོན་པ་སྐུ་ཞབས་རི་ཆ་ཌི་གྷེ་རི་མཆོག་བཅས་ཀྱིས་ཕེབས་བསུ་གཟབ་རྒྱས་ཞུས་པ་མ་ཟད།  སྐུ་ཞབས་རི་ཆ་ཌི་གྷེ་རི་མཆོག་གིས་མང་ཚོགས་ལ་༸གོང་ས་མཆོག་ངོ་སྤྲོད་ཞུས། དེ་རྗེས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ང་ཚོ་ཚང་མ་གཅིག་མཚུངས་ཡིན། ཚང་མས་བདེ་བ་འདོད་ཀྱི་ཡོད། བདེ་བ་བསྒྲུབ་རྒྱུའི་ཐོབ་ཐང་ཡང་ཚང་མར་གཅིག་མཚུངས་སུ་ཡོད་ཅེས་སོགས་ཀྱི་བཀའ་སློབ་ཆུ་ཚོད་གཅིག་ཙམ་རིང་སྩལ་གྲུབ་བསྟུན།
མང་ཚོགས་ཀྱི་དྲི་བར་བཀའ་ལན་མཛད། སྐབས་དེར་ཚོགས་བཅར་བ་ཞིག་གིས་ད་རེས་འདིར་བཅར་བའི་བོད་ཀྱི་རྒྱལ་དར་ལག་ཏུ་ཐོགས་པའི་མེཀ་སི་ཀོའི་མི་མང་ཚོར་གཟིགས་ཚུལ་ཇི་ཡོད་ཀྱི་དྲི་བ་ཞུས་པར་བཀའ་ལན་སྩལ་དོན། ངོས་རང་ཕྱི་ལོ་ ༡༩༥༤ ལོར་རྒྱ་ནག་ཏུ་བསྐྱོད་སྐབས་མའོ་ཙེ་ཏུང་གིས་བོད་མི་རང་ཉིད་ལ་རྒྱལ་དར་ཞིག་ཡོད་པ་དེ་བེད་སྤྱོད་གཏོང་དགོས་ཞེས་བརྗོད་བྱུང་། དེར་བརྟེན་གལ་ཏེ་བོད་ཀྱི་རྒྱལ་དར་འཕྱར་སྐབས་མི་གཞན་ཚོས་དགག་པ་བརྒྱབ་ཚེ་མའོ་ཙེ་ཏུང་གིས་ཀྱང་བོད་ཀྱི་རྒྱལ་དར་ལ་དགག་པ་གང་ཡང་བྱས་མེད་སྐོར་གསལ་བཤད་བྱེད་དགོས་སྐོར་བཀའ་ལན་སྩལ། སྐབས་དེར་མང་ཚོགས་སྟོང་ཕྲག་མང་པོས་ལག་ཏུ་འཛིན་བཞིན་པའི་བོད་ཀྱི་རྒྱལ་དར་གནམ་ལ་འཕྱར་གཡུག་བྱས་ཡོད།

༸གོང་ས་མཆོག་གིས་བཀའ་སློབ་སྩལ་གྲུབ་མཚམས་མང་ཚོགས་ཀྱིས་སི་པན་སྐད་ཐོག་གངས་རི་རྭ་བས་བསྐོར་བའི་ཞིང་ཁམས་སུ། ཕན་དང་བདེ་བ་མ་ལུས་འབྱུང་བའི་གནས། ཞེས་སོགས་ཀྱི་སྨོན་ལམ་མགྲིན་དབྱངས་གཅིག་གྱུར་ཐོག་བཏོན། ཕྱོགས་མཚུངས་སྡིངས་ཆའི་སྟེང་མེཀ་སི་ཀོའི་རིག་གཞུང་གི་མཉམ་གཞས་མ་རི་ཡ་ཆ་ (Mariacha) ཞེས་པ་དེ་གཟིགས་འབུལ་ཞུས་པ་དང་སྦྲགས། མེཀ་སི་ཀོ་སི་ཊིའི་ཆོས་ལུགས་འཛིན་སྐྱོང་ལྷན་ཁང་གི་འཐུས་མི་རྣམས་ཀྱིས་༸གོང་ས་མཆོག་དང་ལྷན་སྐུ་པར་བསྒྲོན་ཏེ་མཛད་སྒོ་ལེགས་པར་གྲུབ།

ཉིན་རྒྱབ་མགོན་པོ་གང་ཉིད་མཆོག་གིས་ལི་ཡན་ཌོ་ཝ་ལེ་རིག་གཞུང་བསྟི་གནས་ཁང་ཞེས་པ་དེར་ཆིབས་སྒྱུར་བསྐྱངས་ཏེ་མེཀ་སི་ཀོའི་ཤེས་ཡོན་ལམ་སྟོན་པ་ཚོར་སེམས་བཟང་པོ་དང་ཤེས་རབ་གོང་འཕེལ་གཏོང་ཐབས་སོགས་ཀྱི་སྐོར་ལམ་སྟོན་བཀའ་སློབ་སྩལ། སྐབས་དེར་ཤེས་ཡོན་སློབ་སྟོན་པ་ ༡༠༠༠ ཙམ་གྱིས་མཉམ་ཞུགས་བྱས་ཡོད། ༸གོང་ས་མཆོག་གི་བཀའ་སློབ་དེ་བཞིན་མེཀ་སི་ཀོ་རྒྱལ་ཡོངས་བརྙན་འཕྲིན་ཨ་ཛི་ཊེཀ་ (Azteca TV) ཞེས་པའི་ནང་མེཀ་སི་ཀོ་རྒྱལ་ཡོངས་སུ་ཐད་ཀར་རྒྱང་སྲིང་ཞུས་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་མེཀ་སི་ཀོའི་ནང་ཉིན་གསུམ་གྱི་མཛའ་འཕྲིན་རྣམས་ལེགས་པར་གྲུབ་བསྟུན། ཕྱི་ཚེས་ ༡༢ ཉིན་ཨར་ཇན་ཊི་ནའི་རྒྱལ་ས་བྷོ་ནོ་སི་ཨ་རི་སིར (Buenos Aires) ཆིབས་ཞལ་བསྒྱུར་ཡོད་པ་བཅས།།