༢༠༡༡ ཟླ་ ༩ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༩ ཚེས་ ༦ ཉིན་རྒྱབ་༸གོང་ས་༸སྐྱབས་མགོན་ཆེན་པོ་མཆོག་ཁེ་ཎ་ཌའི་གྲོང་ཁྱེར་མོན་ཊ་རེ་ཡལ་ (Montreal) གནམ་ཐང་དུ་༸ཞབས་སོར་བདེ་བར་འཁོད་སྐབས་བྱང་ཨ་རིའི་སྐུ་ཚབ་བཀའ་ཟུར་བློ་བཟང་སྙན་གྲགས་ལགས་དང་མག་བྷིལ་གཙུག་ལག་སློབ་གྲྭའི་སློབ་དཔོན་ཆེན་མོ་སྐུ་ཞབས་ཨར་ཊིན་ཤར་མ། དེ་བཞིན་ཁེ་ཎ་ཌ་དང་བོད་རིག་མཐུན་ཚོགས་ཀྱི་སྐུ་ཚབ་ལྕམ་སྐུ་ཤི་ལག་མིལ་སི་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད། མགྲོན་ཁང་གི་ཕྱི་རུ་ས་གནས་བོད་རྣམས་དང་དད་ལྡན་མང་ཚོགས་ཁག་གཅིག་ལ་མཇལ་ཁ་སྩལ། སྐབས་དེར་ས་གནས་བོད་རིགས་ཚོགས་པའི་གཞོན་ནུ་ཕོ་མོ་གཉིས་ཀྱིས་༸གོང་ས་མཆོག་ལ་གྲོ་སོ་ཕྱེ་མར་འདེགས་འབུལ་ཞུས་ཡོད་པ་མ་ཟད། བོད་མི་ཚོས་མགོན་པོ་གང་ཉིད་མཆོག་ལ་ཕེབས་བསུའི་བསྟོད་གླུ་འབུལ་ལམ་ཞུས་ཡོད། དེ་རྗེས་མགོན་པོ་གང་ཉིད་མཆོག་བཞུགས་གནས་མགྲོན་ཁང་ནང་༸ཞབས་སོར་འཁོད་འཚམས་འཇམ་དབྱངས་ཆོས་ཚོགས་ཀྱི་མཁན་ཟུར་བློ་བཟང་འཇམ་དབྱངས་མཆོག་དང་བྱང་ཨ་རིའི་སྤྱི་འཐུས་བདེ་སྐྱིད་ཆོས་དབྱངས་ལགས། མོན་ཊ་རེ་ཡལ་ས་གནས་བོད་རིགས་ཚོགས་པའི་ཚོགས་གཙོ་བཀྲིས་དབང་རྒྱལ་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
ཕྱི་ཚེས་ ༧ ཉིན་༸གོང་ས་མཆོག་འཇམ་དབྱངས་ཆོས་ཚོགས་སུ་ཆིབས་སྒྱུར་བསྐྱང་སྟེ་ས་གནས་བོད་རིགས་ཚོར་བཀའ་སློབ་སྩལ་རྒྱུ་མ་ཟད། འཛམ་གླིང་ཆོས་ལུགས་ལྷན་འཛོམས་ཀྱི་བགྲོ་གླེང་ཚོགས་འདུ་ཐེངས་གཉིས་པའི་ཚོགས་མགོན་དུ་ཆིབས་སྒྱུར་བསྐྱང་སྟེ་བཀའ་སློབ་གཙོ་བོ་སྩལ་རྒྱུ་ཡིན་འདུག ལྷན་ཚོགས་དེ་ནི་ཨ་རིའི་ནང་ཕྱི་ལོ་ ༢༠༠༡ ཟླ་ ༩ ཚེས་ ༡༡ ཉིན་ཁ་ཆེའི་འཇིགས་སྐུལ་རིང་ལུགས་པས་དྲག་རྒོལ་བྱས་རྗེས་འགོ་འཛུགས་གནང་བ་ཞིག་ཡིན་འདུག ཐེངས་འདིའི་ལྷན་ཚོགས་དེ་བཞིན་ཁེ་ཎ་ཌར་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཚོགས་པ་ཁག་གཅིག་དང་། ཁེ་ཎ་ཌར་ཡོད་པའི་ཏཱ་ལའི་བླ་མའི་ཞི་བདེའི་བསྟི་གནས་ཁང་བཅས་ནས་གོ་སྒྲིག་ཞུས་པ་ཞིག་ཡིན་འདུག ལྷན་ཚོགས་ནང་མཉམ་ཞུགས་གནང་མཁན་ཁོངས་སུ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཁག་གཅིག་དང་། རྒྱ་གར་གྱི་ཆོས་ཕྱོགས་ཀྱི་མཁས་དབང༌། རྩོམ་པ་པོ་སོགས་གནད་ཡོད་མི་སྣ་འགའ་ཤས་ཀྱང་མཉམ་ཞུགས་གནང་རྒྱུ་ཡིན་འདུག     ཕྱོགས་མཚུངས་ཉིན་དེའི་ཉིན་རྒྱབ་༸གོང་ས་མཆོག་གིས་མང་ཚོགས་ལ་ཀུན་ཁྱབ་ཀྱི་འགན་འཁུར་ཐོག་བཀའ་སློབ་སྩལ་རྒྱུ་ཡིན་པ་དང། བཀའ་སློབ་གོ་སྒྲིག་ཞུ་མཁན་ཁེ་ཎ་ཌ་བོད་རིགས་སྤྱི་མཐུན་ཚོགས་པ་ཡིན་འདུག་པ་བཅས། །