༢༠༡༡ ཟླ་ ༨ ཚེས་ ༡༦ རེས་གཟའ་མིག་དམར།
༄༅། །ཉེ་ཆར་ཇར་མན་བོད་དོན་རྒྱབ་སྐྱོར་ཚོགས་པས་བོད་མིས་ཐད་ཀར་འོས་འདེམས་བྱས་པའི་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་གིས་ཆབ་སྲིད་དང་འཛིན་སྐྱོང་གི་འགན་ཡོངས་རྫོགས་བཞེས་རྗེས་ཇར་མན་གཞུང་ཕྱོགས་ནས་བོད་མི་མང་གིས་འོས་འདེམས་བྱས་པའི་བཀའ་ཁྲི་མཁས་དབང་བློ་བཟང་སེང་གེ་མཆོག་དང་ལྷན་འབྲེལ་བ་དམ་ཟབ་གནང་རྒྱུའི་རེ་བ་ཆེན་པོ་བྱེད་བཞིན་ཡོད་སྐོར་གྱི་གསར་འགོད་གསལ་བསྒྲགས་ཤིག་སྤེལ་འདུག
དེ་ཡང་གསར་འགོད་གསལ་བསྒྲགས་ནང་འཁོད་དོན། ཇར་མན་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་གིས་ད་བར་རྒྱ་ནག་གཞུང་ཕྱོགས་ནས་བོད་རྒྱ་གཉིས་དབར་གྱི་དཀའ་རྙོག་སེལ་ཆེད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ལྷན་གྲོས་མོལ་ཞུ་རྒྱུའི་གོ་སྐབས་ཡག་པོ་བླངས་མེད་པར་བརྟེན། ད་རེས་རྒྱ་ནག་གཞུང་ལ་རྒྱལ་སྤྱིའི་ཆེ་མཐོང་དང་དུས་རབས་ཉེར་གཅིག་པའི་སྟོབས་ཆེན་རྒྱལ་ཁབ་ནང་ཆ་རྐྱེན་ཚང་ཆེད་སླར་ཡང་གོ་སྐབས་ཤིག་ཐོབ་ཀྱི་ཡོད་སྟབས། དེར་དམ་འཛིན་བྱས་ཏེ་བོད་རྒྱ་འབྲེལ་མོལ་གྱི་ལེའུ་གསར་པ་ཞིག་འགོ་འཛུགས་བྱ་རྒྱུའི་རེ་འདུན་བྱེད་བཞིན་ཡོད། གཞི་རྩའི་རྒྱ་ནག་གཞུང་ཕྱོགས་ནས་ད་བར་བཀའ་བློན་ཁྲི་པ་བློ་བཟང་སེང་གེ་མཆོག་དང་ལྷན་གྲོས་མོལ་བྱ་རྒྱུའི་སྐོར་གང་ཡང་གླེང་སློང་བྱས་མེད་ཀྱང་བཀའ་ཁྲི་མཆོག་ནི་༸གོང་ས་ཏཱ་ལའི་བླ་མ་མཆོག་གི་ཐུགས་དགོངས་ལྟར་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་མིང་དོན་མཚུངས་པའི་རང་སྲིད་རང་སྐྱོང་རྩོད་ལེན་བྱེད་མཁན་ཞིག་ཡིན་པ་ལས་རང་བཙན་འཐབ་རྩོད་གནང་མཁན་ཞིག་མ་རེད་ཅེས་གསུངས་འདུག
ཡང་ཁོང་གིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ཕྱི་ཟླ་གསུམ་པའི་འོས་བསྡུ་ཆེན་མོ་མ་བྱས་གོང་ནས་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་ཐད་ཀར་འོས་འདེམས་བྱས་པའི་དབུ་ཁྲིད་ཚོར་སྩལ་རྒྱུའི་ཐག་གཅོད་མཛད་ཟིན། དེ་བཞིན་ཕྱི་ཟླ་ལྔ་པའི་ནང་དམིགས་བསལ་གྲོས་ཚོགས་ཤིག་ཚོགས་ཡོད་པ་བརྒྱུད་བཙན་བྱོལ་བོད་མིའི་བཅའ་ཁྲིམས་ལ་ཡང་འགྱུར་བ་ཕྱིན་པ་བཅས་ཀྱི་གནད་དོན་རྣམས་ལུང་འདྲེན་གནང་བ་དང་ལྷན་༸སྐྱབས་མགོན་ཏཱ་ལའི་བླ་མ་མཆོག་གིས་ཆབ་སྲིད་ཀྱི་སྐུ་དབང་མི་མང་གིས་འོས་འདེམས་བྱས་པའི་དབུ་ཁྲིད་ཚོར་གསོལ་རས་སྩལ་བ་དེས་བཙན་བྱོལ་བོད་མིའི་མང་གཙོའི་འཕེལ་རིམ་གྱི་ནུས་པ་ཇེ་ཆེར་ཕྱིན་ཡོད་པ་མ་ཟད། བཀའ་ཁྲི་མཆོག་ཀྱང་ཆབ་སྲིད་དང་འཛིན་སྐྱོང་གི་དབུ་ཁྲིད་ཐོག་མ་དེ་ཆགས་ཡོད་པར་བརྟེན། ཇར་མན་བོད་དོན་རྒྱབ་སྐྱོར་ཚོགས་པས་ཇར་མན་གཞུང་ཕྱོགས་ནས་བོད་མི་མང་གིས་འོས་འདེམས་བྱས་པའི་དབུ་ཁྲིད་དང་ལྷན་འབྲེལ་བ་དམ་ཟབ་གནང་རྒྱུའི་རེ་འདུན་ཆེན་པོ་ཞུ་བཞིན་ཡོད་ཅེས་གསུངས་འདུག་པ་བཅས། །
ཇར་མན་བོད་དོན་རྒྱབ་སྐྱོར་ཚོགས་པས་ཇར་མན་གཞུང་ཕྱོགས་ནས་བཀའ་ཁྲི་མཆོག་དང་ལྷན་འབྲེལ་བ་དམ་ཟབ་གནང་རྒྱུའི་རེ་འདུན་ཞུས་པ།
གསར་གནས།
འབྲེལ་གནས།
