༢༠༡༡ ཟླ་ ༨ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༢༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཇར་མན་ཧེ་སེ་མངའ་སྡེ་(Hesse)རྒྱལ་ས་ཝེ་སེ་བྷ་ཌེན་(Wiesbaden)གྱི་ས་ཁུལ་ཕ་ར་ཡི་ཌི་བྷག་(Friedberg)ཏུ་རྟེན་གཞི་བྱས་པའི་མིག་གི་དབང་པོ་སྐྱོན་ཅན་གྱི་སློབ་གྲྭ་ཇོ་ཧན་པི་ཊར་ཤི་པི་ཧ་ར་ཌི་ཊི་(Johann-Peter Shepherd)ཞེས་པ་དེར་ཆིབས་སྒྱུར་བསྐྱངས་ཏེ་བཀའ་སློབ་སྩལ།
དེ་ཡང་ཐོག་མར་༸གོང་ས་མཆོག་གིས་མིག་གི་དབང་པོ་ཙམ་མ་ཟད་ཡན་ལག་སྣ་མང་སྐྱོན་ཅན་གྱི་བྱིས་པ་གཅེས་སྐྱོང་ཁང་ཞིག་ཡོད་པ་དེར་ཆིབས་སྒྱུར་བསྐྱངས་ཏེ་བྱིས་པ་ཚོ་དང་གཅེས་སྐྱོང་ཁང་གི་ཕ་ཚབ་མ་ཚབ་ཀྱིས་གཙོས་ལས་བྱེད་པ་ཚོར་མཇལ་ཁ་དང་བཀའ་སློབ་སྩལ་དོན།
ཁྱེད་ཚོས་དཀའ་ངལ་གྱི་གནས་སྟངས་འོག་ཡོད་པའི་བྱིས་པ་ཚོར་གཅེས་སྐྱོང་གནང་བར་ངོས་ཀྱིས་སྙིང་ཐག་པ་ནས་རྗེས་སུ་ཡི་རང་ཞུ་རྒྱུ་ཡིན། དེ་ནི་བྱམས་བརྩེ་ཁ་ནས་བཤད་པ་ཙམ་མིན་པར་དོན་དངོས་ཉམས་ལེན་བྱས་པ་ཞིག་ཆགས་ཡོད། ཁྱེད་རང་ཚོས་དཀའ་ངལ་ལ་མ་འཛེམས་པར་འབད་བརྩོན་གནང་བར་བསྔགས་བརྗོད་ཞུ་རྒྱུ་ཡིན་ཞེས་སོགས་ཀྱི་བཀའ་སློབ་སྩལ་གྲུབ་བསྟུན། མགོན་པོ་གང་ཉིད་མཆོག་གིས་སྐར་མ་འགའ་ཤས་རིང་ཐུགས་སྨོན་མཛད།
དེ་རྗེས་༸གོང་ས་མཆོག་གིས་ཉེ་འགྲམ་ཚོགས་ཁང་ཞིག་ཏུ་ཆིབས་སྒྱུར་བསྐྱངས་ཏེ་མིག་གི་དབང་པོ་སྐྱོན་ཅན་གྱི་བྱིས་པ་གྲངས་ ༢༠༠ ཙམ་ཡོད་པར་བཀའ་སློབ་སྩལ།
དེ་ཡང་མགོན་པོ་གང་ཉིད་མཆོག་ཚོགས་ཁང་དུ་༸ཞབས་སོར་འཁོད་སྐབས་བྱིས་པ་ཚོས་བཀྲ་ཤིས་བདེ་ལེགས་ཞེས་པའི་མཉམ་གཞས་ཤིག་གཟིགས་འབུལ་ཞུས། དེ་རྗེས་བཞུགས་གྲལ་དུ་འཁོད་མཚམས་མཛད་སྒོ་དབུ་འཛུགས་ཀྱིས་ཐོག་མར་སློབ་གྲྭ་དེའི་དགེ་ཆེས་སློབ་ཕྲུག་ཚོར་༸གོང་ས་མཆོག་གི་ངོ་སྤྲོད་དང་ཕེབས་བསུའི་གསུང་བཤད་གནང་དོན། ང་ཚོའི་སློབ་གྲྭའི་བྱུང་རབས་ཀྱི་དུས་ཡུན་རིང་པོ་དེའི་ཁྲོད་དེ་རིང་གི་ཉིན་མོ་འདི་ནི་ཁྱད་དུ་འཕགས་པའི་ཉིན་མོ་ཞིག་ཆགས་ཡོད། དེར་བརྟེན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ང་ཚོའི་སློབ་གྲྭར་ཆིབས་སྒྱུར་བསྐྱངས་པར་ང་ཚོས་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་སྦྲགས། འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན་ཞེས་སོགས་ཀྱི་གསུང་བཤད་གནང།
དེ་ནས་༸གོང་ས་མཆོག་གིས་བཀའ་སློབ་སྩལ་དོན། ངོས་རང་འདིར་ཡོང་སྟེ་བྱིས་པ་ཚོ་དང་ལྷན་འཁྱུག་ཙམ་རིང་ཐུག་རྒྱུའི་གོ་སྐབས་ཐོབ་པར་ཧ་ཅང་དགའ་པོ་བྱུང། ལས་བྱེད་པ་ཚོས་དྲིན་ལན་གྱི་རེ་བ་གང་ཡང་མ་བྱས་པར་བྱིས་པ་ཚོར་གཅེས་སྐྱོང་གནང་བ་ནི་བྱམས་བརྩེ་ཁ་ནས་བཤད་པ་ཙམ་མིན་པར་ཉམས་ལེན་གཤའ་མ་དེ་ཆགས་ཡོད། དེར་བརྟེན་ཁྱེད་ཚོས་དཀའ་ངལ་འོག་ཡོད་པའི་བྱིས་པ་ཚོའི་ཆེད་དུས་ཚོད་དང་རང་གི་མི་ཚེ་ཧྲིལ་པོ་བློས་གཏོང་བྱས་པ་དེ་ནི་དཀོན་མཆོག་གི་བཀའ་བསྒྲུབས་པ་ཞིག་རེད། ངོས་ཀྱིས་རྗེས་སུ་ཡི་རང་དང་བསྔགས་བརྗོད་ཞུ་བ་དང་ཆབས་ཅིག་ཁྱེད་ཚོས་ད་དུང་འབད་བརྩོན་མུ་མཐུད་གནང་རོགས་ཞེས་འབོད་སྐུལ་ཞུ་རྒྱུ་ཡིན། བྱིས་པ་ཁྱེད་རང་ཚོ་ལོང་བ་ཡིན་ནའང་ཁྱེད་ཚོར་མིའི་ཀླད་པ་ཡོད་པ་མ་ཟད། མ་འོངས་པའི་མདུན་ལམ་བཟང་པོ་ཡོད། ཕྱོགས་མཚུངས་ལྟ་སྐྱོང་གནང་མཁན་ཡང་ཡག་པོ་ཡོད་པར་བརྟེན་སེམས་ཤུགས་དང་རེ་བ་ནམ་ཡང་བརླག་རྒྱུ་མེད། ཅེས་སོགས་ཀྱི་ལམ་སྟོན་བཀའ་སློབ་སྩལ་ཡོད།
དེ་བཞིན་སྐབས་དེར་༸གོང་ས་མཆོག་གིས་དེ་སྔ་ལོ་ངོ་ ༤༠ ཙམ་གྱི་གོང་བོད་ཕྲུག་ལོང་བ་ཞིག་ལ་མཇལ་ཁ་སྩོལ་སྐབས། བྱིས་པ་དེས་རང་ཉིད་ལོང་བ་ཡིན་བཞིན་དུ་སྤྱི་ཚོགས་ལ་ཞབས་ཞུ་བསྒྲུབ་རྒྱུའི་ཆོད་སེམས་འཆང་བཞིན་ཡོད་སྐོར་གྱི་ལོ་རྒྱུས་ཐུགས་དྲན་གསོ་མཛད་དེ་བཀའ་སློབ་སྩལ། དེ་རྗེས་མགོན་པོ་གང་ཉིད་མཆོག་གིས་ཐུགས་བརྩེ་བ་ཆེན་པོས་བྱིས་པ་ཚོར་ཕྱག་གིས་བྱུག་བྱུག་མཛད། སྐབས་དེར་རང་གི་མྱོང་ཚོར་ཇི་བྱུང་སྐོར་སློབ་གྲྭ་དེའི་དགེ་ཆེས་དྲ་ལམ་བརྒྱུད་རྩོམ་ཡིག་ཞིག་སྤེལ་བའི་ནང་འཁོད་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ང་ཚོའི་སློབ་གྲྭར་ཆིབས་སྒྱུར་བསྐྱངས་ཐུབ་པ་དེས་ང་ཚོ་དགེ་ལས་སློབ་ཕྲུག་ཚང་མར་དགའ་སྤྲོའི་ཚོར་བ་ཡིག་ཐོག་ནས་བརྗོད་མི་ཤེས་པ་ལྟ་བུ་ཞིག་བྱུང་བ་མ་ཟད། ཁོང་གིས་བཀའ་སློབ་དེ་དག་ང་ཚོར་བློ་སྤོབས་གསར་པ་ཞིག་བསྐྲུན་རྒྱུར་ཏན་ཏན་ཕན་ཐོགས་ཆེན་པོ་བྱུང་སོང་ཞེས་བཀོད་ཡོད།
ཉིན་དེའི་སྔ་དྲོ་ཐོག་མར་མགོན་པོ་གང་ཉིད་མཆོག་གིས་ཇར་མན་ནང་གནས་སྡོད་བོད་རིགས་ཚོར་མཇལ་ཁ་དང་བཀའ་སློབ་སྩོལ་སྐབས་ཇར་མན་གྲོང་ཁྱེར་ཧམ་བྷུག་དང་མན་ཆི། བྷར་ལིན་ཙམ་མ་ཟད། སུད་སི་དང་བྷེལ་ཇམ། ཕ་རན་སི་སོགས་ནས་ཀྱང་བོད་རིགས་ཁག་གཅིག་མཇལ་ཁར་ཆེད་བཅར་ཞུས་ཡོད་པ་བཅས།།
