༢༠༡༡ ཟླ་ ༨ ཚེས་ ༣༠ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༨ ཚེས་ ༢༣ ཉིན་ ༼ རྒྱ་བོད་ནམ་ཡང་མཛའ་སེམས་མཉམ་མཐུན་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཡུ་རོབ་ཁུལ་གྱི་རྒྱ་མི་རིགས་ཚོའི་བཞུགས་མོལ་ཚོགས་འདུ། ཞེས་པ་ཇར་མན་གྱི་ཧེ་སེ་(Hesse)མངའ་སྡེའི་རྒྱལ་ས་ཝིས་སི་པ་ཏིང་ལ་འཚོགས་ཡོད།
ད་ཐེངས་ཀྱི་བཞུགས་མོལ་ཚོགས་འདུ་འདི་ནི། སྐུ་སྒེར་གྱི་རྒྱ་སྐད་དྲུང་ཆེ་སྐུ་ཞབས་ཚེ་རྒྱམ་ལགས་དང་དབུས་བོད་མིའི་སྒྲིག་འཛུགས་ཀྱི་སུད་སི་དོན་གཅོད་སྐུ་ཞབས་ཚེ་བརྟན་བསམ་གྲུབ་ལགས་ཀྱི་རྒྱབ་སྐྱོར་འོག སུད་སི་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་དང་།
དེ་བཞིན་ཡུ་རོབ་ཁུལ་གྱི་རྒྱ་ནག་དམངས་གཙོ་དོན་གཉེར་བ་བཅས་ཐུན་མོང་གི་གོ་སྒྲིག་འོག་ཚོགས་པའི་ལྷན་ཚོགས་དེའི་སྐབས་ཚོགས་བཅར་བ་ཡུ་རོབ་རྒྱལ་ཁབ་ཇར་མན་དང་ཕ་རན་སི། སྦེལ་ལྗམ། ཕིན་ལན་ཌི། ཧང་བྷ་རི་སོགས་ནང་གནས་སྡོད་བྱེད་བཞིན་པའི་རྒྱ་རིགས་དམངས་གཙོ་དོན་གཉེར་བ། ཕྱི་སྡོད་རྒྱ་རིགས་ཁག་གཅིག རྒྱ་རིགས་སློབ་ཕྲུག་བཅས་ཁྱོན་མི་གྲངས་བདུན་ཅུ་བརྒལ་བ་ཕེབས་ཡོད།
བཞུགས་མོལ་ཚོགས་འདུ་དེ་ནི། རྒྱ་སྐད་ཐོག་རང་དབང་ཅན་གྱི་རྩོམ་འབྲིས་མཐུན་ཚོགས་ཀྱི་ཚོགས་གཙོ་ལོས་ཐན་ཆིས་ནས་གཙོ་སྐྱོང་གནང་ཡོད་པ་དང་། ༸གོང་ས་སྐྱབས་མགོན་ཆེན་པོ་མཆོག་བཞུགས་མོལ་ཚོགས་འདུར་ཆིབས་སྒྱུར་བསྐྱངས་ཏེ་བཀའ་སློབ་ཀྱང་སྩལ་ཡོད།
སྐབས་དེར་༸གོང་ས་མཆོག་གིས་དབུ་མའི་ལམ་གྱི་སྲིད་བྱུས་ལ་བརྟེན་ནས་བོད་ཀྱི་གནད་དོན་སེལ་དགོས་པ་དང་། བོད་དུ་མིང་དོན་མཚུངས་པའི་རང་སྐྱོང་ཚད་ལྡན་དགོས་སྐོར་བཀའ་སློབ་སྩལ་ཡོད་པ་མ་ཟད། དེང་སྐབས་རྒྱ་ནག་གི་སྤྱི་ཚོགས་ནང་ཡོད་པའི་དཀའ་ངལ་མང་པོ་ཞིག་མང་གཙོའི་རིང་ལུགས་ཐོག་ནས་སེལ་ཐུབ་རྒྱུ་ཡིན་སྐོར་ཡང་བཀའ་སྩལ་དོན། རྒྱ་ནག་གི་མང་གཙོའི་ལམ་ནི་ད་ལྟའི་དཀའ་ངལ་འདྲ་མིན་སེལ་བྱེད་ཀྱི་ནད་བརྒྱ་སྨན་གཅིག་ལྟ་བུ་ཡིན།
བོད་ཀྱི་གནད་དོན་སྐོར་ལ་རྒྱ་ནག་གུང་ཁྲན་གྱིས་ད་དུང་ཡང་གནས་ཚུལ་འཁྱོག་བརྗོད་དང་རྫུན་སྒྲིག་བྱེད་བཞིན་ཡོད་པར་བརྟེན་རྒྱན་ནག་མི་དམངས་ཚོས་བོད་ཀྱི་གནད་དོན་ངོ་མ་དང་བོད་མིའི་མངོན་འདོད་ཇི་ཡིན་གསལ་པོ་རྟོགས་ཐུབ་ཀྱི་མེད། ང་ཚོས་རང་སྐྱོང་ཚད་ལྡན་ཞིག་རྩོད་པ་མ་གཏོགས་བོད་རྒྱ་ནག་དང་ཁ་བྲལ་གྱི་རང་བཙན་རྩོད་ཀྱི་མེད།
ངོས་ཀྱིས་མ་འོངས་པར་རྒྱ་ནག་དང་བོད་དུ་ལོག་རྒྱུའི་དུས་གཅིག་ཤར་རྒྱུའི་རེ་བ་རྒྱག་བཞིན་ཡོད། ངོས་རང་བོད་མིའི་ཆབ་སྲིད་འགོ་ཁྲིད་ཀྱི་འགན་ཁུར་ནས་རྒན་ཡོལ་ཆ་ཚང་ཞུས་ཏེ། ད་ཆ་ངོས་རང་རང་དབང་ལྡན་པའི་ཡུལ་མི་ཞིག་ཆགས་པ་རེད། གལ་ཏེ་ཉིན་ཞིག་ངོས་རང་བོད་དུ་ཕྱིར་ལོག་བྱ་རྒྱུའི་དུས་ཚོད་གཅིག་ཤར་ཚེ་ངོས་ཀྱིས་ཆོས་ཕྱོགས་ཐོག་ཤུགས་བརྒྱབ་སྟེ་ཐོག་མར་རྒྱ་ནག་གཞུང་གིས་ངོས་ལ་ཏཱ་ལའི་བླ་མ་གདོན་འདྲེ་རེད་ཟེར་བའི་ཉེས་མིང་དེ་དག་འབུད་བྱེད་འདོད་ཡོད་ཅེས་སོགས་ཀྱི་བཀའ་སློབ་སྩལ།
༸གོང་ས་མཆོག་གི་མཛད་བྲེལ་ཆེ་བའི་ལས་དོན་དེའི་ཁྲོད་ནས། དེ་ཉིན་ཕྱི་དྲོའི་དུས་ཐུང་ཞིག་ལ་རྒྱ་ནག་གི་རྩོམ་པ་པོ་ལོས་ཡིས་ཝའུ་ལ་མཇལ་ཁ་སྩལ་བ་དང་། ལོས་ཡིས་ཝའུ་ཡིས་རྒྱ་ནག་ནང་ཁུལ་གྱི་གྲགས་ཅན་རྩོམ་པོ་པོ་ཝང་ལིས་ཞུང་དང་། འོད་ཟེར། ལིའུ་ཞའོ་པོ། ལུའུ་ཞ་བཅས་ཀྱི་ཚབ་ཞུས་ནས། ༸གོང་ས་མཆོག་ལ་མཚམས་འདྲིའི་བཀྲ་ཤིས་བདེ་ལེགས་ཀྱང་ཞུས་པ་དང་། དེ་དང་མཉམ་དུ་ལོས་ཡིས་ཝའུ་རང་ཉིད་ཀྱིས་བརྩམས་པ་ ༼ ངའི་དཔང་ཡིག༽ ཅེས་པའི་བརྩམས་ཆོས་དང་མཉམ་སྦྱར་བྱས་ནས་ ༼ མུན་རིང་ཁྲོད་ཀྱི་འོད་གསལ་སྒྲོན་མེ་ཕ་མ་དང་མཚུངས་པའི་༸སྐྱབས་མགོན་མཆོག་ལ་འབུལ།༽ ཞེས་པའི་བརྗོད་ཚིག་འདི་བཀོད་ཡོད་པ་རེད།
༸གོང་ས་མཆོག་གིས་ཁོང་གི་ལག་ཟུང་ནས་འཇུས་ཏེ། སྐུ་ཉིད་བཙོན་དོང་ནང་མནར་གཅོད་དེ་འདྲ་མྱོང་ཨེ་སོང་དྲིས་པར། ཁོང་གིས། ངས་རང་ཤི་ཐེངས་གཉིས་རྒྱག་རྩིས་བྱ་དགོས་ཐུག་བྱུང། དེ་ཚོ་ཚང་མ་དེབ་འདིར་བཀོད་ཡོད། ལོས་ཡིས་ཝའུ་ཡིས་ད་དུང་ཞུས་དོན། མ་གཞི་དམར་ཤོག་ཚོགས་པ་ཇི་ཙམ་ཞེད་སྣང་ཆེ་ནའང་། ལོ་རྒྱུས་ཀྱི་རླབས་རྒྱུན་ཁྲོད་ནས་ཡུད་ཙམ་ལས་བགྲོད་ཐུབ་ཀྱི་མ་རེད་ལ། མི་རྣམས་ཀྱིས་རྒྱབ་ལ་བསྐྱུར་ངེས་རེད། ཡིན་ནའང་། ཆོས་ལུགས་དང་རིག་གནས་ཀྱི་དབུ་འཛིན་ཚོའི་སྙིང་སྟོབས་དེ་ནི། མུ་མཐུད་རྒྱུན་གནས་དགོས་ལ། ནམ་ཡང་མི་རིགས་ཀྱི་སེམས་ཁམས་གསོ་དགོས་ཞེས་ཞུས་པར། ༸གོང་ས་མཆོག་གིས་ཞལ་འཛུམ་པར་མཛད་ནས། གནས་ལུགས་འདི་ཁྱོད་ཀྱིས་ཤེས་པ་རེད། ཡིན་ནའང་ཁོང་ཚོས་འདི་ཤེས་ཀྱི་མེད། དེར་བརྟེན། ཁྱོད་རང་ལ་ཁོང་ཚོ་ལས་ཕུགས་བསམ་ཆེ་བ་ལྡན་ཡོད་ཅེས་བསྔགས་བརྗོད་མཛད།
ཐེངས་འདིའི་ཚོགས་བཅར་བ་ནི། རྒྱ་ནག་མང་གཙོའི་འགན་འཁུར་བ་ཧྥེད་ལན་ཡོན། ལྟ་རྟོག་ཚོགས་པའི་འགན་འཁུར་བ་ཀྲང་ཅན། དྲུང་ཡིག་ཕང་ཡོན་ཀྲུང་། ཕིང་ཞོ་མིང་། ཆན་ཡོ་ཅུན། ཧེ་མིང་། ཞུས་ཝན་ལིས། བློ་བཟང་དབང་འདུས། མའོ་ཞོ་མེས། ཨེ་ཅང་། ཀོ་ཧྲེང་། ལིས་ཀྲོ་ཞུན་ཛིང་ཧྲི་ཞུན་སོགས་མི་སྣ་བདུན་ཅུ་བརྒལ་བ་མཉམ་ཞུགས་བྱས་ཡོད་པ་བཅས།།
