༢༠༡༡ ཟླ་ ༨ ཚེས་ ༣༠ རེས་གཟའ་མིག་དམར།
༄༅། །ནོ་བེལ་ཞི་བདེ་གཟེངས་རྟགས་བཞེས་མྱོང་མཁན་ལྷོ་ཨ་ཕི་རི་ཀའི་ཡེ་ཤུ་ཆོས་དཔོན་ཌེ་སི་མན་ཊུ་ཊུ་(Archbishop Desmond Tutu)མཆོག་དགུང་གྲངས་ ༨༠ ཕེབས་པའི་འཁྲུངས་སྐར་རིང་མིན་ཕྱི་ཟླ་ ༡༠ ཚེས་ ༧ ཉིན་སྲུང་བརྩི་ཞུ་རྒྱུ་ཡིན་པ་ལྟར་ཁོང་གིས་འཁྲུངས་སྐར་མཛད་སྒོའི་ཐོག་བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་སྒྱུར་གནང་སྐྱོང་ཡོང་བའི་གསོལ་འདེབས་ཞུས་དོན་ལྟར་ཡེ་ཤུ་ཆོས་དཔོན་ཌེ་སི་མན་ཊུ་ཊུ་མཆོག་གིས་ད་རེས་ལྷོ་ཨ་ཕི་རི་ཀའི་གཞུང་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆན་འབུལ་རྒྱུའི་རེ་བ་ཆེན་པོ་བྱེད་བཞིན་ཡོད་སྐོར་གསུངས་ཡོད།
དེ་ཡང་ལྷོ་ཨ་ཕི་རི་ཀའི་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་བསོད་ནམས་བསྟན་འཛིན་ལགས་ཀྱིས་རྒྱལ་སྤྱིའི་གསར་ལམ་ཁག་ལ་དེའི་སྐོར་འགྲེལ་བརྗོད་གནང་བའི་ནང་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྷོ་ཨ་ཕི་རི་ཀའི་ཡེ་ཤུ་ཆོས་དཔོན་ཌེ་སི་མན་ཊུ་ཊུ་མཆོག་གི་འཁྲུངས་སྐར་དུ་ཆིབས་སྒྱུར་བསྐྱང་རྒྱུའི་མཐོང་མཆན་སྐོར་ལ་ལྡི་ལིར་ཡོད་པའི་ལྷོ་ཨ་ཕི་རིའི་གཞུང་ཚབ་ཁང་ལ་ཉེ་ཆར་མཐོང་མཆན་ཞུ་སླད་སྙན་ཞུ་དེ་དག་འབུལ་སྐབས་གཞུང་ཚབ་ནས་ཐོག་མར་ལྷོ་ཨ་ཕི་རི་ཀའི་གཞུང་ནས་མཐོང་མཆན་ཕུལ་ན་འགྲིག་རེད་ཅེས་པའི་ལམ་སྟོན་ཞིག་དགོས། ཞེས་གསུངས་ཡོད། དེའི་ལམ་སྟོན་ཞུ་སླད་ཌེ་སི་མན་ཊུ་ཊུ་མཆོག་གི་ཡིག་ཚང་ནས་ལྷོ་ཨ་ཕི་རི་ཀའི་གཞུང་འབྲེལ་མི་སྣར་འབྲེལ་བ་གནང་དང་གནང་མུས་རེད། དེ་བཞིན་ཁོང་གིས་གསར་འགོད་པར་གསུངས་པ་ལྟར། རྒྱལ་ཁབ་འདིའི་སྲིད་གཞུང་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆན་འབུལ་གྱི་རེད་ཅེས་ཐུགས་རེ་ཆེན་པོ་གནང་བཞིན་འདུག ལྷག་པར་ཕྱི་ལོ་ ༢༠༠༩ ལོར་ཡུལ་དེའི་ཕྱི་སྲིད་བློན་ཆེན་མཆོག་གིས་མ་འོངས་པར་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ཁབ་འདིའི་ནང་ཆིབས་སྒྱུར་བསྐྱང་ན་དགའ་བསུ་ཡོད་ཅེས་གསུངས་ཡོད། དེར་བརྟེན་ཌེ་སི་མན་ཊུ་ཊུ་མཆོག་གི་ཡིག་ཚང་ནས་ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་ཌེ་སི་མན་ཊུ་ཊུ་མཆོག་གི་འཁྲུངས་སྐར་མཛད་སྒོར་ཆིབས་སྒྱུར་བསྐྱང་ཐུབ་ཆེད་རེ་བ་དང་འབད་བརྩོན་ཞུས་དང་ཞུ་མུས་རེད་འདུག་ཅེས་སོགས་ཀྱི་འགྲེལ་བརྗོད་གནང་ཡོད་པ་བཅས། །
