༢༠༡༡ ཟླ་ ༧ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༡༦ རེས་གཟའ་སྤེན་པའི་ཉིན་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་དཀར་པོའི་ནང་གདན་ཞུས་ཐོག་མཇལ་འཕྲད་སྐར་མ་ ༤༥ ཙམ་གྱི་རིང་སྲིད་འཛིན་མཆོག་ནས་༸གོང་ས་མཆོག་གིས་བོད་ཀྱི་གནད་དོན་དེ་བཞིན་བོད་རྒྱ་མི་རིགས་གཉིས་སྨན་གྱི་དབུ་མའི་ལམ་གྱི་ཐབས་ལམ་ཐོག་སེལ་ཐབས་མཛད་པའི་བཞེངས་ཕྱོགས་དེར་བསྔགས་བརྗོད་དང་རྒྱབ་སྐྱོར་གྱི་རྣམ་པ་ཤུགས་ཆེ་བཏོན་ཡོད། དེ་ཡང་དབུ་ཁྲིད་རྣམ་གཉིས་ཕོ་བྲང་དཀར་པོའི་ནང་མཇལ་འཕྲད་ཀྱི་སྐོར་༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་གིས་གསར་འགོད་པ་ཁག་གཅིག་ལ་འགྲེལ་བརྗོད་གནང་དོན།
༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་བྷ་རཀ་ཨོ་བྷ་མ་མཆོག་རྣམ་གཉིས་མཇལ་འཕྲད་ཐེངས་གཉིས་པ་དེ་ཆགས་ཡོད། ཨོ་བྷ་མ་མཆོག་སྲིད་འཛིན་མ་གནང་གོང་ཁོང་༸གོང་ས་མཆོག་དང་མཇལ་འཕྲད་ཞུ་མྱོང་ཡོད། ༸གོང་ས་མཆོག་དང་ཨ་རིའི་སྲིད་འཛིན་མཆོག་རྣམ་གཉིས་ཀྱི་ཐུགས་ཀྱི་ཚོར་བ་དེ་གྲོགས་པོ་རྙིང་པ་གཉིས་བསྐྱར་དུ་མཇལ་འཕྲད་བྱུང་དང་། ཕྱོགས་གཉིས་ཀའི་ངོས་ནས་ཐུགས་ཉེ་པོ་ཡོད་པའི་རྣམ་པ་ཤུགས་ཆེན་པོ་བྱུང་ཡོད། སྲིད་འཛིན་མཆོག་གིས་ཁོང་གི་སྲས་མོ་གཉིས་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁར་ཆེད་ཁྲིད་གནང་ཡོད་ཅིང། སྐབས་དེར་ཨ་རིའི་སྲིད་འཛིན་མཆོག་གིས་ངའི་བུ་མོ་གཉིས་ཀྱིས་༸གོང་ས་ཏཱ་ལའི་བླ་མ་མཆོག་མཇལ་འདོད་ཧ་ཅང་ཆེན་པོ་བྱེད་ཀྱི་འདུག་ཅེས་ཞུས་ཡོད། དེ་ནས་༸གོང་ས་མཆོག་གིས་ཨ་རིའི་སྲིད་འཛིན་གྱི་བུ་མོ་གཉིས་ལ་མཇལ་ཁ་དང་མཇལ་དར་གསོལ་རས་སྩ། གཞི་རྩའི་གནད་དོན་ཐོག་ཨ་རིའི་སྲིད་འཛིན་མཆོག་གིས་བོད་མི་རིགས་ཀྱི་ཐུན་མོང་མ་ཡིན་པའི་ཁྱད་ཆོས་ལྡན་པའི་ཆོས་དང་རིག་གཞུང་། སྐད་ཡིག་བཅས་པ་སྲུང་སྐྱོབ་བྱེད་རྒྱུར་རྒྱབ་སྐྱོར་ཤུགས་ཆེ་ཡོད་སྐོར་སླར་ཡང་གསུངས་ཡོད། ལྷག་པར་༸གོང་ས་མཆོག་གིས་ལམ་དབུ་མའི་ཐོག་བོད་རྒྱ་གཉིས་ཀྱི་དཀའ་རྙོག་སེལ་ཐབས་མཛད་པ་དེ་ཧ་ཅང་གི་རླབས་ཆེན་ཞིག་ཡིན་མ་ཟད། ལམ་དབུ་མའི་ཐོག་མུ་མཐུད་ཕྱག་ལས་གནང་བ་དེར་ང་ཚོས་གུས་བརྩི་དང་རྒྱབ་སྐྱོར་ཡོད་ཅེས་ཞུས་ཡོད། དེ་བཞིན་ཨ་རིའི་སྲིད་འཛིན་མཆོག་གིས་ཁོང་གིས་གཙོས་ཨ་རིའི་གཞུང་གི་གནད་ཡོད་མི་སྣ་ཚོར་རྒྱ་ནག་གཞུང་དང་ཐུག་རྒྱུའི་གོ་སྐབས་ནམ་བྱུང་ལ་བོད་ཀྱི་གནད་དོན་ཐོག་ཤུགས་ཆེན་པོ་ཤོད་ཀྱི་ཡོད་ལ། མ་འོངས་པར་ཡང་དེ་ལྟར་མུ་མཐུད་བྱེད་ཀྱི་ཡིན་ཞེས་ཞུས་ཡོད། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱིར་འཛམ་གླིང་གི་སྐྱེ་འགྲོ་ཡོངས་དང་ལྷག་པར་ཨ་རིའི་རྒྱལ་ཁབ་འདི་མ་འོངས་པ་དཔལ་འབྱོར་དང་ཆབ་སྲིད་སོགས་གང་ཅིའི་ཐོག་ཡར་རྒྱས་ཡོང་བའི་གསོལ་འདེབས་སྨོན་ལམ་ཞུ་བཞིན་ཡོད། ཨ་རིའི་རྒྱལ་ཁབ་འདི་ནི་འཛམ་གླིང་ནང་མང་གཙོ་དང་རང་དབང་ཡོད་པའི་རྒྱལ་ཁབ་གཙོ་བོ་དེ་ཆགས་ཡོད་སྟབས། ཨ་རིའི་རྒྱལ་ཁབ་ཀྱི་དཔལ་འབྱོར་དང་ནུས་སྟོབས་ཉམས་གུད་ཕྱིན་ན་དེས་ཨ་རི་ཙམ་མ་ཟད། འཛམ་གླིང་སྤྱི་ལ་གནོད་འཚེ་ཡོང་གི་ཡོད་པར་བརྟེན། མགོན་པོ་གང་ཉིད་མཆོག་གིས་ཐུགས་སྨོན་མཛད་པ་ཡིན་ཞེས་བཀའ་སྩལ་ཡོད། དེ་བཞིན་༸གོང་ས་མཆོག་གིས་བཀའ་སློབ་གནད་འགག་ཆེ་ཤོས་ནི་བར་སྐབས་མགོན་པོ་གང་ཉིད་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་དབུ་ཁྲིད་ཚོར་རྩིས་སྤྲོད་གཙང་མ་མཛད་པའི་སྐོར་ཞིབ་ཕྲ་འགྲེལ་བརྗོད་མཛད་པ་དང་འབྲེལ། མགོན་པོ་གང་ཉིད་མཆོག་དགུང་ལོ་ཆུང་དུས་ནས་མང་གཙོའི་ལམ་ལུགས་ཐོག་ཐུགས་སྣང་ཆེན་པོ་གནང་གི་ཡོད་སྐོར་ཞིབ་ཚགས་འགྲེལ་བརྗོད་མཛད་ཡོད། སྐབས་དེར་༸གོང་ས་མཆོག་གིས་བཀའ་སྩལ་དོན། མགོན་པོ་གང་ཉིད་མཆོག་དེ་རིང་འདིར་སྐུ་ཉིད་ལ་འགྱུར་བ་འདིའི་ཐོག་སྙན་སེང་ཞུས་པར་བཅར་བ་ཡིན་ཞེས་བཀའ་སློབ་སྩལ་ཡོད། དེ་ནས་སྲིད་འཛིན་མཆོག་གིས་གསུང་དོན། ༸གོང་ས་ཏཱ་ལའི་བླ་མ་མཆོག་ནས་གཞི་རྩའི་མང་གཙོའི་ལམ་ལུགས་ལ་གུས་བརྩི་ཡོད་སྐོར་ཤེས་ཀྱི་ཡོད། འོན་ཀྱང་བོད་རྒྱ་འབྲེལ་ལམ་གྱིས་གཙོས་བོད་མི་རིགས་ཀྱི་ལས་དོན་གནད་འགག་ཆེན་པོའི་ཐོག་ལ་བོད་མི་རིགས་ཚང་མས་ཡིད་ཆེས་བྱེད་ས་དེ་སྐུ་ཉིད་མཆོག་ཆགས་ཡོད་པར་བརྟེན། སྐུ་ཉིད་མཆོག་གིས་ཐུགས་འགན་དེ་མུ་མཐུད་བཞེས་དགོས་ཀྱི་རེད། ཅེས་ཞུ་སྐབས་༸གོང་ས་མཆོག་གིས་དེ་ཡིན་དང་ཡིན། ངོས་རང་བོད་མི་ཞིག་ཡིན་པའི་ཆ་ནས་བོད་མི་རིགས་ཀྱི་ཁེ་ཕན་ཐོག་གང་བྱེད་དགོས་བྱུང་ཡང་བྱེད་རྒྱུ་དེ་ངོས་ཀྱི་ལས་འགན་རེད་ཅེས་བཀའ་སློབ་སྩལ་ཡོད་སྐོར་འགྲེལ་བརྗོད་གནང། གཞན་ཡང་མཇལ་འཕྲད་དེའི་སྐབས་༸གོང་ས་མཆོག་གི་དམིགས་བསལ་སྐུ་ཚབ་བཀའ་ཟུར་རྒྱ་རི་བློ་གྲོས་རྒྱལ་མཚན་མཆོག་དང་བྱང་ཨ་རིའི་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་ལགས། སྐུ་སྒེར་ཟུང་དྲུང་བསྟན་འཛིན་སྟག་ལྷ་ལགས་བཅས་ཀྱང་ལྷན་བཅར་ཞུས་ཡོད་པ་བཅས།།