༢༠༡༡ ཟླ་ ༧ ཚེས་ ༡༢ རེས་གཟའ་མིག་དམར།
༄༅། །འདི་གར་སྦར་སེལ་སྐུ་ཚབ་དོན་གཅོད་ཀྱི་ལས་བྱེད་བློ་བཟང་ཉི་མ་ལགས་ཀྱིས་ཕྱི་ལོ་ ༢༠༡༡ ཟླ་ ༧ ཚེས་ ༡༡ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༧༦ ལ་ཕེབས་པའི་འཁྲུངས་སྐར་དུས་ཆེན་ཉིན་ཡུ་རོབ་སྦེལ་ཇམ་གྱི་རྒྱལ་ས་སྦར་སེལ་ (Brussels) དུ་ཡུ་རོབ་བོད་རྒྱ་མཛའ་འབྲེལ་མཐུན་ཚོགས་ཀྱིས་གོ་སྒྲིག་འོག་བོད་རིགས་དང་རྒྱ་རིགས། སོག་རིགས་ཐུན་མོང་ནས་སྐུའི་འཁྲུངས་སྐར་དགའ་སྟོན་གྱི་མཛད་སྒོ་གཟབ་རྒྱས་ཤིག་ཚོགས་ཡོད། མཛད་སྒོའི་ཐོག་སྦར་སེལ་སྐུ་ཚབ་དོན་གཅོད་ཀྱི་ལས་བྱེད་རིག་འཛིན་ལགས་དང་བློ་བཟང་ཉི་མ་ལགས།  དེ་བཞིན་ཇར་མ་ནི།(Germany)  ཧོ་ལན་ཌི་ (Holland) བཅས་ནས་མང་གཙོ་དོན་གཉེར་བ་དང་།  རང་དབང་གི་རྩོམ་པ་པོ། བོད་དོན་རྒྱབ་སྐྱོར་ཚོགས་པ། རྒྱལ་ཚོགས་ནང་ངོ་ཚབ་མེད་པའི་མི་རིགས་ཚོགས་པ།  ས་གནས་དེ་གའི་བོད་རིགས་བཅས་མི་གྲངས་བརྒྱ་ལྷག་ཙམ་འདུ་འཛོམས་བྱུང་ཡོད། མཛད་སྒོའི་ཐོག་ཡུ་རོབ་བོད་རྒྱ་མཛའ་འབྲེལ་མཐུན་ཚོགས་ཀྱི་ཚོགས་གཙོ་བློ་བཟང་དབང་འདུས་ལགས་ནས་དུས་ཆེན་ངོ་སྤྲོད་དང་བོད་རྒྱ་མི་རིགས་གཉིས་དབར་གྱི་མཛའ་མཐུན་དང་དབུས་བོད་མིའི་སྒྲིག་འཛུགས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ད་ཕན་ལས་འགུལ་ཁག་གཅིག་སྤེལ་བ་བརྒྱུད་རྒྱ་མི་རིགས་ཀྱི་ཁྲོད་གོ་རྟོགས་སྔར་ལས་གཏིང་ཟབ་དང་། མ་འོངས་པར་ད་དུང་ཤུགས་སྣོན་རྒྱག་རྒྱུ་ཡིན་ཞེས་གསུངས། སྦར་སེལ་སྐུ་ཚབ་དོན་གཅོད་ཀྱི་སྐུ་ཚབ་ནས་དཔལ་ལྡན་བཀའ་ཤག་གི་གསུང་བཤད་སྒྲོགས་སྦྱང་ཞུས་པ་དང། བློ་བཟང་ཉི་མ་ལགས་ཀྱིས་དབུས་བོད་མིའི་སྒྲིག་འཛུགས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་དེ་དག་རྒྱ་མི་རིགས་ཚོར་སྔར་ལྷག་གོ་རྟོགས་སྤེལ་རྒྱུ་དང་།  ལྷག་དོན་བྱམས་པ་དང་སྙིང་རྗེའི་གོ་རྟོགས་གོང་སྤེལ་གཏོང་ཐབས་ལ་སྔར་ལས་ལྷག་འབད་བརྩོན་གནང་དགོས་པའི་འབོད་སྐུལ་ཞུས་ཡོད།  དེ་ནས་རང་དབང་གྱི་རྩོམ་པ་པོ་རླེའུ་ཐན་ཆི་ཡིས་གཏམ་བཤད་ནང་།  དེ་སྔོན་ཁོ་མོར་བོད་དོན་སྐོར་ལ་རྒྱུས་མངའ་དེ་ཙམ་མེད། འོན་ཀྱང་ཐེངས་གཅིག་ཁོ་མོ་བཞུགས་སྒར་རྡ་སར་ཆེད་བཅར་གྱིས་བོད་ནས་ཕེབས་པའི་ཆབ་སྲིད་བཙོན་ཟུར་ཚོར་བཅའ་འདྲི་དང་བོད་དོན་སྐོར་ལ་ཞིབ་འཇུག་བྱེད་སྐབས་བོད་ཀྱི་གནད་དོན་དེ་དངོས་བདེན་ཡིན་པ་གསལ་རྟོགས་བྱུང་། ལྷག་པར་བོད་ཀྱི་ཆོས་དང་རིག་གཞུང་གཏིང་ཟབ་པོ་དེ་དག་འཛམ་གླིང་སྤྱི་དང་།  བྱེ་བྲག་རྒྱ་མི་རིགས་ཀྱི་དཔོན་རིགས་གཙོས་མི་མང་སྤྱི་ལ་དར་སྤེལ་གཏོང་དགོས་ངེས་གསུངས། ད་བར་རྒྱ་ནག་གཞུང་གི་དཔོན་རིགས་ཚོས་བོད་ཀྱི་ཆོས་དང་རིག་གཞུང་ལ་གོ་རྟོགས་མེད་པའི་རྐྱེན་གྱིས་བོད་མི་ཚོས་དཀའ་ངལ་ཚད་མེད་ཞིག་མྱངས་དང་མྱོང་བཞིན་ཡོད་པ་རེད་ཅེས་གསུངས། དེ་བཞིན་ཇར་མན་ནས་ཕེབས་པའི་མང་གཙོ་དོན་གཉེར་བ་ཕན་ཡོན་ཀྲུང་གིས་གསུང་དོན། ད་བར་ང་ཚོས་༸གོང་ས་མཆོག་གི་ཞལ་དངོས་སུ་མཇལ་བ་དང་གསུང་ཐོས་ནས་དབུས་བོད་མིའི་སྒྲིག་འཛུགས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་དེ་བློ་གཟུ་བོར་གནས་པའི་རྒྱ་མི་རིགས་ཀྱི་ཁྲོད་དུ་གོ་རྟོགས་ཡག་པོ་བྱུང་ཡོད་པ་མ་ཟད།  བོད་རྒྱ་མཛའ་འབྲེལ་མཐུན་ཚོགས་ཀྱི་ལས་འགུལ་བརྒྱུད་ང་ཚོ་མི་རིགས་གཉིས་ཀྱི་འབྲེལ་ལམ་དེ་ཡང་སྔར་ལས་ཟབ་ཏུ་ཕྱིན་སོང་ཞེས་གཏམ་བཤད་གནང་འདུག  ལྷག་དོན་འདི་ལོའི་སྐུའི་འཁྲུངས་སྐར་གྱི་མཛད་སྒོའི་ཐོག་རྒྱ་མི་རིགས་ཚོར་སྔར་གྱི་ལས་འགུལ་དང་མི་འདྲ་བར་༸གོང་ས་མཆོག་ལ་སེམས་གཏིང་ནས་དད་གུས་ཀྱི་རྣམ་པ་དེ་མངོན་གསལ་དོད་པོ་བཏོན་ཡོད་པ་བཅས།།