༢༠༡༡ ཟླ་ ༧ ཚེས་ ༢༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༢༢ ཉིན་ནོར་ཝེ་རྒྱལ་ས་(Oslo)ཨོ་སི་ལོའི་ནང་འབར་རྫས་གས་ཐོར་བྱུང་བ་དང་། དེ་བཞིན་ནོར་ཝེ་མཚོ་གླིང་ཞིག་ཏུ་སློབ་ཕྲུག་ཚོ་ཁག་གཅིག་གི་སར་མི་སྣ་ཞིག་གིས་སྐོར་སྲུང་བའི་ཆས་གོས་གྱོན་ཏེ་མེ་མདའ་བརྒྱབ་པའི་དོན་རྐྱེན་བྱུང་བ་དེ་དག་ཐོག་ཕྱི་ཚེས་ ༢༣ ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ལྷན་ཚོགས་ངོས་ནས་(Norway)ནོར་ཝེ་གཞུང་དམངས་གཉིས་ལ་གདུང་སེམས་མཉམ་སྐྱེ་ཡོད་སྐོར་གསུང་དོན། ནོར་ཝེ་རྒྱལ་ཁབ་ངོས་ནས་བོད་དོན་ལ་གཟིགས་སྟངས་དང་། དེ་བཞིན་འཛམ་གླིང་འདིའི་ནང་དཀའ་རྙོག་གང་དུ་ཡོད་ཀྱང་དེར་བར་འདུམ་གནང་རྒྱུའི་ལས་འགན་ཞིག་དུས་ད་ལྟ་བར་འཁྱེར་བཞིན་ཡོད་པ་རེད། དེར་བརྟེན་ནོར་ཝེ་རྒྱལ་ཁབ་ལ་ང་ཚོའི་ངོས་ནས་བརྩི་མཐོང་ཆེན་པོ་ཞུ་བཞིན་ཡོད། ལྷག་པར་བོད་དོན་ཐོག་རོགས་རམ་གྱི་ལས་འགུལ་ག་དུས་ཡིན་ཡང་སྤེལ་དང་སྤེལ་མུས་རེད། ད་ཐེངས་ད་ལྟ་བུའི་འཛམ་གླིང་ནང་དཀའ་རྙོག་ཡོད་སར་ཞི་འཇམ་ཡོང་རྒྱུའི་འབད་བརྩོན་གནང་མཁན་གྱི་རྒྱལ་ཁབ་གཅིག་གི་རྒྱལ་སའི་ནང་འབར་རྫས་ཀྱིས་གཏོར་སྐྱོན་འོག་མི་མང་གང་ཙམ་ཞིག་རྐྱེན་འདས་སུ་ཕྱིན་ཡོད་པ་མ་ཟད། ལྷག་པར་སློབ་ཕྲུག་འགའ་ཞིག་ཀྱང་དེ་མཚུངས་རྐྱེན་འདས་སུ་གྱུར་ཡོད་པར་བརྟེན་བོད་མི་མང་སྤྱི་འཐུས་ལྷན་ཚོགས་ངོས་ནས་དོན་རྐྱེན་དེའི་འོག་རྐྱེན་འདས་སུ་གྱུར་བ་རྣམས་ལ་བསྔོ་སྨོན་ཞུ་རྒྱུ་ཙམ་མ་ཟད། རྗེས་ཤུལ་ནང་མི་སྤུན་མཆེད་ཚོར་གདུང་སེམས་མཉམ་སྐྱེ་ཞུ་རྒྱུ་ཡིན། དེ་ལྟ་བུའི་དྲག་སྤྱོད་ཀྱི་ལས་ཀ་བྱེད་མཁན་ཡོངས་སུ་རྫོགས་པར་ང་ཚོས་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན། དེ་བཞིན་ནོར་ཝེ་གཞུང་དམངས་གཉིས་ནས་ད་ལྟའི་དཀའ་ངལ་དེར་ཐུགས་བསམ་ཡག་པོ་བཞེས་ཏེ་ཕྱག་ལས་གནང་དགོས་རྒྱུ་དེ་གལ་ཆེན་པོ་རེད། ཕྱོགས་མཚུངས་བོད་མི་མང་སྤྱི་འཐུས་ལྷན་ཚོགས་ངོས་ནས་ནོར་ཝེ་མི་མང་ཚང་མར་གདུང་སེམས་མཉམ་སྐྱེ་ཡོད་ཅེས་གསུངས་ཡོད་པ་བཅས། །
