༢༠༡༡ ཟླ་ ༧ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བདུན་ཅུ་དོན་དྲུག་ལ་ཕེབས་པའི་སྐུའི་འཁྲུངས་སྐར་གྱི་དགའ་སྟོན་ལ་རྡ་ས་ཀ་ལབ་གསོལ་མགྲོན་ཁང་དུ་འཛིན་སྐྱོང་བཀའ་ཤག་གིས་ས་གནས་རྒྱ་གར་གནད་ཡོད་མི་སྣ་ཁག་གཅིག་ལ་དགོང་དྲོའི་གསོལ་སྟོན་ཞིག་བཤམས་ཡོད། དེ་ཉིན་དགོང་དྲོ་ཆུ་ཚོད་ ༧ ཐོག་དབུས་བོད་མིའི་སྒྲིག་འཛུགས་ཀྱི་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུས་ཁྲིམས་ཞིབ་པ་ཆེ་བ་མཆོག་དང་ཁྲིམས་ཞིབ་པ་གཞན་གཉིས། དེ་བཞིན་ལྷན་ཁང་ཁག་གི་བཀའ་བློན་རྣམ་པ། བོད་མི་མང་སྤྱི་འཐུས་ཚོགས་གཞོན་མཆོག་གིས་གཙོས་སྤྱི་འཐུས་རྒྱུན་ལས་རྣམ་པ། དྲུང་ཆེ་རྣམ་པ། རྒྱ་གར་ས་གནས་ཉེན་རྟོག་འགོ་དཔོན་དང་སྣེ་ཤན་ལས་ཁུངས་ཀྱི་འབྲེལ་མཐུད་འགོ་འཛིན་སོགས་ས་གནས་ཡུལ་མིའི་གནད་ཡོད་མི་སྣ་ཁག་གཅིག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བདུན་ཅུ་དོན་དྲུག་ལ་ཕེབས་པའི་སྐུའི་འཁྲུངས་སྐར་གྱི་དགའ་སྟོན་སྲུང་བརྩིའི་སླད་གསོལ་སྟོན་བཤམས་གནང་ཡོད་པ་བཅས།།