༢༠༡༡ ཟླ་ ༧ ཚེས་ ༨ རེས་གཟའ་པ་སངས།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་མིའི་བླ་ན་མེད་པའི་མགོན་སྐྱབས་འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོ
ང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༧༦ ལ་ཕེབས་པའི་སྐུའི་འཁྲུངས་སྐར་དུས་ཆེན་ཐེ་ཝན་ནང་རྣམ་པ་འདྲ་མིན་ཐོག་སྲུང་བརྩི་གཟབ་རྒྱས་ཞུས་ཡོད།
དེ་ཡང་ཕྱི་ལོ་ ༢༠༡༡ ཟླ་ ༧ ཚེས་ ༦ ཉིན་སྔ་དྲོ་ཐེ་ཝན་དབུས་གྲོང་ཁྱེར་ཐེ་ཀྲུང་ཁུལ་ལ་གསར་དུ་བཙུགས་པའི་བསླབ་གསུམ་ཆོས་གླིང་ནས་བོད་ཀྱི་ཆོས་ལུགས་རིས་མེད་ཀྱི་བླ་སྤྲུལ་དགེ་འདུན་རྣམ་པ་དང་། ཐེ་ཝན་རྒྱ་ལུགས་ནང་ཆོས་ཀྱི་དགེ་བཙུན་རྣམ་པ། ཐེ་ཝན་མི་མང་སོགས་མཉམ་འཛོམས་ཀྱིས་ཆོས་ཕྱོགས་ཀྱི་ཞབས་བརྟན་སྨོན་ལམ་གསུང་འདོན་གནང་ཡོད། མཛད་སྒོའི་ཐོག་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་གསུང་བཤད་གནང་རྗེས་སྨོན་ལམ་གོ་སྒྲིག་གནང་མཁན་འགན་འཛིན་གྱིས་ངོ་སྤྲོད་གསུང་བཤད་གནང་དོན། དེ་རིང་ནི་བསླབ་གསུམ་ཆོས་གླིང་དེབ་སྐྱེལ་གསར་འཛུགས་ཞུས་ནས་ལོ་གཅིག་འཁོར་བ་དང་། ༸གོང་ས༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་པའི་ཉིན་མོ་ཡིན་སྟབས་ང་ཚོས་སྐལ་བཟང་དུས་ཚོགས་ཀྱི་ཉིན་མོ་འདིར་མགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་ཞིང་ཐུགས་བཞེད་ལྷུན་གྲུབ་ཆེད་ཆོས་ཕྱོགས་དང་མཆོད་སྤྲིན་གྱི་རོལ་དབྱངས་ལམ་ནས་སྐུའི་འཁྲུངས་སྐར་སྲུང་བརྩི་ཞུ་བཞིན་ཡོད། དེ་བཞིན་ལོ་ལྟར་ཕྱི་ཟླ་ ༧ ཚེས་ ༦ ཉིན་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩིའི་སྨོན་ལམ་གོ་སྒྲིག་ཞུ་རྒྱུ་ཡིན་ཞེས་གསུངས། དེ་བཞིན་དགོང་དྲོ་དགའ་ལྡན་ཤར་རྩེ་ནང་ཆོས་སློབ་གཉེར་ཁང་གིས་གཙོ་བོ་འགན་ཁུར་ཐོག་རོལ་དབྱངས་མཚན་ཚོགས་ཀྱི་རྣམ་པའི་ཐོག་ནས་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཤིང་། མཚན་ཚོགས་དེའི་ཐོག་ཐེ་ཝན་གྱི་རོལ་དབྱངས་ཚོགས་པ་དང་། བོད་མི་གཞས་པ་སོགས་ནས་འཕགས་པ་སྤྱན་རས་གཟིགས་ལ་བསྟོད་དབྱངས་ཀྱི་ནང་དོན་གཙོ་བོའི་གཟིགས་མོ་འབུལ་བ་དང་། གོ་སྒྲིག་ཚོགས་ཆུང་ནས་ཇི་ལྟར་གསོལ་འདེབས་ཞུས་དོན་ལྟར། ༸གོང་ས་མཆོག་ནས་འཁྲུངས་སྐར་དུས་ཆེན་དང་འབྲེལ་བའི་ཐེ་ཝན་མི་མང་ལ་སྩལ་བའི་བཀའ་སློབ་བརྙན་པར་བརྒྱུད་གཟིགས་འབུལ་ཞུས། བོད་མིའི་སྒྲིག་འཛུགས་ཀྱི་ཐེ་ཝན་སྐུ་ཚབ་དོན་གཅོད་སོགས་སྐུ་མགྲོན་རྣམ་པའི་གསུང་བཤད་གྲུབ་རྗེས། གོ་སྒྲིག་ཚོགས་ཆུང་ནས་ལོ་ལྟར་ཕྱི་ཟླ་ ༧ ཚེས་ ༦ ཉིན་མོར་རིན་མེད་ཀྱིས་རོལ་དབྱངས་མཚན་ཚོགས་ཀྱི་རྣམ་པའི་ཐོག་ནས་༸གོང་ས་མཆོག་གི་འཁྲུངས་སྐར་དུས་ཆེན་སྲུང་བརྩི་ཞུས་པ་ཐེངས་གསུམ་པ་དེ་ཡིན་པ་དང་། འབྱུང་འགྱུར་མུ་མཐུད་སྲུང་བརྩི་ཞུ་རྒྱུ་ངོ་སྤྲོད་གནང་རྗེས། མཐར་དེར་འདུས་མི་མང་ཡོངས་ནས་ལག་གཉིས་ཐལ་མོ་སྦྱར་ནས་༸གོང་ས་མཆོག་སྐུ་ཚེ་ཞབས་པད་བརྟན་པ་དང་། འཇིག་རྟེན་བདེ་ཞིང་མི་མང་རྣམས་རང་དབང་ལོངས་སུ་སྤྱོད་པའི་སྨོན་ལམ་གསུང་འདོན་གནང་སྟེ་མཛད་སྒོ་ལེགས་གྲུབ་བྱུང་ཡོད་པ་བཅས།།
