༢༠༡༡ ཟླ་ ༧ ཚེས་ ༢༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༡༢ ཉིན་བཞུགས་སྒར་གངས་སྐྱིད་ཤེས་རིགས་ལས་ཁུངས་སུ་གཞི་རིམ་བར་མའི་སྤྱི་ཚོགས་ཚན་རིག་སློབ་དེབ་བསྐྱར་ཞིབ་ཀྱི་ཚོགས་འདུ་ཞིག་ཚོགས་ཡོད།  དེ་ཉིན་ཚོགས་འདུ་དེར་གཞི་རིམ་སློབ་གྲྭའི་སློབ་གཞི་བསླབ་གཞི་རྩ་འཛིན་བཟོ་འགོད་ཚོགས་ཆུང་གི་ཚོགས་གཙོ་དྲུང་འཕར་བཀྲ་ཤིས་དོན་གྲུབ་ལགས་ཀྱིས་གཙོས་སློབ་དེབ་རྩོམ་སྒྲིག་པ་དང་། སམ་བྷོ་ཊ། བོད་ཁྱིམ་ཁག་གཉིས། དབུས་བོད་སློབ་འཛིན་ཚོགས་བཅས་ཀྱི་འབྲེལ་ཡོད་དགེ་རྒན་ཁག་གཅིག་བཅས་ཀྱིས་ཉིན་གསུམ་རིང་ཚོགས་པ་དང་། ཉེ་ལམ་ཤེས་རིག་ལས་ཁུངས་ཀྱིས་གསར་དུ་རྩོམ་སྒྲིག་བྱས་པའི་གཞི་རིམ་བར་མ་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་ལ་མཐའ་མའི་བསྐྱར་ཞིབ་གནང་བ་ཞིག་དང་། ཕྱི་ལོ ༢༠༠༤ ཟླ་ ༩ བོད་མི་མང་སྤྱི་འཐུས་ལྷན་ཚོགས་ཀྱིས་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་སྤྱི་མོས་ཐོག་གཏན་འབེབས་གནང་རྗེས་ཤེས་རིག་ལས་ཁུངས་ཀྱིས་སྲིད་བྱུས་དེའི་དགོངས་དོན་བཞིན་ཕྱི་ལོ་ ༢༠༠༥ ཟླ་ ༡༠ ཚེས་ ༡༠ ཉིན་དཔེ་སྟོན་སློབ་གྲྭ་གསར་འཛུགས་དང་། ཕྱི་ལོ་ ༢༠༠༨ སྲིད་བྱུས་ཀྱི་དགོངས་དོན་འོག་སྔོན་འགྲོ་དང་གཞི་རིམ་འོག་མའི་བསླབ་གཞི་རྩ་འཛིན་ཟིན་བྲིས་ལ་བཀའ་ཤག་གིས་གཏན་འབེབས་གནང་ཡོད་པ་མ་ཟད། ཕྱི་ལོ་ ༢༠༡༠ ལོར་སླར་ཡང་གཞི་རིམ་བར་མའི་བསླབ་གཞི་རྩ་འཛིན་ཟིན་བྲིས་ལ་བཀའ་ཤག་གིས་གཏན་འབེབས་བཀའ་འཁྲོལ་ཐོབ་སྟེ་འགྲེམས་སྤེལ་གནང་མུས་ཡིན་པ་དང། དེ་མཚུངས་སློབ་གཞིའི་རྩ་འཛིན་གྱི་ལམ་སྟོན་ལྟར་གཞི་རིམ་བར་མའི་སྤྱི་ཚོགས་ཚན་རིག་སློབ་དེབ་རྩོམ་སྒྲིག་ལས་རིམ་བྱེ་བྲག་ཅིག་དང་། འཆར་གཞི་ལྟར་ན། གཞི་རིམ་བར་མའི་སྤྱི་ཚོགས་ཚན་རིག་སློབ་དེབ་གསུམ་ཕྱི་ལོ་ ༢༠༡༣ ནང་ཡོངས་ཁྱབ་འགྲེམས་སྤེལ་གནང་རྒྱུ་ཡིན་འདུག་བཅས།།