༢༠༡༡ ཟླ་ ༧ ཚེས་ ༢༢ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་མི་མང་ནས་ཐད་ཀར་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་པར་ཡུ་རོབ་གྲོས་ཚོགས་ཀྱི་འཐུས་མིས་བསྔགས་བརྗོད་ཞུས་ཡོད། ཕྱི་ལོ་ ༢༠༡༡ ཟླ་ ༧ ཚེས་ ༢༡ ཉིན་ཡུ་རོབ་གྲོས་ཚོགས་ཀྱི་འཐུས་མི་ལས་གྲུབ་པའི་བོད་དོན་རྒྱབ་སྐྱོར་ཚོགས་ཆུང་གི་ཁོངས་མི་སྐུ་ཞབས་སོ་ཁོ་ཁ་སེ་བྷ་(sogor Csaba)མཆོག་གིས་གསུང་དོན། འཛམ་གླིང་འདིའི་ནང་ལམ་ལུགས་མང་དག་ཅིག་བྱུང་ཡོད་པའི་ཁྲོད་ནས་མི་མང་གི་འདོད་བློ་དང་འཚམས་ཤོས་དེ་མང་གཙོའི་རིང་ལུགས་རེད་ལ། ང་ཚོ་ཡུ་རོབ་གྲོས་ཚོགས་ནས་ཀྱང་མང་གཙོའི་ལམ་ལུགས་ནི་གལ་འགངས་ཆེ་ཤོས་ལ་ངོས་འཛིན་གྱིས་མང་གཙོ་དར་སྤེལ་གཏོང་བའི་རྨང་གཞིའི་ཐོག་འགྲོ་བ་མིའི་ཐོབ་ཐང་སྲུང་སྐྱོབ་ཀྱིས་མཚོན་མི་རིགས་ཕན་ཚུན་མཉམ་ལས་དང་། མཛའ་བརྩེའི་ཁོར་ཡུག་ནང་གཅིག་ཕན་གཅིག་རོགས་ཡོང་བ་བྱེད་རྒྱུའི་རྩ་བ་དེ་རང་དབང་དང་མང་གཙོ་ཡིན་པ་ངོས་འཛིན་བྱེད་བཞིན་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཕྲལ་ཕུགས་རྒྱང་གསུམ་ལ་དགོངས་བཞེས་དང་མང་གཙོའི་རིང་ལུགས་དེ་བཞིན་གལ་འགངས་ཆེན་པོར་ངོས་འཛིན་མཛད་དེ། ཆབ་སྲིད་ཀྱི་སྐུ་དབང་ཡོངས་སུ་རྫོགས་པ་མི་མང་ནས་འོས་འདེམས་བྱས་པའི་དབུ་ཁྲིད་ལ་དང་བླང་ཐོག་གསོལ་རས་སྩལ་བའི་མཛད་བྱུས་དེར་བསྔགས་བརྗོད་ཞུ་བཞིན་ཡོད། དེ་བཞིན་༸གོང་ས་ཏཱ་ལའི་བླ་མ་མཆོག་བཙན་བྱོལ་དུ་༸ཞབས་སོར་འཁོད་མ་ཐག་འབྱུང་འགྱུར་བོད་མི་རྣམས་མང་གཙོའི་ལམ་དུ་སྣེ་ཁྲིད་མཛད་རྒྱུའི་འཆར་འགོད་ཀྱིས་མི་མང་གི་གནས་ཚད་དང་མཐུན་པའི་གོམ་པ་རིམ་སྤོས་ཐོག་ལེགས་བཅོས་ཀྱིས་དུས་ལ་བབ་མཚམས་སྐུ་དབང་རྩིས་སྤྲོད་མཛད་ཡོད་ཀྱང་བོད་མི་ཚོས་མུ་མཐུད་ཆབ་སྲིད་ཀྱི་ཐུགས་འགན་དགྱེས་བཞེས་དགོས་པའི་རེ་འདུན་ཞུས་ཡོད། འོན་ཀྱང་༸གོང་ས་ཏཱ་ལའི་བླ་མ་མཆོག་གིས་མང་གཙོ་ཡང་དག་དགོས་རྒྱུ་དེ་གལ་འགངས་ཆེན་པོར་གཟིགས་ཏེ་ཐུགས་ཐག་ཆོད་པོས་སྐུ་ཉིད་མཆོག་གིས་ཆབ་སྲིད་དང་འཛིན་སྐྱོང་སྐུ་དབང་ཡོངས་རྫོགས་རྩིས་སྤྲོད་བསྐྱངས་པའི་མཛད་བཟང་དེར་རྒྱ་ནག་གཞུང་གི་འགོ་ཁྲིད་ཚོས་མིག་དཔེ་ལེན་དགོས་པ་ཞིག་ཆགས་ཡོད།
ཕྱི་ལོ་ ༡༩༥༩ གོང་གི་བོད་ཀྱི་སྤྱི་ཚོགས་ཀྱི་ལམ་ལུགས་དེ་བཀས་བཀོད་རྒྱུད་འཛིན་ཞིང་བྲན་ལམ་ལུགས་ངན་དགུ་ཚང་བའི་སྤྱི་ཚོགས་དབང་ཆ་སྒེར་འཛིན་རིང་ལུགས་པ་རེད་ཅེས་རྒྱ་ནག་གཞུང་ནས་རྒྱུན་དུ་སྐྱོན་བརྗོད་བྱེད་ཀྱི་ཡོད། འོན་ཀྱང་ད་ཆ་༸གོང་ས་ཏཱ་ལའི་བླ་མ་མཆོག་གིས་བཙན་བྱོལ་བོད་མིའི་སྤྱི་ཚོགས་དེ་བཞིན་མང་གཙོའི་ལམ་ལུགས་སུ་སྣེ་ཁྲིད་མཛད་ཡོད་པ་མ་ཟད། དེང་སྐབས་སྐུ་ཉིད་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་ཚང་མ་མི་མང་གིས་འོས་འདེམས་བྱས་པའི་དབུ་ཁྲིད་ཚོར་རྩིས་སྤྲོད་མཛད་པ་དེ་ནས་མིག་དཔེ་ལེན་དགོས་པ་ལས་སྐྱོན་བརྗོད་རྩ་བ་ནས་ཞུ་རྒྱུ་ཆགས་མེད་ཅེས་གསུངས་ཡོད་པ་བཅས། །