༢༠༡༡ ཟླ་ ༧ ཚེས་ ༢ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༧ ཚེས་ ༡ ཉིན་ཨེ་པི་གསར་ལས་ཁང་གི་གསར་འགོད་པས་སྐུའི་ཡང་སྲིད་ཀྱི་གནད་དོན་སྐོར་བཀའ་དྲི་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་བའི་ནང་འཁོད་དོན། ངོས་ཀྱིས་གནད་དོན་འདི་གསལ་པོ་བཟོ་རྒྱུ་ཞིག་ལ་ངོས་ཀྱི་ཡང་སྲིད་ཐག་གཅོད་བྱེད་རྒྱུའི་མཐའ་མའི་དབང་ཆ་འདི་ངོས་རང་ལ་ཡོད་པ་མ་གཏོགས་གཞན་སུ་གཅིག་ལ་མེད་པ་མ་ཟད། དབང་ཆ་དེ་རྒྱ་ནག་གཞུང་ལ་མེད་པ་ནི་དེ་བས་ཀྱང་གསལ་པོ་ཡིན། དེ་ནི་ཆོས་ཕྱོགས་དང་འབྲེལ་བའི་གནད་དོན་ཞིག་ཆགས་ཡོད་པར་བརྟེན། ཆོས་ཁས་མི་ལེན་མཁན་རྒྱ་ནག་གཞུང་གི་འགོ་ཁྲིད་ཚོས་དེའི་ཐོག་ཐེ་བྱུས་བྱེད་རྒྱུའི་བསམ་བློ་བཅང་གི་ཡོད། འོན་ཀྱང་དེའི་ཐོག་རྒྱ་ནག་གཞུང་ལ་འགན་དབང་གང་ཡང་མེད་པ་མ་ཟད། དེ་ནི་ཁོང་ཚོ་ཆབ་སྲིད་ཀྱི་དབང་ཆས་སྨྱོན་པ་ལྟ་བུ་ཆགས་པ་རེད་ཅེས་བཀའ་ལན་སྩལ་ཡོད།
ཡང་གསར་འགོད་པས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ད་ཆ་ཆབ་སྲིད་ཀྱི་མཛད་འགན་ནས་དགོངས་ཞུ་མཛད་ཟིན་སྟབས། དེ་ལྟ་བུའི་གནས་སྟངས་འོག་བོད་དང་འབྲེལ་བའི་ཆ་རྐྱེན་གཞན་གང་ཡང་མ་བཞག་པའི་ཐོག་ནས་སྐུ་ཉིད་བོད་དུ་ཕྱིར་ལོག་ཕེབས་ཐུབ་རྒྱུར་རྒྱ་གཞུང་དང་མཉམ་གྲོས་མོལ་མཛད་རྒྱུའི་ཐུགས་འདོད་ཡོད་མེད་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ངོས་ལ་དེ་ལྟར་བྱ་རྒྱུའི་འདོད་པ་གང་ཡང་མེད། མ་གཞི་ནས་བོད་ཀྱི་རྩ་དོན་དེ་ངོས་རང་བོད་ལ་ཕྱིར་ལོག་བྱ་རྒྱུའི་གནད་དོན་ཁོ་ནར་ཐུག་མེད། གལ་སྲིད་མ་འོངས་པར་རྒྱ་ནག་གཞུང་ནས་དངོས་ཡོད་ཀྱི་གནས་ཚུལ་ལ་གདོང་ལེན་བྱ་རྒྱུའི་བློ་སྟོབས་རྙེད་པའི་རྣམ་འགྱུར་བསྟན་པ་ཡིན་ན། ངོས་རང་ཕྱིར་ལོག་གིས་སྤྱི་ཚོགས་ནང་བར་འདུམ་དང་འགྲིགས་ཆགས་ཡོད་རྒྱུའི་རོགས་ཕན་ཆེད་བསྐྱོད་རྒྱུའི་གྲ་སྒྲིག་ཡོད་ཅེས་བཀའ་ལན་སྩལ་ཡོད་པ་བཅས། །