༢༠༡༡ ཟླ་ ༦ ཚེས་ ༡༣ རེས་གཟའ་ཟླ་བ།

༄༅། །འདི་གར་སྤྱི་འཐུས་རྨོག་རུ་བསྟན་པ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༦ ཚེས་ ༨ ནས་ཉིན་གསུམ་རིང་ར་ཤི་ཡའི་མངའ་སྡེ་འུ་ལན་ཨོ་བདེ་ཡི་བསམ་འཕེལ་འགྲེམས་སྟོན་ཁང་དུ་བོད་ཀྱི་པར་རིགས་དང་། དཀྱིལ་འཁོར་སོགས་འགྲེམས་སྟོན་གཞི་རྒྱ་ཆེ་བ་ཞིག་གནང་ཡོད། འགྲེམས་སྟོན་བྱེད་ཡུལ་ནི་མངའ་སྡེའི་གཞུང་གི་འགྲེམས་སྟོན་ཁང་ཆེན་པོ་ཞིག་གི་ནང་ཡིན་པ་དང་། ཐང་ཀའི་བཟོ་དབྱིབས་ཅན་གྱི་ཤོག་བྱང་རིང་མོ་བརྒྱ་ལྷག་གི་སྟེང་བོད་ཀྱི་ཆོས་དང་རིག་གཞུང་། ཡུལ་སྲོལ་གོམས་གཤིས། བོད་རྒྱལ་བཙན་པོ་རྣམས་ཀྱི་བང་སོ་དང། དེ་དག་ལས་བཏོན་པའི་གནའ་རྫས། གཞན་ཡང་དགོན་པ་ཆེ་ཤོས་དང། སྐུ་འདྲ་རྩ་ཆེན། བོད་དང་རྒྱལ་ཁབ་གཞན་གྱི་བར་ལ་བཞག་པའི་ཆིངས་ཡིག བོད་དམག ཤོག་དངུལ། ས་ཁྲ་རྙིང་པ། ལོ་གསར་གཏོང་སྟངས། གཉེན་སྒྲིག་བྱས་སྟངས།  རྒྱན་གོས། རྩེད་རིགས་ཀྱི་སྐོར་སོགས་རྩ་ཆེན་པར་རིགས་བདུན་བརྒྱ་ལྷག་ལས་གྲུབ་པ་ཞིག་མི་མང་ལ་འགྲེམས་སྟོན་དང་། གསར་ཤོག་དང་བརྙན་འཕྲིན་གྱི་བརྒྱུད་ལམ་ནས་ཁྱབ་སྤེལ་བྱས་འདུག འགྲེམས་སྟོན་འདི་ནི་ར་ཤི་ཡའི་རྒྱལ་ཁོངས་སུ་བོད་ཀྱི་རིག་གཞུང་ལོ་རྒྱུས་དང་འབྲེལ་བའི་འགྲེམས་སྟོན་གཞི་རྒྱ་ཆེ་ཤོས་དང་ཆེས་ཐོག་མ་དེ་ཡིན། ར་ཤི་ཡའི་མངའ་སྡེ་རྒྱལ་ཡོངས་སུ་འགྲེམས་སྟོན་མུ་མཐུད་བྱེད་རྩིས་ཡོད་འདུག
རིག་གཞུང་འགྲེམས་སྟོན་འདི་ནི་སྨན་པ་གྲྭ་ཚང་འགྲོ་ཕན་རིག་བྱེད་གླིང་གི་སྨན་དགེ་བླ་བྲང་སྐལ་བཟང་ལགས་ཀྱིས་བློ་འདོན་དང་མཐུན་འགྱུར་གནང་བ་དང་། སྒྲོལ་ལྗང་གྲྭ་ཚང་གི་དགེ་རྒན་ཀླུ་འབུམ་སྐལ་བཟང་རྡོ་རྗེ་ལགས་དང་། བོད་ཀྱི་གྲགས་ཅན་རི་མོ་བ་ཀླུ་བསམ་བློ་བ། བོད་ཀྱི་གསོ་རིག་བང་ཆེན་གསར་ཤོག་གི་རྩོམ་སྒྲིག་པ་སྒྲོལ་དཀར་ལགས། འགྲོ་ཕན་རིག་བྱེད་གླིང་གི་ལས་བྱེད་བུ་མོ་སོ་ཡོལ་མ་སོགས་ནས་ཟླ་ངོ་གསུམ་རིང་དཀའ་ལས་བརྒྱབ་སྟེ་ལེགས་གྲུབ་བྱུང་བ་ཞིག་ཡིན་པ་དང་། དཔར་རིགས་དེ་དག་གི་འགྲེལ་བཤད་ཀྱང་དབྱིན་ཡིག་དང་ར་ཤི་ཡའི་སྐད་ཡིག་སོགས་ཀྱི་སྟེང་སྤེལ་ཡོད་འདུག
སྐུ་ཞབས་སྐལ་བཟང་རྡོ་རྗེ་ལགས་སུ་འགྲེམས་སྟོན་གྱི་རྣམ་གྲངས་ཅི་ཡོད་སྐོར་དྲིས་པར། ཁོང་གིས་འགྲེལ་བརྗོད་གནང་དོན། ང་ཚོས་ཟླ་ངོ་རེ་ཟུང་ལ་དཀའ་ལས་བརྒྱབ་མཐར་འགྲེམས་སྟོན་འགོ་འཛུགས་ཀྱི་ལས་གཞི་ལེགས་གྲུབ་བྱུང་། ད་ཐེངས་ཀྱི་འགྲེམས་སྟོན་གཙོ་བོ་པར་རིགས་འགྲེམས་སྟོན་ཡིན་པ་དང་། ཆོས་ཕྱོགས་ནས་སྨན་བླའི་དཀྱིལ་འཁོར་སོགས་ཀྱང་བཞེངས་སྐྲུན་བྱས་ཏེ་བོད་ཀྱི་ཐུན་མོང་མ་ཡིན་པའི་ལག་རྩལ་སྐོར་ལ་ངོ་སྤྲོད་བྱེད་རྒྱུ་བྱུང་ཞེས་གསུངས།
འགྲེམས་སྟོན་གྱི་དམིགས་ཡུལ་གང་ཡིན་སྐོར་ལ་དྲིས་པར་ཁོང་གིས་གསུང་དོན། ༸གོང་ས་༸སྐྱབས་མགོན་ཆེན་པོ་མཆོག་གིས་ར་ཤི་ཡའི་མི་མང་ལ་དམིགས་བསལ་ཐུགས་བརྩེ་མཛད་ཀྱི་ཡོད། མི་མང་གིས་ཀྱང་བོད་ཀྱི་ཆོས་དང་རིག་གཞུང་སོགས་ལ་དོ་སྣང་དང་བརྩི་བཀུར་ཆེན་པོ་བྱེད་ཀྱི་འདུག ལྷག་པར་ལོ་རྒྱུས་ཐོག་ནས་རྒྱལ་ཁབ་གཉིས་ཀྱི་བར་དམིགས་བསལ་འབྲེལ་བ་ཡོད་པ་ཞིག་རེད། དེར་བརྟེན་མི་མང་ནང་བོད་ཀྱི་ཆོས་དང་། རིག་གཞུང་། ལོ་རྒྱུས།    ས་ཁམས། ཡུལ་སྲོལ་གོམས་གཤིས་སོགས་ངོ་སྤྲོད་བྱེད་དགོས་པ་གལ་ཆེན་པོར་མཐོང་བྱུང་། གནས་སྟངས་དེར་དམིགས་ཏེ་ང་ཚོ་རང་ཉིད་འཚོ་གནས་ཀྱི་ཞོར་ཏུ་བོད་མི་རིགས་དང་རིག་གཞུང་གི་སླད་དུ་ཞབས་ཞུ་ཕྲན་ཙམ་རེ་བསྒྲུབ་ཐབས་བྱེད་རྒྱུ་ནི་ང་ཚོ་ཚང་མའི་དམིགས་ཡུལ་དང་ལས་འགན་ཡིན་སྟབས་དང་ལེན་བྱས་པ་ཞིག་ཡིན་ཞེས་གསུངས།
ཡང་ཡུལ་ལུང་དང་ཁོར་ཡུག་གཞན་ཞིག་གི་ནང་ལས་འགུལ་འདི་ལྟར་སྤེལ་སྐབས་དམིགས་བསལ་དཀའ་ངལ་གང་འདྲ་བྱུང་ཡོད་མེད་སྐོར་དྲིས་པར། ཁོང་གིས་གསུང་དོན། ལས་འགུལ་གང་འདྲ་ཞིག་སྤེལ་ཡང་དཀའ་ངལ་ཆེ་ཤོས་ནི་དཔལ་འབྱོར་རེད། འོན་ཀྱང་སྐུ་ཞབས་བླ་བྲང་སྐལ་བཟང་ལགས་ཀྱིས་མཐུན་འགྱུར་ཆ་ཚང་གནང་བར་བརྟེན་དམིགས་བསལ་དཀའ་ངལ་གང་ཡང་འཕྲད་མ་བྱུང་། ལས་ཀ་ཆ་ཚང་བ་ཞིག་བྱས་ཟིན་རྗེས་ཀམ་པུའུ་ཊར་ལ་སྐྱོན་ཤོར་བས་ཟླ་བ་གཅིག་རིང་གི་ལས་ཀ་འཕྲོ་བརླག་ཏུ་ཕྱིན་སོང་། དེ་ནི་ལས་ཀ་འདིའི་བརྒྱུད་རིམ་གྱི་དཀའ་ངལ་དང་གྱོང་གུན་ཆེན་པོ་ཞིག་ཡིན། དེ་མིན་དཀའ་ངལ་ཆུང་ཚགས་རེ་ཡོད་ཀྱང་དེ་ནི་ལས་དོན་ཐུན་མོང་ལ་ཡོད་པའི་དཀའ་ངལ་སྤྱིར་བཏང་བ་ཞིག་རེད།
མི་མང་ནས་འགྲེམས་སྟོན་འདིའི་ཐད་དོ་སྣང་གང་འདྲ་བྱེད་ཀྱི་ཡོད་མེད་སྐོར་དྲིས་པར། ཁོང་གིས་གསུང་གསལ། དོ་སྣང་ཧ་ཅང་ཆེན་པོ་བྱེད་ཀྱི་འདུག ད་ལྟ་མངའ་སྡེ་གཅིག་གི་ནང་འགོ་བཙུགས་མ་ཐག་རེད།  མི་མང་གིས་དོ་སྣང་དང་དགའ་མོས་ཆེན་པོ་བྱེད་ཀྱི་འདུག    ང་ཚོས་མུ་མཐུད་ར་ཤི་ཡ་རྒྱལ་ཡོངས་ཀྱི་མངའ་སྡེ་ཚང་མའི་ནང་བསྐོར་བསྐྱོད་ཀྱིས་ཡར་རྒྱས་འཐུས་ཚང་དུ་གཏོང་འཆར་ཡོད་ཅེས། གསུངས་ཡོད་པ་བཅས།།