༢༠༡༡ ཟླ་ ༦ ཚེས་ ༡༦ རེས་གཟའ་ཕུར་བུ།
༄༅ །ཕྱི་ལོ་ ༢༠༡༡ ཟླ་ ༦ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་རྒྱལ་ས་ཀེན་བྷེ་རི་ནང་གི་གྲོས་ཚོགས་སུ་ཆིབས་སྒྱུར་བསྐྱངས་ཏེ་
ཨོ་སི་ཊོ་ལི་ཡའི་ཆབ་སྲིད་ཚོགས་པ་ཆེ་ཁག་གི་གྲོས་ཚོགས་འཐུས་མིདང་མཇལ་འཕྲད་མཛད་ཡོད།
དེ་ཡང་ཨོ་སི་ཊོ་ལི་ཡའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་༸གོང་ས་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་གྲོས་ཚོགས་སུ་ཆིབས་སྒྱུར་སྐྱོང་སྐབས། བོད་དོན་ལ་རྒྱབ་སྐྱོར་གནང་མཁན་ཨོ་སི་ཊོ་ལི་ཡའི་ལྗང་ཁུ་ཚོགས་པའི་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་བྷ་རོན་མཆོག་དང་། ཕྱོགས་འགལ་ཚོགས་པའི་དབུ་ཁྲིད་གྲོས་ཚོགས་འཐུས་མི་ཊོ་ནི་ཨེ་བྷོཊ་མཆོག དེ་བཞིན་རྒྱལ་ཡོངས་ཚོགས་པའི་དབུ་ཁྲིད་ཝ་རེན་ཊུ་སི་མཆོག་བཅས་སོགས་ནས་མགོན་པོ་གང་ཉིད་མཆོག་ལ་ཕེབས་བསུ་གཟབ་རྒྱས་ཞུས་ཡོད། སྣེ་ལེན་མཛད་སྒོའི་ཐོག་གྲོས་ཚོགས་གོང་འོག་གཉིས་ཀྱི་འཐུས་མི་ ༨༠ བརྒལ་བ་དང་། རྒྱལ་ཁབ་ལྔའི་གཞུང་ཚབ་ཆེན་མོ་བ་སོགས་གྲོས་ཚོགས་ཀྱི་འབྲེལ་ཡོད་མི་སྣ་མང་པོ་ཞིག་མཉམ་ཞུགས་གནང་ཡོད། སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། རྒྱ་ནག་དེ་བཞིན་འགན་ཁུར་ལྡན་པའི་རྒྱལ་སྤྱིའི་ཚོགས་པའི་གྲས་སུ་ཚུད་ཆེད་འཛམ་གླིང་རྒྱལ་ཁབ་ཚོས་རོགས་རམ་གནང་དགོས་པ་དང་།
དེ་བཞིན་རྒྱ་ནག་གི་ངོས་ནས་ཀྱང་སོ་སོའི་འགན་འཁྲི་དེ་ཤེས་པ་བྱེད་དགོས། འགན་འཁྲི་ཡོད་པའི་ཚོགས་མི་ཞིག་ཡིན་པའི་ཆ་
ནས་རྒྱ་ནག་གཞུང་ནས་སོ་སོའི་རྒྱལ་ཁབ་ནང་མི་མང་ཚོར་གསར་འགྱུར་གྱི་རང་དབང་ལོངས་སུ་སྤྱོད་བཅུག་དགོས་པ་མ་ཟད། རྒྱ་ནག་གཞུང་གི་ལས་དོན་བྱེད་ཕྱོགས་དེ་བཞིན་ཕྱི་གསལ་ནང་གསལ་དགོས་སྐོར་སོགས་ཀྱི་བཀའ་སློབ་སྩལ་ཡོད།
༸གོང་ས་མཆོག་གིས་སྣེ་ལེན་མཛད་སྒོའི་ཐོག་བཀའ་སློབ་མ་སྩལ་གོང་ཨོ་སི་ཊོ་ལི་ཡའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་ ༡༥ ལ་མཇལ་འཕྲད་མཛད་པ་དང་ཆབས་ཅིག མགོན་པོ་གང་ཉིད་མཆོག་གིས་གྲོས་ཚོགས་འཐུས་མི་རྣམ་དང་ལྷན་བོད་མིའི་མང་གཙོའི་འཕེལ་རིམ་སྐོར་བཀའ་མོལ་མཛད་ཡོད། དེ་བཞིན་གྲོས་ཚོགས་འཐུས་མི་རྣམས་ཀྱི་ངོས་ནས་ཀྱང་བོད་ཀྱི་རིག་གཞུང་དང་འཚོ་བརྟེན་ལ་ཉེན་ཚབས་ཆེན་པོ་ཡོད་པར་ངོས་འཛིན་གནང་བཞིན་ཡོད་པ་མ་ཟད་། རྒྱ་ནག་གི་རྩ་ཁྲིམས་སྒྲོམ་གཞིའི་ནང་གསལ་བའི་བོད་མི་ཡོངས་ལ་མིང་དོན་མཚུངས་པའི་རང་སྐྱོང་ཐོབ་ཐབས་ཀྱི་བོད་མིའི་མངོན་འདོད་དེར་རྒྱབ་སྐྱོར་གནང་རྒྱུ་ཡིན་ཞེས་གསུངས་ཡོད། རྩ་བའི་ད་ལྟའི་ཆར་ཨོ་སི་ཊོ་ལི་ཡའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ནང་ཚོགས་མི་ ༢༦ ཡོད་པ་དང། ཁོང་རྣམས་ཀྱི་ཁོངས་ནས་ཚོགས་མི་ཁག་གཅིག་ནི་དེ་སྔ་ཕྱི་ལོ་ ༢༠༠༩ ལོར་ཐོག་མར་རྡ་སར་ཕེབས་པའི་ཨོ་སི་ཊོ་ལིའི་གྲོས་ཚོགས་ཀྱི་འཐུས་མིའི་གྲས་ཡིན།
ཡང་དེ་ཉིན་ཨོ་སི་ཊོ་ལི་ཡའི་གྲོས་ཚོགས་ནང་འཛམ་གླིང་ཞི་བདེའི་ཆེད་ཆོས་ལུགས་རིས་མེད་ཀྱི་སྐུ་ཚབས་ལྔས སྨོན་ལམ་གསུང་འདོན་གནང་སྐབས་༸གོང་ས་མཆོག་གིས་ཀྱང་ལྷན་ཞུགས་མཛད་དེ་ཐུགས་སྨོན་རྒྱ་ཆེ་མཛད་ཡོད། དེ་བཞིན་༸གོང་ས་མཆོག་གིས་མང་ཚོགས་སྟོང་ཕྲག་མང་པོར་བདེ་སྐྱིད་སྐོར་བཀའ་སློབ་སྩལ་ཡོད་པ་བཅས།།
