༢༠༡༡ ཟླ་ ༥ ཚེས་ ༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༤ ཉིན་ཨ་རུ་ན་ཅལ་མངའ་སྡེའི་བློན་ཆེན་རྡོ་རྗེ་མཁའ་འགྲོ་མཆོག་མཁའ་ལམ་བརྒྱུད་ཕེབས་སྐབས་གནམ་གྲུར་རྡབ་སྐྱོན་བྱུང་སྟེ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བོད་མི་མང་སྤྱི་འཐུས་ལྷན་ཚོགས་ཀྱིས་ཐུགས་གསོ་གནང་བའི་ནང་འཁོད་དོན།
བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་འདས་གྲོངས་སུ་ཕྱིན་པར་བློ་ཕམ་ཆེན་པོ་བྱུང། དེ་བཞིན་དེ་རིང་གནས་ཚུལ་གསལ་པོ་ཆགས་པར་བརྟེན་ང་ཚོས་ཐུགས་གསོའི་འཚམས་འཕྲིན་ཞིག་འབུལ་རྒྱུ་ཡིན། རྩ་བའི་ཨ་རུ་ནཱ་ཅལ་མངའ་སྡེ་དང་བོད་གཉིས་ཀྱི་དབར་ལོ་རྒྱུས་ཐོག་ནས་འབྲེལ་བ་ཤུགས་ཆེན་པོ་ཡོད། ལྷག་པར་བོད་མི་རྣམས་བཙན་བྱོལ་ལ་འབྱོར་རྗེས་ཨ་རུ་ནཱ་ཅལ་མངའ་སྡེ་དང་བཙན་བྱོལ་བོད་གཞུང་གི་དབར་འབྲེལ་བ་དང་། དེ་བཞིན་ཨ་རུ་ནཱ་ཅལ་མངའ་སྡེའི་དཔོན་རིགས་ཚོའི་ངོས་ནས་ཀྱང་བཙན་བྱོལ་བོད་མིའི་གནས་སྟངས་ཐོག་རྒྱབ་སྐྱོར་ཤུགས་ཆེ་གནང་བ་རེད། མངའ་སྡེའི་བློན་ཆེན་ཚེ་འདས་རྡོ་རྗེ་མཁའ་འགྲོ་མཆོག་ལ་མཚོན་ན་ཨ་རུ་ནཱ་ཅལ་མངའ་སྡེའི་བློན་ཆེན་མ་ཆགས་གོང་ང་ཚོ་བོད་པ་དང་འབྲེལ་བ་ཆེན་པོ་ཡོད། མངའ་སྡེའི་བློན་ཆེན་དུ་བསྐོ་གཞག་བྱུང་རྗེས་ཀྱང་༸གོང་ས་༸སྐྱབས་མགོན་ཆེན་པོ་མཆོག་ཨ་རུ་ནཱ་ཅལ་མངའ་སྡེར་གདན་ཞུ་གནང་རྒྱུའི་མཚོན་མགོན་པོ་གང་ཉིད་མཆོག་གི་གསུང་ཆོས་མང་དག་ཅིག་ལ་ཁོང་བཅར་རྒྱུ་དང་མཆོད་འབུལ་ཞུ་རྒྱུ་སོགས་གནས་སྟངས་མང་པོ་ཞིག་གི་ཐོག་འབྲེལ་བ་ཤུགས་ཆེ་ཡོད། དེར་བརྟེན་ཨ་རུ་ནཱ་ཅལ་མངའ་སྡེའི་གཞུང་དང། འགོ་ཁྲིད་རྣམ་པ། དེ་བཞིན་མི་མང་ཚང་མར་བཙན་བྱོལ་བོད་གཞུང་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཐུགས་གསོ་ཞུ་རྒྱུ་དང། ལྷག་པར་ཁོང་གི་ནང་མི་སྐུ་འཁོར་བཅས་ཚང་མར་ང་ཚོས་ཐུགས་གསོ་ཞུ་རྒྱུ་ཡིན། མ་འོངས་པར་ཡིན་ནའང་ཨ་རུ་ནཱ་ཅལ་གཞུང་དང་བཙན་བྱོལ་བོད་མིའི་དབར་གྱི་འབྲེལ་བ་དེ་ཁོང་གི་ལམ་བཟང་གསོལ་གཏོད་གནང་ཡོད་པ་བཞིན་དེའི་རྗེས་སུ་འཇུག་རྒྱུ་དང་ང་ཚོའི་ངོས་ནས་ཀྱང་རེ་བ་དེ་བཞིན་ཞུ་གི་ཡོད་ཅེས་ཞུ་རྒྱུ་ཡིན། ཞེས་གསུངས་ཡོད་པ་བཅས། །