༢༠༡༡ ཟླ་ ༥ ཚེས་ ༧ རེས་གཟའ་སྤེན་པ།
༄༅། །འདི་གར་སུད་སི་བོད་གཞུང་སྐུ་ཚབ་དོན་ཁང་གིས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༤ ཚེས་ ༡༢ ཉིན་དོན་ཁང་གི་ཁྱབ་ཁོངས་རྒྱལ་ཁབ་ཁག་གི་ཕྱི་སྲིད་བློན་ཆེན་ཁག་ལ་ཨ་མདོ་རྔ་པ་ཀིརྟི་དགོན་པའི་གྲྭ་ཕུན་ཚོགས་ལགས་ནས་རྒྱ་གཞུང་གིས་བོད་མིར་དྲག་གནོན་དང་འགྲོ་བ་མིའི་ཐོབ་ཐང་སྤྲོད་ཀྱི་མེད་པར་ངོ་རྒོལ་གྱིས་རང་ལུས་མེར་སྲེག་བཏང་རྗེས། རྒྱ་གཞུང་ཉེན་རྟོག་དམག་མིས་ཀིརྟི་དགོན་པ་མཐའ་བསྐོར་ནས་ཕྱི་ནང་འགྲོ་ལམ་བཀག་ཅིང་། མཐའ་ན་དགོན་པའི་ནང་དགེ་འདུན་པ་དང་མི་མང་འགྲོ་འོང་ལ་བཀག་འགོག་གིས་དགེ་འདུན་པར་བཟའ་ཆ་སོགས་དཀའ་ངལ་ཅི་ཆེ་འཕྲད་བཞིན་པ་དང་། ས་གནས་མི་མང་ཚོས་དགོན་པ་སྲུང་སྐྱོབ་སླད་དགོན་པའི་ཉེ་འཁྲིས་སུ་སྡོད་མུས་ལ་སོང་། དྲག་ཆས་ཉེན་རྟོག་པ་དང་གདོང་ཐུག་མ་ཡོང་བའི་ངེས་པ་མེད་སྟབས་དེ་དག་ལས་སྐྱོབ་ཆེད་འཕྲལ་དུ་རྒྱ་གཞུང་ནས་དྲག་གནོན་མཚམས་འཇོག་གི་གནོན་ཤུགས་སྤྲོད་གནང་ཡོང་བའི་འབོད་སྐུལ་སྙན་ཞུ་ཕུལ་ཡོད།
ཚེས་ ༡༤ ཉིན་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་འོག་ཆོས་དད་རང་མོས་ཐོག་ཞིབ་འཇུག་གནང་མཁན་མཁས་དབང་གྷི་ཧཡི་ནར། སྦཡེལ་ཕེཀྲི་མཆོག་གི་མཚན་ཐོག་ཨ་མདོ་རྔ་པ་ཀིརྟི་དགོན་པའི་ཛ་དྲག་གནས་སྟངས་སླད་རྒྱལ་ཚོགས་ཆོས་དད་རང་མོས་ཐོག་ཞིབ་འཇུག་མཁས་དབང་གི་ལས་རོགས་སྐུ་ཞབས་མཡི་ཀེལ་ལགས་ཀྱིས་གཙོས་མནར་གཅོད་འགོག་པའི་ཞིབ་འཇུག་པ་དང་བཟའ་ཆའི་ཐོག་ཞིབ་འཇུག་པ། གར་སོང་ཆ་མེད་ཕྱིན་པའི་ཞིབ་འཇུག་ལས་དོན་རུ་ཁག་བཅས་ཀྱི་འབྲེལ་ཡོད་ལས་བྱེད་མཉམ་ཡིག་ངག་གཉིས་ཐོག་ནས་སྙན་སེང་དང་། ཀིརྟི་རིན་པོ་ཆེ་མཆོག་གིས་རྒྱ་གཞུང་དབུས་ས་གཉིས་ཀྱི་འགོ་ཁྲིད་ཚོར་གནང་བའི་འབོད་སྐུལ་ཕྱག་བྲིས་ནང་དོན་འགྲེལ་བརྗོད་དབྱིན་སྒྱུར་ཞུས་པ་མཁྱེན་རྟོགས་སླད་དང་། ལྷག་པར་རྒྱ་གཞུང་གི་དྲག་ཆས་དམག་མིས་འཛིན་བཟུང་བྱས་པའི་དགེ་འདུན་པ ༡༣ མཚན་ཐོ་ཕུལ་ཏེ་འཕྲལ་དུ་གློད་བཀྲོལ་ཡོང་ཐབས་རྒྱ་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུས།
ཕྱི་ཟླ་ ༤ ཚེས་ ༢༡ ཉིན་འབྲེལ་ཡོད་ལས་བྱེད་བསམ་འཕེལ་ལགས་ཀྱིས་རྒྱལ་ཚོགས་ཀྱི་བཟའ་བཅའི་ཐོག་ཞིབ་འཇུག་པ་མཁས་དབང་གི་ལས་རོགས་སྐུ་ཞབས་ཨུལ་རིག་ཧས་ཊིན་ལགས་ཐུག་འཕྲད་གནང་སྟེ། རྒྱ་གཞུང་ནས་བོད་ནང་གི་བོད་མི་ཞིང་འབྲོག་གཞིས་སྤོས་སྲིད་བྱུས་ལག་བསྟར་བྱེད་མུས་དེས་ཞིང་འབྲོག་ཚོར་དཀའ་ངལ་ཇི་ལྟར་འཕྲད་བཞིན་པ་དང་ད་ལྟའི་གནས་སྟངས་ངོ་སྤྲོད། དེ་བཞིན་མ་འོངས་པར་དོན་ཁང་ནས་གནས་ཚུལ་འབུལ་ཕྱོགས་སྐོར་ལ་ལམ་སྟོན་ཡང་ཞུས་ཡོད།
ཕྱི་ཚེས་ ༢༤ ཉིན་དོན་ཁང་གི་ལས་བྱེད་བསྟན་འཛིན་བསམ་འཕེལ་ལགས་ཀྱིས་རྒྱལ་ཚོགས་ཆོས་དད་རང་དབང་ཐོག་ཞིབ་འཇུག་པ་མཁས་དབང་གི་ལས་རོགས་སྐུ་ཞབས་མཡེ་ཀེལ་ལགས་ཐུག་འཕྲད་གནང་སྟེ། རྔ་པ་ཀིརྟི་དགོན་པར་དགེ་འདུན་དང་མི་མང་འགྲོ་འོང་བཀག་འགོག་གིས་བཟའ་ཆས་མ་འདང་བའི་ཛ་དྲག་གནས་སྟངས་སྐོར་སྙན་ཞུ་ཕུལ་བ་མ་ཟད། ད་ཆ་རྒྱ་གཞུང་ཉེན་རྟོག་པས་ཀིརྟི་དགོན་པའི་དགེ་འདུན་པ་འཛིན་བཟུང་ལ་དོགས་ཏེ་བོད་མི་རྒན་རབས་མི་གྲངས་ ༢༠༠ བརྒལ་བས་དགེ་འདུན་པ་བཙན་ཁྲིད་ལས་འགོག་ཐབས་དྲག་ཆས་ཉེན་རྟོག་པར་འབོད་སྐུལ་ཞུས་ནའང་རྡུང་རྡེག་གིས་བོད་མི་རྒན་རབས་གཉིས་རྐྱེན་ལམ་དུ་བཏང་བའི་ཛ་དྲག་གནས་ཚུལ་ལས་སྐྱོབ་ཐབས་དང་། ལྷག་པར་ཕྱི་ཚེས་ ༢༡ ཉིན་དགེ་འདུན་པ་གྲངས་ ༣༠༠ བཙན་ཁྲིད་བྱས་པ་རྣམས་གློད་བཀྲོལ་དགོས་པ། བོད་མི་གཉིས་རྐྱེན་འདས་སུ་བཏང་བར་རང་དབང་ཅན་གྱི་ཞིབ་འཇུག་པས་ཞིབ་འཇུག་གིས་འདས་པོའི་ནང་མིར་གུན་གསབ་ཇི་བཞིན་སྤྲོད་དགོས་པ། དགོན་པའི་ནང་རྒྱལ་གཅེས་ཆོས་གཅེས་ཟེར་བའི་ལས་འགུལ་མཚམས་འཇོག་དང་དགོན་གྲོང་ནང་དྲག་ཆས་དམག་མི་གནས་སྡོད་བྱེད་བཞིན་པ་རྣམས་འཕྲལ་དུ་ཕྱིར་སློག་དགོས་པ། མཐའ་དོན་རྒྱལ་ཚོགས་ཀྱི་ཆོས་དད་རང་མོས་ཐོག་ཞིབ་འཇུག་པས་དགོན་པར་དྲག་གནོན་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་བཞིན་པའི་གནས་སྟངས་ལ་གསར་འགོད་གསལ་བསྒྲགས་ཤིག་ཡོང་བའི་འབོད་སྐུལ་སྙན་ཞུ་དང་དགེ་འདུན་པ་འཛིན་བཟུང་བྱས་ཁོངས་མི་གྲངས་ ༤༩ མཚན་ཐོ་ལག་འབྱོར་བྱུང་བ་དག་ཕུལ་ཡོད། དེ་བཞིན་རྒྱལ་སྤྱི་གཞུང་འབྲེལ་མིན་པའི་ཚོགས་པ་ (Amnesty International. Human Rights Watch and  International Commission of Jurist)  བཅས་ལ་ཕུལ།
ཚེས་ ༢༤ ཉིན་ས་གནས་ཛུ་རིཀ་ཏུ་ཡུ་རོབ་བོད་རིགས་གཞོན་ནུའི་མཐུན་ཚོགས་ནས་ཚོགས་ཆེན་དུ་མགྲོན་འབོད་ལྟར་རྒྱ་རིགས་འབྲེལ་མཐུད་པ་བློ་བཟང་ཉི་མ་ཆེད་བཅར་གནང་སྟེ་ཚོགས་འདུར་མི་གྲངས་ ༡༠༠ བརྒལ་བར་བོད་དོན་ཐོག་གཏམ་བཤད་དང་ཚོགས་བཅར་བའི་དྲི་བ་ཁག་ལ་ལན་འདེབས་གནང་ཡོད། ཕྱི་ཚེས་ ༢༧ ཉིན་ཨ་རི་རླུང་འཕྲིན་ཁང་གི་ཀུན་གླེང་ལས་རིམ་ནང་བློ་བཟང་ཉི་མ་ལགས་མཉམ་ཞུགས་གནང་སྟེ (Twitter )དང་རྒྱ་ནག་གི་དྲ་རྒྱ་ཝི་པའོ་གཉིས་བེད་སྤྱད་ནས་བོད་དོན་དྲིལ་བསྒྲགས་དང་རྒྱ་རིགས་འབྲེལ་ལམ་སྐོར་འགྲེལ་བཤད་གནང་ཡོད་པ་བཅས། །