༢༠༡༡ ཟླ་ ༥ ཚེས་ ༡༨ རེས་གཟའ་ལྷག་པ།
༄༅། །སྦེལ་ཇམ་གྱི་རྒྱལ་ས་སྦར་སིལ་དུ་ཡུ་རོབ་སྤྱི་མཐུན་ཚོགས་པའི་གྲོས་ཚོགས་ཀྱི་འཐུས་མི་སྐུ་ཞབས་པོ་རོ་ཝེ་རཱ་ (Provera) ལགས་ཀྱིས་ཟླ་བ་སྔོན་མར་ཡུ་རོབ་སྤྱི་མཐུན་ཚོགས་པའི་ཕྱི་འབྲེལ་ལས་དོན་ཚན་པ་དང་བདེ་འཇགས་སྲིད་བྱུས་ཀྱི་ཆེས་མཐོའི་སྐུ་ཚབ་ལྕམ་སྐུ་ཨ་ཤི་ཊོན་ (Lady Ashton) མཆོག་ལ་བོད་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་དེར་སྐྱོན་བརྗོད་གནང་དགོས་པའི་རེ་འདུན་བཏོན་པ་ལྟར།  རྔ་པ་ཀིརྟིའི་དགོན་པའི་གནས་སྟངས་ཐོག་སེམས་འཚབ་ཆེན་པོ་ཡོད་སྐོར་གསུང་དོན།
ང་རང་ཀིརྟི་དགོན་པའི་དགེ་འདུན་པར་གཅར་རྡུང་དྲག་པོས་རྐྱེན་འདས་སུ་གྱུར་པ་དང། རྡུང་རྡེག་ཚབས་ཆེ་བཏང་བ། དེ་བཞིན་དགོན་པའི་ནང་བཀག་ཉར་བྱས་པ་སོགས་ལ་སེམས་འཚབ་ཆེན་པོ་འདུག རྒྱ་ནག་གི་རྒྱལ་ས་པེ་ཅིང་དུ་ཡོད་པའི་ཡུ་རོབ་སྤྱི་མཐུན་ཚོགས་པས།  དངོས་ཡོད་གནས་ཚུལ་ཤེས་ཐབས་བྱས་ཡོད་ཀྱང་། རྒྱ་ནག་གཞུང་གིས་ཀིརྟི་དགོན་པ་སྒོ་བརྒྱབ་སྟེ་ཕྱི་རྒྱལ་མི་རིགས་རྣམས་ས་གནས་དེ་ནས་ཕྱིར་འབུད་བྱས་མིན་ལ་མ་ལྟོས་པར། ཡུ་རོབ་སྤྱི་མཐུན་ཚོགས་པའི་སྐུ་ཚབ་རྣམ་པས་ཀིརྟི་དགོན་པའི་དངོས་ཡོད་གནས་ཚུལ་ཤེས་ཐབས་ཀྱི་འབད་བརྩོན་མུ་མཐུད་རྒྱུ་ཡིན།
ཡུ་རོབ་སྤྱི་མཐུན་ཚོགས་པའི་ངོས་ནས་རྒྱ་ནག་གཞུང་ལ་བོད་མི་ཚོར་ཆོས་དད་རང་དབང་དང་ཤེས་ཡོན་རང་དབང་། རིག་གཞུང་སྲུང་སྐྱོབ་ཀྱི་རང་དབང་སོགས་ལ་བརྩི་སྲུང་ཞུ་དགོས་པའི་རེ་འདུན་ཡང་ཡང་ཞུས་ཡོད།
དེ་བཞིན་མ་འོངས་པར་ང་ཚོས་རྒྱ་ནག་གི་འབྲེལ་ཡོད་དཔོན་རིགས་ཚོ་དང་ལྷན་གཞུང་འབྲེལ་འབྲེལ་ལམ་གནང་སྐབས་ཀིརྟི་དགོན་པའི་གནས་སྟངས་མུ་མཐུད་གླེང་སློང་བྱེད་རྒྱུ་དང། ཀིརྟི་དགོན་པར་དྲག་གནོན་བེད་སྤྱོད་བྱེད་རྒྱུ་མཚམས་འཇོག་བྱེད་དགོས་པའི་རེ་འདུན་འདོན་རྒྱུ་ཡིན་ཞེས་སོགས་འཁོད་ཡོད།།