༢༠༡༡ ཟླ་ ༥ ཚེས་ ༦ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༥ ཉིན་བཙན་བྱོལ་བོད་གཞུང་བཀའ་ཤག་གིས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་དྲུང་ཆེར་ཐུགས་གསོའི་འཕྲིན་ཡིག་ཕུལ་བའི་ནང་འཁོད་དོན། ང་དང་ངའི་བཀའ་བློན་ལས་རོགས་རྣམས་ཀྱིས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་གློ་བུར་གོད་ཆག་འོག་འདས་གྲོངས་སུ་གྱུར་བར་མྱ་ངན་ཞུ་རྒྱུ་དང་། ཁོང་གི་ནང་མི་སྐུ་འཁོར་ལྷན་རྒྱས་ཚང་མར་སྙིང་ཐག་པ་ནས་གདུང་སེམས་མཉམ་སྐྱེ་ཞུ་བཞིན་ཡོད། སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་དགོངས་པ་རྫོགས་པ་དེས་ཨ་རུ་ནཱ་ཅལ་མངའ་སྡེའི་མི་མང་ཙམ་མ་ཟད། རྒྱ་གར་མི་མང་སྤྱི་ལའང་གྱོང་གུན་ཆེན་པོ་ཕོག་ཡོད། རྡོ་རྗེ་མཁའ་འགྲོ་མཆོག་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་གནང་རིང་མངའ་སྡེའི་ནང་ཡར་རྒྱས་ཧ་ཅང་ཆེན་པོ་བཏང་གནང་སྟེ་མི་མང་གི་འཚོ་བར་བདེ་སྐྱིད་གསར་པ་ཞིག་སྦྱིན་ཡོད།
སྐུ་གཤེགས་རྡོ་རྗེ་མཁའ་འགྲོ་མཆོག་གིས་ཨ་རུ་ནཱ་ཅལ་མངའ་སྡེའི་ནང་གནས་སྡོད་བོད་མི་སྐྱབས་བཅོལ་བ་རྣམས་ཀྱི་འཚོ་བ་ཡར་རྒྱས་བཏང་བའི་ཐོག་མངའ་སྡེའི་ཡུལ་མི་རྣམས་དང་བོད་མིའི་དབར་མཐུན་ལམ་གོང་མཐོར་བཏང་གནང་བར་ང་ཚོ་བོད་མི་ཚོས་སྙིང་ཐག་པ་ནས་བཀའ་དྲིན་རྗེས་དྲན་ཞུ་བཞིན་ཡོད། སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་རྐྱེན་ངན་འོག་འདས་གྲོངས་སུ་གྱུར་བ་དེས་ཨ་རུ་ནཱ་ཅལ་མི་མང་རྣམས་ལ་སྤྱི་ཁྱབ་བློན་ཆེན་ཕུལ་བྱུང་ཞིག་མེད་པར་གྱུར་བ་དང་ང་ཚོ་བོད་མི་རྣམས་ལ་མཛའ་བརྩེ་ལྡན་པའི་གྲོགས་པོ་གཅིག་མེད་པར་གྱུར་ཡོད། ཅེས་ཐུགས་གསོའི་འཕྲིན་ཡིག་ནང་འཁོད་ཡོད་པ་བཅས།
འཕྲིན་ཡིག་ངོ་མ་དབྱིན་ཡིག་དེར་རྩ་འཛིན་ཞུ།
བཙན་བྱོལ་བོད་གཞུང་བཀའ་ཤག་གིས་ཨ་རུ་ནཱ་ཅལ་མངའ་སྡེའི་སྤྱི་ཁྱབ་དྲུང་ཆེར་ཐུགས་གསོའི་འཕྲིན་ཡིག་ཕུལ་བ།
གསར་གནས།
འབྲེལ་གནས།
