དྲིལ་བསྒྲགས་དྲུང་ཆེ། ཕྱི་འབྲེལ་བཀའ་བློན་མཆོག ཕྱི་འབྲེལ་དྲུང་ཆེ།
༢༠༡༡ ཟླ་ ༥ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༣ ཉིན་གྱི་སྔ་དྲོ་ཆུ་ཚོད་ ༡༠ ཐོག་རྡ་ས་མེག་གྷན་གཙུག་ལག་ཁང་གི་ཉེ་འགྲམ་དུ་རྟེན་གཞི་བྱས་པའི་བོད་ཀྱི་ འགྲེམས་སྟོན་ཁང་ནང་བཙན་བྱོལ་བོད་གཞུང་ཕྱི་དྲིལ་འགྲེམས་སྟོན་ཚན་པས་བོད་ཀྱི་ བྱུང་རབས་ལ་ཡུད་ཙམ་ལྟ་བ་ཞེས་པའི་ (Glimpses of the History of Tibet) པར་རིགས་ཀྱི་འགྲེམས་སྟོན་ཞིག་དབུ་ འབྱེད་གནང་ཡོད།
མཛད་སྒོའི་སྐབས་བཙན་བྱོལ་བོད་གཞུང་ཕྱི་འབྲེལ་ལས་ཁུངས་ཀྱི་བཀའ་བློན་སྟག་ལྷ་ སྐལ་བཟང་དབྱངས་སྐྱིད་མཆོག་དང་དྲིལ་བསྒྲགས་དྲུང་ཆེ་ཐུབ་བསྟན་བསམ་འཕེལ་ལགས། ཕྱི་འབྲེལ་དྲུང་ཆེ་ཨ་ཏི་ཤ་བསྟན་འཛིན་ཕུན་ཚོགས་ལགས་བཅས་དབུ་བཞུགས་ཀྱིས་ཕྱི་ ནང་གསར་འགོད་པ་ ༢༠ ཙམ་ཕེབས་ཡོད།
དེ་ཡང་དབུ་འབྱེད་མཛད་སྒོའི་ཐོག་མར་ཕྱི་དྲིལ་འགྲེམས་ སྟོན་ལས་བྱེད་བཀྲིས་ཕུན་ཚོགས་ལགས་ཀྱིས་གསར་དུ་གོ་སྒྲིག་ཞུས་པའི་བོད་ཀྱི་ བྱུང་རབས་ཀྱི་པར་རིགས་འགྲེམས་སྟོན་དེའི་སྐོར་ངོ་སྤྲོད་གནང་རྗེས་ཕྱི་འབྲེལ་ བཀའ་བློན་མཆོག་གིས་གསུང་བཤད་གནང་དོན། བཙན་བྱོལ་བོད་གཞུང་གིས་རང་བཙན་མ་རྩོད་པར་རྒྱ་ནག་དང་ལྷན་གཉིས་སྨན་དབུ་མའི་ ལམ་གྱི་ཐོག་ནས་བོད་མི་རྣམས་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་ཐོབ་རྒྱུའི་འབད་བརྩོན་གཞིར་བཟུང་གིས་བོད་མི་ཡོད་སའི་ས་ཁུལ་ཁག་ནང་ལས་གཞི་ དེ་དང་འབྲེལ་ནས་དྲིལ་བསྒྲགས་གནང་རྒྱུའི་ཐོག་བཙན་བྱོལ་བོད་གཞུང་ཕྱི་དྲིལ་ལས་ ཁུངས་ཀྱིས་འབད་བརྩོན་ཞུས་མུས་ཡིན།
འོན་ཀྱང་བར་ལམ་ལོ་མང་རིང་གཞིས་ཆགས་ཁག་དང་ཕྱི་རྒྱལ་མི་སྣ་མི་ཉུང་བ་ཞིག་གིས་ བོད་ཀྱི་ལོ་རྒྱུས་དེ་བཞིན་བོད་རིགས་ན་གཞོན་ཚོ་དང་ཕྱི་རྒྱལ་མི་སྣ་ཚོས་ཤེས་ རྒྱུ་གལ་ཆེན་པོ་ཡིན་པའི་བསམ་ཚུལ་རིམ་པ་བྱུང་བཞིན་ཡོད། དཔེར་ན། སྔ་ལོ་སྦེལ་ཀོབ་ནང་བོད་གཞུང་མང་རྒྱལ་ཡོངས་ཚོགས་ཆེན་སྐབས་གཞིས་ཆགས་ཁག་ཚང་ མའི་ས་གནས་འགོ་འཛིན་ཕེབས་ཏེ་བསམ་ཚུལ་དེ་ཤུགས་ཆེན་པོ་གསུངས་བྱུང་ཞེས་སོགས་ ཀྱི་གསུང་བཤད་གནང་། དེ་རྗེས་ཕྱི་དྲིལ་འགྲེམས་སྟོན་ཚན་པའི་འགན་འཛིན་ལས་ཚབ་བསྟན་ཆོས་ལགས་ཀྱིས་ ཕྱི་འབྲེལ་བཀའ་བློན་མཆོག་དང་དྲིལ་བསྒྲགས་དྲུང་ཆེ་དང་ཕྱི་འབྲེལ་དྲུང་ཆེ་བཅས་ ལ་ཐུགས་རྗེ་ཆེ་ཞུའི་མཇལ་དར་རེ་ཕུལ།
འགྲེམས་སྟོན་གྱི་པར་རིགས་དང་ནང་དོན་ བརྗོད་བྱ། བྱུང་རབས་ཀྱི་ཕྲེང་བ་སོགས་པར་རིགས་ནར་ལྕང་ (Panel) ༢༧ ནང་གོ་སྒྲིག་གནང་མཁན་གཙོ་བོ་ཕ་རན་སི་ཡུལ་ནས་ཡིན་པ་བོད་གནས་མཁས་དབང་དང་ཉམས་ ཞིབ་པ་སྐུ་ཞབས་ཀི་ལོ་ཌི་ཨར་པི་ (Claude Arpi) ལགས་ཡིན་པ་དང་། ཁོང་གི་འགྲེམས་སྟོན་དེ་འདྲ་ཞིག་པར་རིགས་ཀྱི་ལམ་ནས་གོ་སྒྲིག་གནང་དགོས་པའི་ རྒྱུ་མཚན་གཙོ་བོ་ནི། ཕྱི་ལོ་ ༢༠༠༩ ལོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་པོ་ཌི་ཅ་རིར་ (Pondicherry) རྟེན་གཞི་བྱས་པའི་ཨ་རོ་ཝི་ལིར་ (Auroville) ཆིབས་སྒྱུར་སྐྱོང་སྐབས་བོད་ཀྱི་བྱུང་ རབས་དང་འབྲེལ་བའི་པར་རིགས་ལོ་རྒྱུས་ཤིག་བཤམ་ཐུབ་ན་ལེགས་ཚུལ་བཀའ་སྩལ་ཡོད་པ་ བཞིན་གོ་སྒྲིག་གནང་བ་ཞིག་ཡིན་འདུག འགྲེམས་སྟོན་ནང་བོད་ཡུལ་ཐོག་མར་ཆགས་ཚུལ་དང་བོན་ཆོས་དར་རྒྱས་བྱུང་ཚུལ། བོད་ཀྱི་བཙན་པོའི་དུས་རབས་ངོ་སྤྲོད། བོད་ཡིག་བྱུང་ཚུལ། ཏཱ་ལའི་བླ་མའི་བྱུང་རབས་ལོ་རྒྱུས། བོད་ནང་བཙན་འཛུལ་བྱེད་ཚུལ་སོགས་ཀྱི་སྐོར་ཡིན་འདུག པར་རིགས་དེ་དག་ཨ་རི་དང་རྒྱ་གར། ཡུ་རོབ་བཅས་ས་གནས་འདྲ་མིན་ཁག་ནས་མཐུན་འགྱུར་གནང་བ་ཞིག་ཡིན་འདུག་པ་བཅས།།
