༢༠༡༡ ཟླ་ ༥ ཚེས་ ༢༣ རེས་གཟའ་ཟླ་བ།
༄༅། །བོད་རྒྱལ་ལོ་ ༢༡༣༨ ཟླ་ ༣ ཚེས་ ༡༩ ཕྱི་ལོ་ ༢༠༡༡ ཟླ་ ༥ ཚེས་ ༢༡ ཉིན་མདོ་ཁམས་ཏྲེ་ཧོར་སྐྱིད་སྡུག་གིས་ཇི་ལྟར་གསོལ་འདེབས་ཞུས་པ་བཞིན། བཀའ་ཤག་ལས་ཁུངས་ཀྱི་མཇལ་འཕྲད་ཁང་དུ་བཀའ་ཁྲི་མཁས་དབང་ཟམ་གདོང་རིན་པོ་ཆེ་བློ་བཟང་བསྟན་འཛིན་མཆོག་གིས་སྐུ་ཚེ་ཧྲིལ་པོར་རང་ཅག་བོད་མི་རྣམས་ཀྱི་ལྷ་སྐལ་འཕགས་མཆོག་ངུར་སྨྲིག་འཛིན་པ་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་པའི་དབུ་འོག་དཔུང་འདེགས་ཀྱིས་ཕྱར་གྲུ་མཉམ་འདེགས་ཐོག་བོད་དོན་ཆེད་དུ་སྐུ་ངལ་འཛེམས་མེད་སྐྱོན་གནང་བ་དང། ཁྱད་པར་དུ་བཀའ་ཁྲི་ལོ་བཅུའི་རིང་མཛད་ཁུར་ལ་ཐུགས་རྗེ་ལེགས་འབུལ་དང། བཀའ་དྲིན་རྗེས་དྲན་མཚོན་བྱེད་དུ་མདོ་ཁམས་ཏྲེ་ཧོར་གཞིས་བྱེས་གཉིས་ཀྱི་སྐུ་ཚབ་བཙན་བྱོལ་ས་གནས་བལ་ཡུལ་དང་། སྦེལ་ཀོབ། ལྡི་ལི། སྦིར། རྡ་ས་ཏྲེ་ཧོར་སྐྱིད་སྡུག་བཅས་འདོད་བློ་བསམ་པ་གཅིག་མཐུན་གྱི་འཐུས་ཚབ་མི་གྲངས་ཉི་ཤུ་ཙམ་མཇལ་བཅར་དང་འབྲེལ་མཎྜལ་རྟེན་གསུམ་འདེགས་འབུལ་དང། སྐུ་རྟེན་དུ་གསེར་ཟངས་ལས་གྲུབ་པའི་རྗེ་བཙུན་སྒྲོལ་མའི་སྐུ་དང་། གསུང་རྟེན་དུ་རྗེ་ཡི་ལམ་རིམ་ཆེན་མོ། ཐུགས་རྟེན་དུ་རྣམ་རྒྱལ་མཆོད་རྟེན་གཅིག་བཅས་འབུལ་ལམ་ཞུས་ཏེ། སྔོན་གྱི་མཛད་རྗེས་ལ་ཐུགས་རྗེ་ལེགས་འབུལ་མཚོན་ཆེད་ཕྱག་འཁྱེར་ཕུལ་བ་དང། སླར་ཡང་སྔར་རྒྱུན་བཞིན་བོད་ཀྱི་ཆོས་སྲིད་གང་ཐད་ལ་ལམ་སྟོན་དང་མཛད་འཁུར་བསྐྱང་རྒྱུ། སྐུ་ཚེ་བརྟན་པ་དང་མཛད་པ་གོང་འཕེལ་ཡོང་བའི་གསོལ་འདེབས་ཞུས་ཡོད།