༢༠༡༡ ཟླ་ ༥ ཚེས་ ༥ རེས་གཟའ་ཕུར་བུ།
༄༅། །འདི་གར་ཐེ་ཝན་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༠༨ ཟླ་ ༣ ཚེས་ ༢༤ ཉིན་བོད་དཀར་མཛེས་ཁུལ་གྱི་བོད་མིའི་ཞི་རྒོལ་སྐབས་རྨས་སྐྱོན་བྱུང་བ་བོད་མི་ཚེ་དབང་དོན་གྲུབ་ལགས་དང་། ཁོང་གི་ཕྱག་རོགས་བློ་བཟང་དོན་ལྡན་གཉིས་བཞུགས་སྒར་རྡ་རམ་ས་ལར་སྐྱབས་བཅོལ་དུ་འབྱོར་རྗེས། རང་གཞུང་འབྲེལ་ཡོད་ལས་ཁུངས་ནས་བཀའ་མངགས་ཕེབས་དོན་བཞིན། ཉེ་ཆར་ཁོང་གཉིས་ཐེ་ཝན་དུ་ཕེབས་འབྱོར་དང་འདི་ཚེས་ ༣ ཉིན་ལས་རིམ་མཐའ་མར་ཀྲེང་ནན་རུང་དྲན་གསོ་ཁང་དུ་ལྟ་སྐོར་ལ་ཕེབས་པ་རེད། སྐུ་ཞབས་ཀྲེང་ནན་རུང་ནི་ཐེ་ཝན་ནང་སྨྲ་བརྗོད་རང་དབང་དང་། འགྲོ་བ་མིའི་ཐོབ་ཐང་རྩོད་ལེན་ཆེད་ཕྱི་ལོ་༡༩༨༩ལོར་རང་གི་ལུས་པོ་མེར་སྲེག་བཏང་ཞིང་། དམ་པ་དེའི་ལྕམ་སྐུ་ཡེའེ་ཅུན་ལན་ལགས་ནི་ཐེ་ཝན་གྲོས་ཚོགས་ཀྱི་འཐུས་མི་གནང་སྐབས། ཐེངས་དང་པོར་ཐེ་ཝན་གྲོས་ཚོགས་ནང་བོད་དོན་གླེང་སློང་རྒྱབ་སྐྱོར་གནང་མཁན་ཞིག་ཡིན། ཕྱི་ཚེས་ ༣ ཉིན་དམ་པ་ཀྲེང་ནན་རུང་གི་གཅུང་པོ་སྐུ་ཞབས་ཀྲེང་ལགས་ནས་ཁོང་གཉིས་མཇལ་འཕྲད་ཀྱིས་ཕན་ཚུན་བསམ་ཚུལ་བརྗེ་རེས་བཀའ་བསྡུར་ལྷུག་པོ་གནང་། བོད་མི་གཉིས་ནས་དམ་པ་དེའི་འདྲ་དཔར་ལ་དཀར་གཙང་མཇལ་དར་ཕུལ་བ་དང་། མཐའ་མར་སྐུ་ཞབས་ཀྲེང་གི་ནང་མིས་གཙོས་ཐེ་ཝན་མི་མང་གིས་བོད་པར་གདུང་སེམས་མཉམ་སྐྱེ་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་འདུག ཁོང་གཉིས་ཐེ་ཝན་དུ་སྡོད་རིང་གཙོ་བོ་སྨན་པའི་བརྟག་དཔྱད་དང་། དེ་བཞིན་གསུམ་བཅུའི་དུས་དྲན་སྐབས་མཉམ་ཞུགས་ཀྱིས་མི་མང་ལ་བོད་ནང་གི་གནས་ཚུལ་ངོ་སྤྲོད། ཉེ་ཆར་བོད་རྔ་པ་ཁུལ་གྱི་ཛ་དྲག་གནས་སྟངས་དང་སྟབས་བསྟུན་ཁོང་གཉིས་ནས་གསར་འགོད་ལྷན་ཚོགས་སུ་ལོ་རྒྱུས་ངོ་སྤྲོད་སོགས་གནང་བ་ཚགས་ཤོག་དང་བརྙན་འཕྲིན་ཐོག་ཁྱབ་སྤེལ་བྱུང་བ་མ་ཟད། གཞན་ཡང་བོད་མི་དང་། ཆོས་ཚོགས་ཁག སློབ་གྲྭ་སོགས་ནང་ཁོང་གཉིས་ནས་ཕྱི་ལོ་ ༢༠༠༨ ལོར་བོད་ནང་བྱུང་བའི་རང་གི་དངོས་མྱོང་ལོ་རྒྱུས་ངོ་སྤྲོད་ཞུ་སྐབས་མཉམ་ཞུགས་གནང་མཁན་ཚང་མར་སེམས་འགུལ་ཚད་མེད་ཐེབས་ཐུབ་པ་བྱུང་ཡོད་པ་བཅས།།