༢༠༡༡ ཟླ་ ༥ ཚེས་ ༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༤ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་རྡ་སར་གནས་འཁོད་མདོ་སྨད་རྔ་བ་ཁུལ་གྱི་མི་མང་གཙོས་ཚོགས་པ་ཁག་གཅིག་གི་གོ་སྒྲིག་ཐོག་བོད་རྒྱལ་ཁབ་དང་མི་རིགས་དོན་དུ་སྐུ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་སྤྱི་དང་། རྔ་བ་ཀིརྟི་དགོན་པའི་དགེ་འདུན་པ་བློ་བཟང་ཕུན་ཚོགས་ཀྱིས་བོད་དོན་ཆེད་རང་ལུས་མེར་སྲེག་ཏེ་ཞག་བཞི་བཅུ་ཞེ་དགུ་འཁོར་བའི་དུས་ཚིགས་ལ་ཚོགས་མཆོད་དང་འབྲེལ་བའི་མཆོད་འབུལ་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༩ ཐོག་དཔལ་རྒྱལ་བ་ཀརྨ་རིན་པོ་ཆེ་མཆོག་དང་། སྟག་ལུང་ཞབས་དྲུང་རིན་པོ་ཆེ་མཆོག། རྣམ་རྒྱལ་ལེགས་བཤད་ཕན་བདེ་གླིང་གི་མཁན་པོ་རིན་པོ་ཆེས་དབུས་རྡ་སའི་ཉེ་འཁོར་གྱི་དགོན་སྡེ་གྲྭ་ཚང་དང་གཉུག་མར་གནས་པའི་སེར་སྐྱ་མི་མང་བརྒྱ་ཕྲག་འགའ་ཤས་ལྷན་ཚོགས་ཀྱི་བོད་ནང་ས་བྱི་ཞི་རྒོལ་ཆེན་མོ་དང་བོད་ཁྱོན་ཡོངས་ནས་ཞི་བའི་གྱེན་ལངས་རབས་དང་རིམ་པ་བྱས་པ་རྣམས་ལ་རྒྱ་གཞུང་གིས་ཡ་ང་རྙིང་རྗེ་མེད་པར་དྲག་གནོན་གྱིས་དམར་གསོད་དང་བཙོན་འཇུག་སོགས་བྱས་རྐྱེན། བོད་ནང་སྔ་ཕྱི་བར་གསུམ་དུ་རང་གི་རྒྱལ་ཁབ་དང་མི་རིགས་ཀྱི་དོན་དུ་སྐུ་སྲོག་ཤོར་བའི་རྒྱལ་གཅེས་དཔའ་བོ་དཔའ་མོ་སྤྱི་དང་། ལྷག་པར་ཕྱི་ཟླ་ ༣ ཚེས་ ༡༦ ཉིན་མདོ་སྨད་རྔ་བ་ཀིརྟི་དགོན་པའི་གྲྭ་བློ་བཟང་ཕུན་ཚོགས་ལགས་ཀྱིས་བོད་ཀྱི་བདེན་དོན་ཆེད་རང་ལུས་མེར་སྲེག་བཏང་སྟེ་ཞག་བཞི་དགུ་འཁོར་བའི་དུས་ཚིགས་དང་སྟབས་བསྟུན་གཙུག་ལག་ཁང་གི་རྟེན་མཆོག་སྤྱན་སྔར་གདུང་སེམས་མཉམ་སྐྱེ་དང་སྐྱིད་སྡུག་མཉམ་མྱོང་མཚོན་ཕྱིར་ཚོགས་མཆོད་དང་འབྲེལ་བའི་མཆོད་འབུལ་རྒྱ་ཆེ་ཞིག་ཚོགས་གནང་ཡོད་པ་བཅས།།