༢༠༡༡ ཟླ་ ༥ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་མངའ་སྡེ་ (Texas) ཊེཀ་ས་སའི་གྲོང་ཁྱེར་ (Dallas) ཌལ་ལ་སིའི་ནང་རྟེན་གཞི་བྱས་པའི་ ལྷོ་ཕྱོགས་གཙུག་ལག་སློབ་གྲྭས་ (Southern Methodist University in Dallas) ཇི་ལྟར་གདན་ཞུའི་གསོལ་འདེབས་ ཞུས་དོན་བཞིན་ཆིབས་སྒྱུར་བསྐྱངས་ཏེ་གཙུག་ལག་སློབ་གཉེར་ཁང་དུ་ (10th Hart Global leader forum) རྒྱལ་སྤྱིའི་དབུ་ཁྲིད་ཀྱི་གླེང་སྟེགས་ཐེངས་བཅུ་པའི་ཚོགས་མགོན་ཐོག་ གཙུག་ལག་སློབ་ཁང་གིས་མཁས་དབང་ཕྱག་འཁྱེར་འབུལ་བཞེས་མཛད་དེ་མགོན་པོ་གང་ཉིད་མཆོག་གིས་མང་གཙོའི་སྐོར་བཀའ་སློབ་སྩལ་ཡོད།
དེ་ཡང་ཐོག་མར་མགོན་པོ་གང་ཉིད་མཆོག་མིན་ནེ་པོ་ལི་སིའི་ཁུལ་གྱི་མཛད་འཕྲིན་རྣམས་ལེགས་པར་གྲུབ་རྗེས་ཌལ་ལ་སིའི་གྲོང་ཁྱེར་དུ་ཆིབས་སྒྱུར་ བསྐྱངས་ཏེ་བཞུགས་གནས་མགྲོན་ཁང་དུ་༸ཞབས་སོར་འཁོད་སྐབས། ཨ་རིའི་བོད་དོན་དམིགས་བསལ་འབྲེལ་མཐུད་ཟུར་པ་ལྕམ་སྐུ་པོ་ལ་ཌུབ་རེན་སི་ཀི་ (Paula Dobriansky) མཆོག་དང་ཨ་རིའི་སྲིད་འཛིན་ཟུར་ པ་ཇོར་ཇི་བྷུ་ཤུ་མཆོག་གི་སྤུན་མཆེད་ལྕམ་སྐུ་ཨེལ་སི་ཝལ་ཀར་ (Elsie Walker) མཆོག རྒྱལ་སྤྱིའི་བོད་དོན་ཁང་གི་འགན་འཛིན་ལྕམ་སྐུ་མེ་རི་བྷེ་ཐེ་མར་ཀི་ (Mary Beth Markey) མཆོག་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
ཉིན་རྒྱབ་༸གོང་ས་མཆོག་ཌལ་ལ་སིའི་ལྷོ་ཕྱོགས་གཙུག་ལག་སློབ་གྲྭའི་ནང་ཆིབས་སྒྱུར་སྐྱོང་སྐབས་གཙུག་ལག་སློབ་ཁང་གི་གཙོ་འཛིན་སྐུ་ཞབས་ཇེ་རལ་ཊར་ ནར་ (Gerald Turner) མཆོག་ དང་གཙུག་ལག་སློབ་ཁང་གི་མཆོད་དཔོན་སྐུ་ཞབས་པོལ་ལ་ཌེན་ (Paul Ludden) མཆོག་བཅས་ཀྱིས་ཕེབས་བསུ་གཟབ་ རྒྱས་ཞུས་ཡོད། དེ་ཡང་གཙུག་ལག་སློབ་ཁང་དེའི་ནང་རྒྱལ་སྤྱིའི་དབུ་ཁྲིད་ཀྱི་གླེང་སྟེགས་ཐེངས་བཅུ་པའི་ཚོགས་འདུ་དབུ་འཛུགས་མ་གནང་སྔོན་ཙམ་དུ་མགོན་པོ་གང་ཉིད་མཆོག་གིས་ཌལ་ལ་སིའི་གྲོང་ཁྱེར་གྱི་སློབ་གྲྭ་མི་འདྲ་བ་ ༤༥ ཙམ་ནས་ཆེད་དུ་ཚོགས་འདུར་ཕེབས་པའི་སློབ་མ་གྲངས་ ༢༠༠ ཙམ་ལ་མཇལ་ཁ་དང་བཀའ་སློབ་སྩལ་གྲུབ་བསྟུན། ཨ་རིའི་སྲིད་འཛིན་ཟུར་པ་ཇོར་ཇི་བྷུ་ཤི་ (Goerge W. Bush) མཆོག་གི་སྐུ་ཟླ་ལོ་རོ་བྷུ་ཤུ་ (Laura Bush) མཆོག་དང་མཇལ་འཕྲད་མཛད།
དེ་ནས་གཙུག་ལག་ སློབ་གྲྭའི་ཚོགས་ཁང་དུ་མི་གྲངས་ ༢༥༠༠ བརྒལ་བ་འདུ་འཛོམས་བྱུང་བའི་ཚོགས་མགོན་དུ་ཆིབས་སྒྱུར་བསྐྱངས་ཏེ་ཚོགས་འདུ་དབུ་འཛུགས་ཀྱིས་ཐོག་མར་རྒྱལ་སྤྱིའི་དབུ་ཁྲིད་ཀྱི་གླེང་སྟེགས་ཐེངས་བཅུ་པ་ཞེས་པའི་ཚོགས་པ་འཛུགས་མཁན་ལྕམ་སྐུ་ལིན་ཌ་ཌབ་ལུ་ཧཱ་ཊི་ (Mrs. Linda W Hart) ལགས་ཀྱིས་༸གོང་ས་མཆོག་ལ་ཆེ་བསྟོད་རྒྱ་ཆེ་ཞུས། དེ་རྗེས་གཙུག་ལག་སློབ་གྲྭའི་གཙོ་འཛིན་སྐུ་ཞབས་ཇེ་རལ་ཊར་ནར་མཆོག་གིས་༸གོང་ས་ མཆོག་གིས་ད་བར་སྐུ་ངལ་འཛད་མེད་ཐོག འཛམ་གླིང་ནང་ཞི་བདེ་དང་བཟོད་བསྲན། འཚེ་བ་མེད་པའི་ལམ་སྟོན་མཛད་བཞིན་པ་དེར་ཆེ་བསྟོད་ཞུས་པ་དང་སྦྲགས་མཆོད་དཔོན་སྐུ་ཞབས་པོལ་ལ་ཌེན་མཆོག་དང་ལྷན་གཙུག་ལག་སློབ་གྲྭའི་མཁས་དབང་གི་ཕྱག་འཁྱེར་ དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་ལམ་ཞུས་ཡོད། སྐབས་དེར་མགོན་པོ་གང་ཉིད་མཆོག་གིས་གཙུག་ལག་སློབ་གྲྭར་ཐུགས་རྗེ་ཆེ་ཞུ་དང་སྦྲགས་བཀའ་སློབ་ཕེབས་དོན། འཛམ་གླིང་ནང་མང་གཙོ་དར་སྤེལ་གཏོང་རྒྱུ་དང་ལྷག་པར་མི་མང་ནས་འོས་འདེམས་བྱས་པའི་དབུ་ཁྲིད་དགོས་རྒྱུ་ནི་གལ་འགངས་ཆེན་པོ་ཞིག་ཡིན་པ་ངོས་འཛིན་བྱེད་བཞིན་ ཡོད། ད་ལྟའི་ཆར་བཙན་བྱོལ་བོད་མི་ཚོས་བཙན་བྱོལ་གཞུང་གི་དབུ་ཁྲིད་མང་གཙོའི་ལམ་ ལུགས་ཐོག་ནས་འོས་འདེམས་བྱས་ཡོད། ཨ་རིའི་གཞུང་ནས་གཞི་རྩའི་མང་གཙོ་གལ་ཆེན་པོ་རྩི་བཞིན་ཡོད་པ་ལྟར་རྒྱུན་ འཁྱོངས་དགོས་རྒྱུ་གལ་ཆེན་པོ་རེད། སྐབས་རེ་དཔལ་འབྱོར་དཀའ་ངལ་འཕྲད་མིན་ལ་མ་ལྟོས་པར་ཨ་རིར་དེ་སྔ་ནས་ཡོད་པའི་མང་ གཙོ་དང་འགྲོ་བ་མིའི་རིན་ཐང་རྩ་ཆེར་འཛིན་པའི་སྲིད་བྱུས་ལ་བསྒྱུར་བ་གཏོང་རྒྱུ་མེད། རྒྱལ་སྤྱིའི་ནང་དུའང་མང་གཙོ་འཕེལ་རྒྱས་གཏོང་རྒྱུར་ཨ་རི་བ་ཚོས་ཞབས་འདེགས་མུ་མཐུད་ནས་བསྒྲུབ་རྒྱུ་གལ་ཆེན་པོ་ཡིན་ཞེས་བཀའ་སྩལ་བ་མ་ཟད། ཨ་རི་གཞུང་དང་གྲོས་ཚོགས་ཀྱིས་བོད་མིའི་བདེན་པའི་འཐབ་རྩོད་ལ་ད་བར་རྒྱབ་ སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་གནང་མཛད།
ཕྱོགས་མཚུངས་ཚོགས་བཅར་བ་གཞོན་ སྐྱེས་ཚོར་བཀའ་སློབ་སྩལ་དོན། ལྷག་པར་འབྱུང་འགྱུར་སྤྱི་ཚོགས་བཟང་ངན་ཇི་འདྲ་ཡོང་མིན་དེ་དུས་རབས་ ༢༡ པའི་ནང་འཚར་ལོངས་བྱེད་བཞིན་པའི་གཞོན་སྐྱེས་ཚོར་རག་ལུས་པར་བརྟེན། སློབ་སྦྱོང་ལ་ཧུར་བརྩོན་བྱས་པ་དང་ཆབས་ཅིག་མི་ཚེ་བཟང་མཐའ་འཁྱོལ་བ་ཞིག་ཡོང་ རྒྱུ་གལ་ཆེན་པོར་བརྩིས་དགོས། ཞེས་སོགས་ཀྱི་བཀའ་སློབ་ཕེབས་རྗེས་དེར་འདུས་སློབ་ཕྲུག་གི་དྲི་བར་བཀའ་ལན་ཡང་ སྩལ་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་འདུར་ཕེབས་པའི་ཨ་རིའི་སྲིད་འཛིན་ཟུར་པ་ཇོར་ཇི་བྱུ་ཤི་ (Goerge W. Bush) མཆོག་གི་སྐུ་ཟླ་ལོ་རོ་བྷུ་ཤུ་ (Laura Bush) མཆོག་མང་ཚོགས་ཁྲོད་བཞུགས་པར་ ངོ་མཁྱེན་ཐོག་འཚམས་འདྲི་མཛད་ཡོད་པ་བཅས།།
