༢༠༡༡ ཟླ་ ༤ ཚེས་ ༢༦ རེས་གཟའ་མིག་དམར།
སྐུ་ཞབས་མེ་ཁལ་ཌན་བྷེ་མཆོག་ཚོགས་གཙོའི་རྒྱབ་ཏུ།
༄༅། །ཕྱི་ལོ་ ༢༠༡༡ ཟླ་བ་ ༤ ཚེས་ ༢༦ རེས་གཟའ་མིག་དམར་ཉིན་ཨོ་སི་ཊོ་ལི་ཡའི་གྲོས་ཚོགས་འཐུས་མི་སྐུ་ཞབས་མེ་ཁལ་ཌན་བྷེ་མཆོག་ (Australian MP Mr. Michael Danby) རྡ་སར་ཕེབས་འབྱོར་དང་སྟབས་བསྟུན་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་ཚོར་གདུང་སེམས་མཉམ་སྐྱེ་གནང་བའི་ཞུ་ཡིག་ནང་འཁོད་དོན། བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་ཕུན་ཚོགས་ལགས་ཀྱིས་ཕྱི་ལོ་ ༢༠༠༨ ལོར་བོད་ནང་བོད་མི་ཚོས་རྒྱ་ནག་གཞུང་ལ་ཞི་བའི་སྒེར་ལངས་ལ་དྲག་གནོན་བྱས་པར་ངོ་རྒོལ་གྱི་རྣམ་པ་མཚོན་ཆེད་རང་ཉིད་སྐུ་གཟུགས་མེར་སྲེག་བཏང་ཡོད། དོན་རྐྱེན་དེས་ཉེ་ལམ་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་ཚོར་རྒྱ་མིའི་དམག་དཔུང་གིས་དྲག་གནོན་ཚབས་ཆེ་བྱས་པ་དེར་ང་རང་ཧ་ཅང་སེམས་འཚབ་ཆེན་པོ་འདུག
ངས་ཕྱི་ཟླ་ ༤ ཚེས་ ༢༡ ཉིན་རྒྱ་མིའི་དམག་མིས་ཉེ་རྡུང་བཏང་སྟེ་བོད་མི་འགའ་འདས་གྲོངས་སུ་ཕྱིན་པའི་རྗེས་ཤུལ་ནང་མི་ཚོར་གདུང་སེམས་མཉམ་སྐྱེ་ཞུ་རྒྱུ་ཡིན། ཉིན་དེའི་དགོང་མོར་རྒྱ་མིའི་དམག་མིས་ཀིརྟི་དགོན་པའི་དགེ་འདུན་པ་གྲངས་ ༣༠༠ ཙམ་དམག་མིའི་སྣུམ་འཁོར་ནང་བཅུག་སྟེ་བཙན་ཁྲིད་བྱས་སྟབས་དེ་དག་བོད་མི་ཚོས་བཀག་འགོག་བྱས་ཡོད། བོད་མི་དེ་དག་མང་ཆེ་བ་རྒན་གྲས་ཡིན། སྐབས་དེར་བོད་མི་རྒན་གྲས་སྐྱེས་པ་རང་ལོ་ ༦༠ ཡིན་པ་དོན་ཁོ་ལགས་དང་རང་ལོ་ ༦༥ སོན་པ་སྐྱེས་པ་་ཤེར་སྐྱིད་ལགས་གཉིས་རྒྱ་མིའི་དམག་མིས་གཅར་རྡུང་དྲག་པོ་བཏང་སྟེ་འདས་གྲོངས་སུ་གྱུར་ཡོད། ད་ལྟའི་ཆར་དགེ་འདུན་པ་གྲངས་ ༣༠༠ ཙམ་རྒྱ་མིའི་དམག་མིས་འཛིན་བཟུང་གིས་ཆ་རྒྱུས་མེད་པའི་ས་ཆར་ཁྲིད་ཡོད། ངས་རྒྱ་ནག་སྲིད་གཞུང་ལ་བོད་མི་ཚོར་དྲག་གནོན་བྱེད་རྒྱུ་མཚམས་འཇོག་བྱེད་རྒྱུ་དང་། ཀིརྟི་དགོན་པའི་དགེ་འདུན་པ་ཚོར་འཕྲད་བཞིན་པའི་དཀའ་ངལ་རྣམས་འཕྲལ་དུ་སེལ་དགོས་པ་མ་ཟད། འཛིན་བཟུང་བྱས་པའི་དགེ་འདུན་པ་རྣམས་འཕྲལ་དུ་གློད་བཀྲོལ་གནང་རོགས་ཞེས་ཚོར་ཤུགས་ཆེན་པོས་འབོད་བསྐུལ་ཞུ་རྒྱུ་ཡིན། །
