༢༠༡༡ ཟླ་ ༤ ཚེས་ ༨ རེས་གཟའ་པ་སངས།
༄༅། །སུད་སི་གཞུང་དང་རྒྱ་ནག་གཞུང་དབར་འཚོང་འབྲེལ་བྱེད་སྐབས་འགྲོ་བ་མིའི་ཐོབ་ཐང་རྡོག་རོལ་གཏོང་མི་ཆོག་པའི་གནད་དོན་རྣམས་ཚོང་འབྲེལ་གྱི་ཆ་རྐྱེན་ནང་འཇོག་དགོས་པའི་རེ་སྐུལ་གྱི་གསར་འགོད་གསལ་བསྒྲགས་ཤིག་སྤེལ་འདུག
ཕྱི་ལོ་ ༢༠༡༡ ཟླ་ ༤ ཚེས་ ༧ ཉིན་གསར་འགོད་གསལ་བསྒྲགས་སྤེལ་དགོས་པའི་རྒྱུ་མཚན་སྐོར་ལ་སུད་བོད་མཐུན་ཚོགས་ཀྱི་མགྲིན་ཚབ་པ་ལྕམ་སྐུ་ཀན་རིན་མཆོག་གིས་གསུང་དོན། ང་ཚོ་བོད་དོན་ལ་རྒྱབ་སྐྱོར་བྱེད་མཁན་ཞིག་ཡིན་པའི་ཆ་ནས་ཡུལ་མི་ཚོར་བོད་དོན་ངོ་སྤྲོད་དང་རྒྱ་ནག་གཞུང་གི་འཁྱོག་བཤད་ལ་སྐབས་འཕྲལ་ལན་འདེབས། དེ་བཞིན་སུད་སིའི་གཞུང་ལའང་སྐབས་དང་བསྟུན་ནས་བོད་དོན་རྒྱབ་སྐྱོར་གནང་དགོས་པའི་རེ་སྐུལ་ཞུ་རྒྱུའི་འོས་འགན་ཡོད་པ་ལྟར་འོས་འགན་དེ་སྒྲུབ་བཞིན་ཡོད། ང་ཚོས་རྒྱ་ནག་གཞུང་ནས་བོད་བཙན་འཛུལ་མ་བྱས་གོང་གི་བོད་ཀྱི་གནས་སྟངས་དང་རྒྱ་གཞུང་གིས་བོད་བཙན་བཟུང་བྱས་རྗེས། བོད་ཀྱི་གནས་སྟངས་ཤེས་པའི་ཐོག་ནས་བོད་ཀྱི་བདེན་དོན་ལ་ཕྱོགས་ལྷུང་སྤངས་ཏེ་རྒྱབ་སྐྱོར་བྱེད་ཀྱི་ཡོད།
རྒྱ་ནག་གཞུང་ནས་བོད་ཀྱི་སྤྱི་ཚོགས་དེ་ཆེས་མུན་ནག་དང་བཀས་བཀོད་རྒྱུན་འཛིན། ཞིང་བྲན་ལམ་ལུགས་ཀྱི་ནང་ཞིང་བྲན་རྣམས་རྟ་ཟོག་སེམས་ཅན་ལྟར་གྱི་འཚོ་བསྐྱལ་ཏེ། ཉི་མཚན་མ་འཁྱོལ་བའི་དཀའ་ངལ་ཡོད་ལུགས་རྟག་ཏུ་འགྲེལ་བརྗོད་བྱེད་བཞིན་ཡོད་པ་དེ་དག་དངོས་བདེན་ཡིན་ན། བོད་མི་ཚོས་རང་སྲོག་བློས་གཏོང་གིས་ཞིང་བྲན་བདག་པོར་ངོ་རྒོལ་བྱེད་ངེས་ཡིན། འོན་ཀྱང་དེ་ལྟར་བྱས་མེད། གང་ཡིན་ཞེ་ན། བོད་ཀྱི་གནའ་བོའི་སྤྱི་ཚོགས་དེ་ཡིད་དབང་འཕྲོག་པོ་ཞིག་མེད་ཀྱང་། བོད་མི་རིགས་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ཡ་རབས་སྤྱོད་བཟང་གི་གོམས་སྲོལ་བཟང་པོའི་འོག་སྨྲ་བརྗོད་དང་འགྲོ་འོང་རང་དབང་ལ་བརྟེན། གང་སྐྱིད་པ་རང་གི་ཕ་ཡུལ་དང་སུ་བྱམས་པ་རང་གིས་དཔོན་པོར་བསྟེན་ནས་བློ་བདེ་བག་ཕེབས་ལྡན་པའི་སྤྱི་ཚོགས་ཤིག་ཡིན། བཀས་བཀོད་རྒྱུན་འཛིན་ཞིང་བྲན་ལམ་ལུགས་མགོ་རྟིང་སློག་ནས་ཡར་ལངས་བཅིངས་འགྲོལ་ཐོབ་སྟེ། དེང་སྐབས་བོད་འབངས་རྣམས་ཡུལ་གྱི་བདག་པོར་གྱུར་ནས་དཔལ་ཡོན་དར་རྒྱས་སྔར་ན་མེད་པ་ཡོད་ལུགས་རྒྱ་གཞུང་ནས་འགྲེལ་བྱེད་ཀྱི་ཡོད། འོན་ཀྱང་དོན་དངོས་ཐོག་གང་དུ་གདུག་རྩུབ་ཡོད་ན་དེར་ངོ་རྒོལ་ཡོད་ཅེས་པའི་དཔེ་ལྟར། བོད་མི་ཚོས་རང་གི་སྲོག་ལ་ཉེན་ཁ་ཡོད་པ་ཤེས་བཞིན་དུ་རྒྱ་གཞུང་གི་སྲིད་བྱུས་ལ་ཞི་རྒོལ་མུ་མཐུད་དེ་བྱས་དང་བྱེད་མུས་ཡིན།
རྒྱ་གཞུང་ནས་ཞི་རྒོལ་བྱེད་མཁན་གྱི་བོད་མི་ཚོར་དྲག་གནོན་བྱས་ཏེ་ད་བར་བོད་མི་སྟོང་ཕྲག་མང་པོ་ཞིག་ལ་སྲོག་སྐྱོན་བཏང་བ་མ་ཟད། བོད་པའི་ཆོས་དང་རིག་གཞུང་གི་བསྟི་གནས་དགོན་ཁག་དྲུག་སྟོང་ལྷག་རྩ་གཏོར་བཏང་ཡོད། དོན་དངོས་ཐོག་རྒྱ་གཞུང་ནས་བོད་མི་མང་ལ་ཁ་གསབ་བྱེད་ཐབས་བྲལ་བའི་གྱོན་གུང་ཤུགས་ཆེན་བཟོས་ཡོད། ད་དུང་བློ་ཕམ་དང་བཅས་ནས་བརྗོད་རྒྱུར་བོད་ཀྱི་དཔལ་འབྱོར་ལམ་ལུགས་ཀྱི་སྒོ་མོ་ཆེ་བའི་སྲིད་བྱུས་དང་བསྟུན་ནས་རྒྱ་རིགས་འབོར་ཆེན་ཞིག་བོད་ནང་གནས་སྤོས་ཀྱིས་ཁེ་སྤོགས་ཆེ་བའི་ལས་གནས་མང་ཆེ་བ་རྒྱ་རིགས་ཀྱིས་བཟུང་སྟེ། བོད་མི་རིགས་ཀྱི་ངོ་བོ་གནས་མིན་གྱི་ཐད་ལའང་རང་བཞིན་གྱིས་བློ་འཚབ་ཡོང་གི་འདུག དེར་བརྟེན་རྒྱ་ནག་གཞུང་ནས་བོད་མིའི་ཐོག་འཛིན་པའི་ནོར་འཁྲུལ་ཅན་གྱི་སྲིད་བྱུས་དེར་ཡོ་བསྲང་བྱས་ཏེ། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་དགོངས་གཞི་ཟབ་མོ་དང་ཡོངས་སུ་མཐུན་པའི་བོད་རྒྱ་ཞི་མོལ་བྱེད་དགོས་པའི་སྐུལ་ལྕག་བྱེད་བཞིན་ཡོད། ང་ཚོ་སུད་བོད་མཐུན་ཚོགས་ངོས་ནས་བོད་ཀྱི་བདེན་དོན་ལ་སྔར་བཞིན་རྒྱབ་སྐྱོར་ཞུ་རྒྱུའི་ཆོད་སེམས་བརྟན་པོ་ཡོད། དེ་བཞིན་སུད་སིའི་གཞུང་དང་རྒྱ་ནག་གཞུང་དབར་ཚོང་འབྲེལ་གྱི་མཚོན་ཕན་ཚུན་གླེང་མོལ་བྱེད་སྐབས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་རྒྱུའི་བྱ་སྤྱོད་དེ་དག་བཀག་འགོག་བྱེད་རྒྱུ་དེ་ཆ་རྐྱེན་དུ་འཇོག་དགོས་པའི་རེ་སྐུལ་ཞུ་མུས་ཡིན་ཞེས་གསུངས་ཡོད་པ་བཅས། །
